Matkof i Yeso Ta Kyel i Jwon 15 - Findel i DeeƁwe Ti Alis i Ron

Som Lu' Pyoron hu Worowa Pyoron

¹ I hum ɗing ti mbai ɗama nin i shok na fo ta fit, som lu' pyoron ti worowa pyoron i dala, ɓurti a ti mii si wa kofti futut i DeeƁwe i dala.

² I ɗing ɗama nin fota yiir i matalal ima si yir ti man, i hum ɗing ti ɗufal ima si cu uges si lo i ya maɓin hu mashilim ames, hu mameer i asum ames, sin mangrai ta fo i yiiri. Sin ti ɓengang ima DeeƁwe fas.

³ Sin lak ti ador ti Mosis yere i DeeƁwe, hu ador ti Al Marai nyai, “Roha mbayai i shok na fo ama, Deembai DeeƁwe Mambaitat. Ndere hu mwawei a fiselal ama shak, Makai i Ramam.

⁴ A Deembai, awe ma wa myanat sa fo, u fa asum ama cinjangat kwa ya? A ha je a masapai. Shak Ramam si wa yes si cu ha afut, ɓurti roha manderei ama si matkof.”

⁵ Takfai ti mai, i ɗing Wur i DeeƁwe awuri ta fit, ima a Buk i lak ti mwawei.

⁶ Ta wii i Wur i DeeƁwe som lu' pyoron ti worowa pyoron si rangya. Si ru' arom mapelani, aromi sin nzilwyatan, si no' munggya' i ugbwirik mujuwi ta fajin.

⁷ Andek ta saa ti lu'a' mupwetani ɓaras ani, si fa som lu' pyoron kwangai i ugbwirik mujuwi ima si hya ti futut i DeeƁwe, yis ima mana myan hu myan.

⁸ Wur i DeeƁwe hya ti kikis i cinjangat i DeeƁwe ta andok ames wi. Si myani ɗeng ndok u lang ta Wur i DeeƁwe kwa, na worowa pyoron i som lu' pyoron mii si mbit tawe.