Matkof i Yeso Ta Kyel i Jwon 19 - Findel i DeeƁwe Ti Alis i Ron

Ka Zan Asum i DeeƁwe Fit

¹ Takfai ti mai, i hal la nin fota i rwan i suɓut i ɗufal ta fit sin taanja nyai, “Halaluya! Bum hu cinjangat hu andok ii DeeƁwe amukan,

² ɓurti tot ti ɓur ames a mwawei hu manderei. Yis lef ɓur si ndii ti al ti se andi tima ti rafat naya ya ti arak i zuruk amet. Yis wer wash i yarai ames ta hai yut ti.”

³ Si hum taanja nyai, “Halaluya! Kikis ta wii yut ti cu wei ti muɗuya ta fit myan hu myan.”

⁴ Tabwa' hure apil tau ɓarasi, hu lu'a' ɓaras mupwetani si fwar ta mabel i DeeƁwe, si cus afut, yis ima ma amun tasi kunggul ti kaitat hai. Sin nyai, “Aandi, Halaluya!”

⁵ Unai la nin ti yes ta si kunggul ti kaitat hai nyai, “Mbaitat wa kyel i DeeƁwe amukan, hun shak yarai ames, hun ima hu mwenus fo, shak muyaiyi hu mbaiyai yi!”

⁶ I hal rwan nin fota mbai suɓut i ɗufal, fota rwan i ham ima ma tital, hu fota taɗas i bara, ti taanja nyai, “Halaluya! Deembai DeeƁwe Mambaitat, a makaitat.

⁷ Ka jakak ka pipel ti mulut, ka fas ngye hu cinjangat! Kunggo i Al Marai tuu yes, yamwan asus ti sinzam haisut.

⁸ Arom i fyu, mapeli syak, si fat ɓa ti ru'.” (Arom i fyu mai ma kofti a mute manderei ima som sapai si masi.)

⁹ Unai malu'i nyun, “Woronga, ‘Disyo' si som ima si laiyus ɓa si wa got i Al Marai!’ ” Hum nyai, “Mii a findelal i mwawei i DeeƁwe.”

¹⁰ Unai i fur ta mabel ames ɓa i cus afut. Yis nyun, “Ka ha masi andi kwa! Yin hwak a yere fota ha hu shuna ima si ka' mwawei i Yeso. Cwa DeeƁwe afut! Ɓurti findel i mwawei i Yeso a rin i findel i shit.”

Ma Ɓus ti Mbiri Mapeli

¹¹ I ɗing fit a wuri, mbiri mapeli nin yis mangra ta wei yunti, maɓussi si laiyus ii ma Hyati findel hu ma Mwawei. Ti mwawei lef ɓur ya mas ɓwol hwak.

¹² Shishat ames ma fota alis i man, mati rurwan hyang ta hai yusti. Mati asum ima si worongusi hai, asum mai ɗeng shangi kwa a yis je shangi.

¹³ Shu arom ima si jop ya ti wash, asum ames a Findel i DeeƁwe.

¹⁴ Som ɓwol i fit sin koltifai asussi, sin ɓus ti mbarai mupelani, si ru' arom i fyu mapelani syak.

¹⁵ Awal macui lang ya ta fo ames ima ma wa ti solo ti ramam ya ta fisha. “Ma wa masti kaitat si sin hai ti cwang ti shitam.” U tindak ma'al i manggɓu' ya ta kyel i tis ti manggɓu' ti futut ma hyangi i DeeƁwe Mambaitat.

¹⁶ Tasi fagin asus hai hu tasi for ames hai, si worong asum mai ta, Makai i kaya, hu Deembai i hu deembai.

¹⁷ Unai i ɗing malu' nin mangra tasi ɓwe hai, taanja lai ti avyash ima si luk nasi se hai ni, “Yehun! Suɓut hun ɓurti mbai i got i DeeƁwe.

¹⁸ Yehun hu cu lo i kaya, hu i cijai, hu i som ɓwol munjengani, hu i mbarai ta i som ɓusussi, hu lo i ɗufal shak, i fe wur hu yarai, muyayi hu mbayai.”

¹⁹ Unai i ɗing lo i yai hu kaya i naya hu som ɓwol ames, si suɓut ɓa si ɓwol yis ima masi mbiri hai, hu som ɓwol ames.

²⁰ Si ka' lo i yai hu mashit i fyarat ima mas ɗamam i shok na foi, ii foi amesi. Ɗamam i shok na fo mii ii dang ti shak ima si mat mameer i asum i lo i yai, hu ima si cu mashilim amesi afut. Lo i ya hu mashit i fyarat ani, si hwitus ya ti mupwet ta yiir i man macwai fwet.

²¹ Si fwar som ɓwol amessi ya shak ti awal macui ima lang ya ta fo i ma ɓus ti mbiri mapeli ani. Avyash si cu loi si gwishil ti shak asussi.