Matkof i Yeso Ta Kyel i Jwon 20 - Findel i DeeƁwe Ti Alis i Ron

Mahalal i Wilyal Nggal

¹ Unai i ɗing malu' nin yis muɗor ta fit ti makwiding i hum manggyongi, yis ti awar i shitam ta ra yus ti.

² Lyam mbai ɗamafwashi, ɗamafwashi i ma aiyai, ima a Madang, Shatan, no'us ya ti awar i wilyal nggal andek.

³ Malu' i hwitus ya ta wii hum manggyongi, vo humi ya no' ya ti makwiding manjengi, ɓa u shahus dang ti ramam i wilyal nggal andek. Takfai ti andi, a kpang si catus ii ra i myan ndyong.

⁴ Unai i ɗing kunggwal i kaitat, som ima si fas mbaitat i lefti ɓur si te amun ii hai. I ɗing mupwet i som ima si dya'us hihai ya ɓurti si mba findel i Yeso, hu mba ti findel i DeeƁwe. Si nggwes i cwai ti lo i ya hu mashilim afut, si nggwes i mat ti mameer ames ta ɓosas hu ta ra ames. Shak asussi si humkyel ti mupwet, si mas kaitat hu Kristi i wilyal nggal andek.

⁵ Anggum i som ima si moti si luk fit kwa, a takfai ti mumbit i wilyal nggal andek si wa muluk fit. Mai a muluk fit ta mot i bya'.

⁶ Disyo' hu som sapai a sin ima si ta saa ti muluk fit i bya'. Mot mupil ti mati andok si sin hai kwa, si wa mute ii kocokak i DeeƁwe hu Kristi. Si wa masti kaitat akul hu yis i wilyal nggal andek.

Mumbit i Shatan

⁷ Myan ima wilyal nggal andek si mbit, si wa cat ti Shatan ii ra ta mano' wi.

⁸ Ma wa mulangya u dang ramam, ima si lai ii Gog hu Magog ta shak ɓwayai i naya. Shatan ma wa suɓut sus ɓurti ɓwol, mute hyang ames fota njor ta fo i yiir.

⁹ I ɗingus sin yes ta ɓwayai i naya, si nggaar bukak i som sapa hu ndii ti ashwa tima DeeƁwe ɓwetut fwet ya. Unai man ɗor ta fit ti cus ya.

¹⁰ Unai madang, ima dangus, si hwitus ya ta yiir i man macwai fwet, kyel ima si hwiti lo i ya hu mashit i fyarat ta. Si wa woti shum fo' ta reni, i myan hu myan.

Ɓur i Dala

¹¹ Unai i ɗing mbai kunggul i kaitat mapeli nin, hu yis ima ma amun ii hai. Fisha hu fit si ni ɓau ta wei yusti, si far kyel i mufot wet.

¹² I ɗing som ima si mwat, mbayai hu muyaiyi sin mangrai ta mabel i kunggul i kaitat i DeeƁwe. Si ɓu kaadaha ya, ta Kaada i Mupweti. Si lef ɓur si som ima si mwat ta ngga' ima si worong ta wii kaadai.

¹³ Yiir taf funatat ya, mot hu fiyai si taf ames funatat ya. Shak asussi si lefus ɓur si roha ames hai.

¹⁴ Unai si hwiti mot hu fiyai ya ta yiir i man wi. Yiir i man mai a mot mupil ndai.

¹⁵ Shak maɗufal ima wis asum ames ta Kaada i Mupwet kwa, si hwitus ya ta yiir i man wi.