Matkof i Yeso Ta Kyel i Jwon 2 - Findel i DeeƁwe Ti Alis i Ron

Woronga Wa Kyel i Malu' i Suɓut i Som Koltifai ta Afisa

¹ “Woronga wa kyel i malu' i suɓut i som koltifai ta Afisa, Muro mai ii ta kyel i yis ima mati ɓyar pyoron ta ra i ucwa ames, ima ma ɗa'at ta saa ti kwetlengang i pitila pyoron i ugbwirik mujuwi ani.

² I shang ro ama, hu njeng i shak ɗamam ima ha lwesheshat i hai. I shangi nyai ha wa mat ti ɗufal mufwashi kwa. Ha mba ɗufal ima si lai haisus a fe i muro taa andi kwa, ha wisus ti fyarat.

³ Ha mati lwesheshat hu no' ti mulut ya ta saa ti shum ɓurti asum amen, kyel ti hana kwa.

⁴ Shak ta andi, i wisa ti tirim mai, ha hon matɓwet i bya' ama ya.

⁵ Mbe'a maleng ima ti ha masi ti mufur! Hatata ha mas ɗamam ima ai ha masus ti bya'. Na wa' ha hatat, i wa yes kyel ama i zan pitila asa ya ta kyel amet.

⁶ Na ɓwai mai ha mas maɗesi ngga' ima ha nggwya ti aɗeng ima som i Nikolaita si masi, ta ngga' ima yin hwak i nggwetus ta.

⁷ Shak mamwal i hali, u hal aɗeng ima Rin ma lak ti som koltifai. Maɗufal ima cu uges i wa fasus andok u cu ta yit ti apwet ima ti ta kasirik i DeeƁwe.

Worong Wa Kyel Suɓut i Som Koltifai ta Simirna

⁸ “Woronga wa kyel i malu' i suɓut i som koltifai ta Simirna, Muro mai ii ta kyel i yis ima mii Bya' hu i Dala, ima mot humkyel ti mupwet.

⁹ I shang musut i shum ima ha ta saa, hu jyel ama, shak ta andi ha ti ramwayat. I shang findelal i fyaratat ima si laki na hai yati. Ima si lai haisus sin a som Ju taa andi kwa, a mare i Shatan.

¹⁰ Ka ha mwen ti shum ima ha wa woi kwa. I laksa, Shatan ma wa kinti shini amu ta wur i shitam ɓa si mba hus, ha wa woti shum i mukon hure. Tya i ma hya ti findel saa ti fati mulut wa ta fo i mot, yin i wa fasa rurwan i mal i mupwet.

¹¹ Shak mamwal ti hali, u hal aɗeng ima Rin ma lak ti som koltifai. Maɗufal ima cu uges, mot mupil ti wa ngge' sus kwa fweng.

Worong Wa Kyel Suɓut i Som Koltifai ta Pegamum

¹² “Woronga wa kyel i malu' i suɓut i som koltifai ta Pegamum, Muro mai ii ta kyel i yis ima mati awal macui ma fo apil.

¹³ I shang kyel ima ha mute ta, a kyel ima kunggul i Shatan mata. Shak ta andi, ha te si mwawei saa ti asum amen. Ha ɓwinggil fati mulut si yin hai kwa, saa ti mukonan i Antipas, shit amen ma mwawei, ima si forus ta ashwa amu, kyel ima Shatan mata.

¹⁴ Shak ta andi, tirim ima i wisa ti mai, ha mati ɗufal ima si ka' kofiti i Balam, ima kof Balak ɓa u ring Isar'ila ya si mas mafwashi ta fisel ti cwai ti cwa i kuna i harkyel hu arak i zuruk.

¹⁵ Angga'i nai hwak, ha mati ɗufal ima si ka' kofiti i som Nikolaita.

¹⁶ Hatata! Na andi kwa, i yes kyel ama ndai i mas ɓwol ti sin ti awal na fo amen.

¹⁷ Mamwal i hali, u hal aɗeng ima Rin ma lak ti suɓut i som koltifai. Yis ima cu uges, i wa fasus cwa ima si lai ii manna ima mata mufot. I wa muhum fasus afung mupeli ti asum mamwai ima si worong ta i hai. A maɗufal ima mat a yis je ma wa shangi.

Worong Wa Kyel i Suɓut i Som Koltifai ta Tyatira

¹⁸ “Woronga wa kyel i malu' i suɓut i som koltifai ta Tyatira, Muro mai ii ta kyel i Al i DeeƁwe, ima shishat ames sima fota alis i man, ima sisai ames ma fota shitam majuwi manzyuwi.

¹⁹ I shang shak aɗeng ima ha masi, hu matɓwet ama, hu fati mulut ama, hu lwesheshat ama, mwashi ha ti' ti hai ɓin ti aɗeng ima ai ha masani.

²⁰ Shak ta andi, tirim ima i wisa ti mai, ha mat mbor mu asum Ujezebel, tima ti lai haisut ii mushit. Ti kofiti amet ti kin yarai amen si fwar ta arak i zuruk hu cwai ti cwa i kuna i harkyel.

²¹ I fat myan ɓa ti hatat ta arak i zuruk ameti, shak ta andi ti ɓwet kwa.

²² I wa ragwat sut ta kyel i marak i mwatan. I wa kinti som ima si rak tut si wo shum ii calai kwa, na si hon fisel asut ɗak si wis mbwesh.

²³ Som ima si koltifai ti kofiti amet, i wa fwaransus ya. Suɓut i som koltifai shak si wa shangi nyai, yin a ma bene ti mulwat hu ambe' i ɗufal, i wa talsu shak ta ngga' ima hu mas ro ta.

²⁴ Mwashi, i ma laksu hun ima hu kat na Tyatira, ima hu nggyu ti kofiti mafwashi amet ima si lai ii, shang ti ɗamam manggyongi i Shatan. (I wa kinsu kinggat i ɗama nin hai kwa.)

²⁵ Ka' hun aɗeng ima hu mati gbenjeng ɗak i yes.

²⁶ Shak maɗufal ima cu uges ɗak mas aɗeng ima i ɓweti wa dala, i wa fasus kaitat si ramam hai.

²⁷ ‘Ma wa masti kaitat si sin hai ti cwang ti shitam, u dyashus ya fota lungai i ta'.’ Mbaitat ima Deen fan, I wa fasus shak.

²⁸ I wa fasus ɓyar ti fo i mwen hwak.

²⁹ Mamwal i hali, u hal aɗeng ima Rin ma lak ti suɓut i som koltifai.