Matkof i Yeso Ta Kyel i Jwon 14 - Findel i DeeƁwe Ti Alis i Ron

Al Marai hu 144,000

¹ Unai i ɗingi ta wei yunti, Al Marai yis mangra tasi Anggash i Zayon hu nggal andek ta ndik hure ɓaras tau ɓarasi (144,000) ima si mati asum ames hu i Dees ima si worong ta ɓosas ames.

² Ɗak i hal la ta fit yit ndurum fota tital i ham, hu fota taɗas i bara ti ambas. La tima i hali tima fota ti ɓeng.

³ Sin lak ti ador mumwai ta wei i kunggul i kaitat, ta wei i lu'a' mupwetani ɓaras hu ta wei i tabwa'a'. Ɗeng ma wa shang ti lak ti adori kwa, a ɗufal nggal andek ta ndik hure ɓaras tau ɓarasi (144,000) je, ima si dumus ya na naya.

⁴ Mii a ɗufal ima si ka' haisus ya ta arak i zuruk, ɓurti si ka' haisus ya ti sapa. Si kolfai ti Al Maraiyi shak kyel ima ma wa ta. Si juwil sinyi ta ɗufal wi, si fa DeeƁwe hu Al Maraiyi sinyi fota macwa i bya' ima si karat.

⁵ Si wis fyarat ta fo ames kwa fweng, si shumus kwa fweng.

Som Lu' Ataat

⁶ Unai i ɗing malu' nin yis luk tasi se hai, yis ti Muro Maɗesi i myan hu myan ɓa si mba ti ɗufal ima si na naya, wa kyel i ramam shak, hu gungai, hu alisas, hu ɗufal.

⁷ Findel ti la mbai ni, “Mwen hun DeeƁwe fo, fa huyus ngye, myan i tot ti ɓur ames yes. Cu huyus afut yis ima lan fit, ta fishai, ta yiiri hu kwarai i ham.”

⁸ Malu' mapil kolfai ti i bya' yis nyai, “Ti fur! Babila ndii ti fur, yit tima ti kin shak ramam sin woti ham i manggɓu' i futut i arak i zuruk amet.”

⁹ Unai malu' mataati kolfai ti mapilali yis findel ti la mbai nyai, “Shak maɗufal ima cu lo i ya maɓin hu mashilim ames afut, mat a mameer ames ta ɓos ahun a ra,

¹⁰ yis hwak ma wa woti ham i manggɓu' i futut i DeeƁwe, ima si shu ti njeng fwet ta wii i cunjo i futut i DeeƁwe. Si wa ndwetsus ti afyai i man ma cwai ta wei i som lu' musapa, hu wei i Al Marai.

¹¹ Kikis i ndwetsusi cu wei ti muɗuya myan hu myan. Kyel lafos mata kwa fo' ta reni, sin ima si cu lo i ya maɓini hu mashilim ames afut, hu shak maɗufal ima si worongus mameer i asum ames hai.”

¹² Mai maɓweti rwish i agung i som sapa ima si hya ti anggut i DeeƁwe, si cwai ti wei ti mute i fati mwawei wa kyel i Yeso.

¹³ Unai i hal la nin ta fit yit nyai, “Woronga, disyo' si som ima si mot ta ro i Deembai nasi mwashi wa wei.” Rin ni, “Aandi, si wa lafos ta shum i roha ames, ɓurti roha ames ma wa koltifai asussi.”

Karat i Naya

¹⁴ Unai i ɗing ri' mapeli nin, “fota a Al i Maɗufal” te amun tasi ri'i hai. Mati rurwan i ugbwirik mujuwi ta hai ames hu loje macui ta ra ames.

¹⁵ Malu' nin lang ya ta Wur i DeeƁwe lai lai ti la mbai wa kyel i yis ima ma amun si ri'i hai, ni, “Ti'a loje ama ha mas karat, ɓurti myan i karat yes, macwa i nayai tuu nung.”

¹⁶ Yis ima ma amun si ri'i hai, hwiti loje ames na naya, karati nayai ya.

¹⁷ Malu' nin lang ya ta Wur i DeeƁwe ta fit, yis hwak yis ti loje macui.

¹⁸ Malu' nin hwak ima ma ɗing ti man ta, lang ya ta kyel i kuna, lai lai ti la mbai wa kyel i yis ima mati loje ani nyus, “Ti'a loje macui ama ani, ha karat ma'al i manggɓu' ta manggɓu' i naya, ɓurti macwai nung.”

¹⁹ Malu'i hwiti loje ames na naya, karat ma'al i manggɓu'i, unai shu ta mbai kyel i tis ti manggɓu' i futut i DeeƁwe.

²⁰ Si tis manggɓu'i ta takfai i ashwa, wash cu wei ti kukwol ya ta kyeli, maleng ames kol kilimita ndik ataat (300), kinggyongat ames kol sai taan.