Matkof i Yeso Ta Kyel i Jwon 17 - Findel i DeeƁwe Ti Alis i Ron

Mbor hu Lo i Ya Maɓin

¹ Andek ta saa ti som lu' pyoron ima si ti kwangai ani yes nyun, “Ya, i wa kofsa ɓur ima cu al ti se ndii nin, tima ti te amun tasi ham hai hyang.

² Kaya i naya si mas arak i zuruk hu yit, hu ɗufal i naya si fiil ti ham i manggɓu' i zuruk amet.”

³ Unai malu' zanun ya ta Rin wi wisti ta ya. Ta kyeli i ɗing mbor nin amun si hai i lo i ya majuwi jwe' nin. Si vohus ya ti asumam i se' ti DeeƁwe, mati hihai pyoron hu shwam hure.

⁴ Mbori ti ru' arom ima cujwu liim, hu mujuwani jwe', hu afyai muɗesani hu ugbwirik mujuwi. Yit ti cunjo i ugbwirik mujuwi ta ra amet, tima ti hya ti ɗamam i zuruk akat-akat, hu i arak i zuruk amet.

⁵ Ta ɓos amet si worong asum ta nyai, ɗama ima mata mufot wi, babila ndii, naa ti fe i se, hu ti ɗamam i zuruk na naya.

⁶ I ɗing mbori ti fiil ti wash i som sapa hu wash i som ima si but ti findel si Yeso hai. Myan ima i ɗingut, i shok na fo fwet.

⁷ Unai malu' i nyun, “Ami kin ha shok na fo ya? I wa laksa ɗama ima mata mufot wi si mbor moti hai hu lo i ya ima ti ɓusi mai, ma hihai pyoron hu shwam hure.

⁸ Lo i ya ima ha ɗingi ani ai yis na, mwashi mana kwa, ma wa mupwak ya ta hum manggyongi u wa ta kyel ima si wa forsus ya ta. Ɗufal i naya ima wa' si worong asumam ames ta kaada i mupwet tasi lan ti naya, si wa shok na fwai na si ɗing lo i yai, ɓurti ai yis na, mwashi mana kwa, ma wa muhum yes.

⁹ “Aɗeng mai ma ɓweti ambe' i piris. Hihai pyoron ani a fwereha pyoron, ima mbori tima amun ii hai.

¹⁰ Hihai pyoron ani a kaya pyoron hwak, hara ti si fur, andek ma ɗiri, mandeki tuu yes kwa. Myan ima yes, a kpang u tena i myan ndyong.

¹¹ Lo i ya ima ai yis na, mwashi mana kwa, ayis a makai mamyarfu'. Andek ta saa ti pyoroni, yis hwak ma wa kyel ima si wa forsus ya ta.

¹² “Shwam hure ima ha ɗingus ani, a kaya hure ima wa' ti si mat kaitat, si wa no'sus kaitat i shitam andek, si mas kaitat akul hu lo i yai.

¹³ Sin hure mii ambe' ames andek, si wa fati lo i yai andok hu mbaitat.

¹⁴ Si wa ɓwol ti Al Marai. Al Maraiyi ma wa cwai ti uges si sin hai, ɓurti yis a Deembai i mbayai hu Makai i kaya. Sin ima sima tikul si wa mute ii ma yis laiyus, benus, sin a som koltifai ames i mwawei.”

¹⁵ Unai malu'i nyun, “Ham ima ha ɗingi ani, a kyel ima al ti se andi tima amun ta, a ɗufal, hu male' i suɓut, hu ramam, hu alisas.

¹⁶ Lo i ya hu shwam hure ima ha ɗingi ani, si wa munggwya ti al ti se andi. Si wa ka'sut ti shak ɗamam ima ti mati si honut ambwirit, si wa cwai ti loi lo' amet ya, si ngyeshut ya ti man.

¹⁷ A DeeƁwe kin ta mulwat ames ɓa si mas aɗeng ima yis ma ɓweti, si te ti ambe' andek si fa lo i ya mai andok i masti kaitat, yes myan ima findel i DeeƁwe hya.

¹⁸ Mbor tima ha ɗingi andi a ndii ti ashwa ti mati ti kaitat si kaya i naya hai.”