Matkof i Yeso Ta Kyel i Jwon 16 - Findel i DeeƁwe Ti Alis i Ron

Kwangai Pyoron i Futut i DeeƁwe

¹ Unai i hal la mbai nin ta wur i DeeƁwe yis findel ti som lu' pyoron nyai, “Ɓu hu shu kwangai pyoron i futut i DeeƁwe ani si naya hai.”

² Malu' i bya' wa shu i kwang ames si fisha hai, mburyash mahanat mafwashi fwet si rangya ta lo'a' i ɗufal ima si mati mameer i lo i ya maɓin ani, si cu mashilim amesi afut.

³ Malu' mapili shu i kwang ames ta yiir, unai hatatus fota wash i funat, shak aɗeng ima mati mupwet ta wii yiiri mot.

⁴ Malu' mataati shu i kwang ames si ɗaran hai, hu kwarai i ham, si hatatus ii wash.

⁵ Unai i hal malu' ima mati mbaitat si hami hai ni, “A ha a ma mwawei nasi lefti ɓur mai, ha ima ha mii mwashi hu ima ai, Masapai, ɓurti ha lef ɓur ya ndere.

⁶ Si shu wash i som sapa hu som shit ama ya, a aɗeng ima kin nai ha fas wash ɓa si wo si kiga' si aɗeng ima si far.”

⁷ I hal la nin ta kyel i kuna ti mati nyai, “Hei, a Deembai DeeƁwe Mambaitat, lefti ɓur ama a awei, a ndere hwak.”

⁸ Malu' ma ɓaras shu i kwang ames si ɓwei hai, unai si fa ɓwe i andok i ngyesh ti ɗufal ya ti man.

⁹ A oi nggyash ɗufal ya, kinus si se' asum i DeeƁwe, yis ima mati kaitat si worowa mii hai. Shak ta andi si nggwes i fwal ti shwaiya hu fasus ngye i cinjangat ames.

¹⁰ Malu' mahara shu i kwang ames ta si kunggul i kaitat i lo i ya maɓini, kaitat asussi maɓing vot ya. Ɗufal si nggwar alisas ames ya ɓurti shumi ɓal,

¹¹ si se' DeeƁwe i kyel fit ɓurti hanat hu mburyash amessi ɓal, shak ta andi si nggwes i fwal ti shwaiya ta si aɗeng ima si masi.

¹² Malu' mataani shu i kwang ames ya ta ɗara mbai i Yufiretis, unai hami shokus, ɓa fisel ti lang ya kaya ta muɗu i ɓwe si sa ta.

¹³ Unai i ɗing rin mafwashi ataat, si te fota kaɗwak. Si ran ya ta fo i ɗamafwashi mbai, hu ta fo i lo ti ya maɓin, hu ta fo i mashit i fyarat.

¹⁴ Sin a rin mafwashi ima si masti ɗamam i shok na fo, a sin a rinan ima si wa kyel i kaya i naya shak, ɓa si suɓutus, ɓurti ɓwol i mwen ndii ti DeeƁwe Mambaitat.

¹⁵ “Ɗing huni, u mai i yes fota asher! Disyo' ma akul hu shak maɗufal ima ma mute mweret, ima mafwang ti arom ames, ka ndok u at ambwiriti, u wo shusho ta saa ti ɗufal wi.”

¹⁶ Unai si suɓut kayai ta kyel andek, kyel ima si lai ii Amagedon ti alis i Ju.

¹⁷ Malu' mapyoron shu i kwang ames ya tasi se hai, la ndii nin ti lang ya ta wur i DeeƁwe ta kunggul i kaitat nyai, “Mbit ndai!”

¹⁸ Kyel ti nzilwyat, yit rumung, taɗas i bara tifai, fisha ro jiir fwet. A ro i fisha ima si masi mii mafwashi ima si kaani hu nin kwa shak myan ima maɗufal yis na naya, muro i fishai mati ambas fwet.

¹⁹ Mbai ashwa matkaar kikyal ataat, mbaiyai i ashwaha i ramam si nggwalus. DeeƁwe mbe' ti Babila ndii fat cunjo tima ti hya ti ham i manggɓu' i futut ames.

²⁰ Shak rusas ima si ta saa ti yiir wi, si mbyashus, mbayai angashash ɗeng hum ɗing sus kwa.

²¹ Mbayai siir ima kinggat ames kol kilo hure hara, si ndaak ta fit si ɗufal hai. Ɗufal si se' DeeƁwe ɓurti shum ima si wo tasi worowa i siiri, siiri a ɗama i myanat.