Matkof i Yeso Ta Kyel i Jwon 18 - Findel i DeeƁwe Ti Alis i Ron

Mufur i Babila

¹ Takfai ti mai, i ɗing malu'i yis muɗor ta fit. Mati ndok fwet, muka' i cinjangat ames vo naya ya shak.

² Taanja ti la mbai ni, “Ti fur, Babila ndii ti fur! Ti tehut ii wur i makolo, kyel mute i rin mafwashi shak, hu shak ɗamam mufwashani, ta avyash ima si ti aso.

³ Shak ramam si wo ham i manggɓu' i arak i zuruk amet. Kaya i naya si mas arak i zuruk ti yit, som i woor i naya si mas sufat ɓurti gwel i mafwashi amet.”

⁴ Unai i hal la nin ta fit hwak nyai, “Rang hun ya ta kyel amet a ɗufal amen, ɓa ka hu har mashitat i mafwashi amet, ɓa kan worowa amet wisu.

⁵ Mafwashi amet ngye ru ta fit, DeeƁwe mbe' ti mafwashi amet.

⁶ Hum huyut ti ta kiga' ta ngga' ima ti masui ta, wer hun sa pilal i aɗeng ima ti masui. Aɗeng ima ti rot ti fu, rot hun amu ii ma njeng sa pilal ta cunjo amet wi.

⁷ Kof hu yut ɓwari ta kikyawat na muluti fota cinjangat hu ramwayat ima ti fa haisut. Ta mulut yuti ti nggwak ti ajin, ‘Yin a mukai, a mbor ti lan kwa, i wa shaat kwa fweng.’

⁸ Ɓurti andi, mukon andek, worowa amet ma yes u jikut hai, mot, hu shaat, hu hwem. Man ma wa cwai sut ya, ɓurti mbaitat i Deembai DeeƁwe ma tot sut ɓur.

⁹ “Myan ima kaya i naya ima si mas arak i zuruk ti yit, sin gwishil ti ramwayat amet, si wa ɗing ti kikis amet yis rufwish, si gwa'an rafo sin shaat ɓursut.

¹⁰ Si te mangrai ta maleng, ɓurti myanat ka'us ti ɗing ti shum ima tima woi, sin gwa'an ti rafo nyai, “ ‘Woroo! Woroo, a ndii ti ashwa, A Babila, ashwa mu andok! Saa ti shitam andek, amesh mbit!’

¹¹ “Som woor i naya si kawa si shaat ɓursut, ɓurti ɗeng hum juwil ti ɗamam i woor ames ya kwa.

¹² Ɗamam i woor fota ugbwirik mujuwani, hu ugbwirik mupelani, hu afyai manzyuwani akat-akat, arom majuwani liim, hu malusi hu majuwani jwe', yitat mafyongi akat-akat, hu yitat ima si hong ya i cef hyang, ɗamam ima si masi ti anggur i tidam, shitam majuwi, hu shitam makyawi, hu i afyai manzyuwani i ta' ima si ti cef fwet.

¹³ Ɗamam i sinamon hu ɗam i mavwash, yitat i ngyeshi mafyongi, hu mbar i mur, hu mbar mafyongi, hu i ham i manggɓu', hu mbar i fati, han manwangi hu alkama, randwang hu tutwai, hu mbarai, hu mbarai i huhwi, lo' hu mupwet i ɗufal.

¹⁴ “Som i woori si nyut, ‘Shak ɗamam maɗesani ima shi kin mulut ii hai si fot ndarak. Shak sufat amesh hu malem amesh nzekus. Shi wa muhum wisus kwa fweng!’

¹⁵ Som woor ima si juwil ɗamam mii ya, si mas sufat ta kyel amet, si wa mute mangra ta maleng sin myanat ti shum amet fo. Sin gwa'an ti rafo hu shaat,

¹⁶ sin nyai, “ ‘Woroo! Woroo! A ndii ti ashwa, ai shi ru' arom mulusani, ima si mii mujuwi liim, hu majuwi jwe', sin nzilwit ya ti ugbwirik mujuwi, hu afyai manzyuwani akat-akat ima si ti cef fwet!

¹⁷ Saa ti shitam andek mbai sufat amesh nyus ndarak!’ “Shak mbayai ima si nggul ti kwang i ham, hu shak som ima si ɗa'at si yiir hai, hu ima si ro ta kwangi wi, hu shak som ima si tal ti myatat ɓurti ro ta yiir wi, si wa mute mangrai ta maleng.

¹⁸ Myan ima si ɗing kikis amet yis mahwirish, si wa cwai i fo nyai, ‘Ai ashwa nin ti kol ashwa moti mute ii ndii haa?’

¹⁹ Si wa har ti ɓura si shu ta hihai ames, sin ti gwa'an ti raafo ta shaati nyai, “ ‘Woroo! Woroo! A ndii ti ashwa, kyel ima shak som kwangang i ham i yiir si ramwayat ta saa ti sufat amet! Saa ti shitam andek ti fot ndarak!

²⁰ A fit, jakak hun si yit hai! A som sapai, hu fe muro, hu som shit, jakak hun! Ɓurti DeeƁwe lefut ɓur ta ngga' ima ti kofu ya ta.’ ”

²¹ Malu' mbai manjengi nin zan mbai afung, ima ma fota afung i nuk, hwiti ta yiir mbai, yis nyai, “A ti njeng si wa muhwi ti Babila ndii ti ashwa ya, si wa muhum ɗingsut kwa fweng.

²² Si wa muhum hal ti som cut ti ɓeng hu som adorai, hu som fu' ti njungkulet, hu som fu' ti ngyefaf kwa. Si wa muhum ɗing ti maro i ra nin ta wii yush ti kwa. Kawa i munjon i nuk si wa muhum hali na wii yush ti kwa.

²³ Si wa muhum ɗing ti kweneng i pitila na wii yush ti kwa fweng, zalang hu yamwan si wa muhum zan ti shiɗat i no' ti kunggo na wii yush ti kwa fweng. Som i woor amesh ima a cijai i shak naya, shak ramam i naya si wis buu ɓurti sukuyat amesh.

²⁴ Ta wii yut ti si wis wash i som shit hu i som sapai, hu i shak som ima si fwar na naya.”