Matkof i Yeso Ta Kyel i Jwon 13 - Findel i DeeƁwe Ti Alis i Ron

¹ Ɗamafwashii te mangra si njor i fo i yiir hai. I ɗing lo i ya maɓin nin yis mulangya ta yiir wi. Mati shwam hure, hu hihai pyoron. Mati rurwan hure tasi shwam hure amesi hai, tasi shak hihai yi, mati asumam ima si worong i findelal i ale' si DeeƁwe hai.

Lo Ya ta Ham wi

² Lo i ya maɓin ima i ɗingi te fota rafan, mati caran mbayai fota i beyar, foi te fota i kukum. Mbai ɗamafwashii fa lo i ya maɓini andok ames, hu kunggul ti kaitat ames hu mbai mbaitat.

³ Andek ta saa ti hihai i lo i ya maɓini te fota mati afol mbai ima ɓa u forus, ɗak afoli tuu njeng. Naya shak ti shok no fwai, si kolfai asussi.

⁴ Ɗufal si cu mbai ɗamafwashii afut ɓurti fa lo i ya maɓini andok, si cu lo i ya maɓini afut hwak sin lul nyai, “Awe ma fota lo i ya maɓin mai ya? Awe ndok u mas ɓwol ti yis ya?”

⁵ Si fa lo i ya maɓini fo ɓa u lak findelal i pati ajin hu findel i ale' si DeeƁwe hai, hu masti ro ti andok ames i ture hure ɓaras tau pili.

⁶ Ɓu fo ames ya se' DeeƁwe, rafat asum ames ya, hu kyel ima ma mute ta, hu shak ima si ta fit.

⁷ Si fas andok u mas ɓwol si som sapai, u cus uges si sin hai. Si fas andok si shak gungai, hu ɗufal, hu alisas, hu ramam.

⁸ Ɗufal i naya hyang si wa cwai ti lo i ya maɓini afut. Ɗufal ima si wa cwaisus afut kwa, a sin ima si worong asumam ames ta kaada i mupwet i Al Marai, ima ai si lefti ɓele tasi lan ti naya.

⁹ Shak mamwal i hali u hali.

¹⁰ Maɗufali ima ma wa mute ii yere, si watus u te ii yere. Ima si wa fori ti awal, a ti awal si wa forsus ya. Ɓurti andi, som sapa a kpak si shang ka'ti agung hu fati mwawei.

Lo i Ya ta Fisha Wi

¹¹ Unai i ɗing lo i ya maɓin nin, yis mulangya ta fisha. Mati shwam apil fota i al marai, findel fota mbai ɗamafwashi.

¹² Mas ro ti shak andok i lo i ya maɓin i bya' ii fo ames, kin naya hu ɗufali si cu lo i ya maɓin i bya'i afut, ima afol mbai ames njeng.

¹³ Mas mbayai i ɗamam i shok na fo, kol ima kin man ti ɗor ta fit yes na naya ta shishat i ɗufal wi shak.

¹⁴ Ɓurti ɗamam i shok na fo ima si fas andok u masi ii fo i lo i ya maɓin i bya' ani, dang ɗufal i naya. Kinus ɓa si mas mashilim i lo i ya maɓin, ima si telus ti awal, shak ta andi pwetus.

¹⁵ Si fas andok ɓa u fa mashilim i lo i ya maɓin i bya' mupwet, ɓa u findel u kin shak ɗufal ima si nggwes i cwai ti mashilim i lo i ya maɓin afut si forus ya.

¹⁶ Kin a kpang ɗufal si mat mameer ta ra i ucwa hu ɓosas ames, mavaati hu mbai, maramwayat hu majyel, yere hu al i wur.

¹⁷ Ɗeng ndok u juwil ahun u juwil ya kaciwa' wis mameer ima si fai kwa. Mameeri a asum i lo i ya maɓini ahun a ambe' i asum ames.

¹⁸ Mai aɗengi ma ɓweti piris. Shak maɗufal ima mati piris, u mbe' ambe' i lo i ya maɓini, ɓurti a ambe' i maɗufal. Ambe' i a ndik taan ta hure taan tau taani (666).