Matkof i Yeso Ta Kyel i Jwon 12 - Findel i DeeƁwe Ti Alis i Ron

Mbori hu Ɗamafwashi Mbai

¹ Si ɗing mbai ɗama i shok na fo pwak ya ta fit, mbor nin arom amet a ɓwe, sisai amet yis tasi ture hai, ti mati rurwan i ɓyar hure mulang apil ta hai yuti.

² Tima ti haar, yit kawa ti hanat wa al.

³ Unai ɗama i shok na fo nin hwak pwak ya ta fit, a mbai ɗamafwashi majuwi ma hihai pyoron hu shwam hure hu rurwan pyoron ta hihai ames.

⁴ Fyal i ɗamafwashii dul nggwa andek ta saa ti ataat i ɓyar ta fit, hwiti ya na fisha. Unai ɗamafwashii te mangra ta wei i mbor tima ti wa ali, ti ambe' nyai myan ima ti al, u cu ali ya.

⁵ Ti al ali, ali a marei ima ma wa masti kaitat i shak ramam ti cwang ti shitam. Unai si vyam ali ya si wis ti kyel i DeeƁwe hu kunggul ti kaitat ames.

⁶ Mbori ti tital ti wit ta ya, ta kyel ima DeeƁwe ɗak ti ɓa si ɗingut fo ta, i mukonan nggal andek ta ndik apil ta hure taani, (1,260).

⁷ Unai si mas ɓwol ta fit. Makyel hu som i lu' ames si mas ɓwol ti ɗamafwashi. Ɗamafwashii hu som lu' ames si mas ɓwol hwak.

⁸ Si cu ɗamafwashii ti ɓwol, si nggahus ya ta fit.

⁹ Unai si hwiti mbai ɗamafwashii ya na fisha, ɗamafwashi ima ai i ɓele, ima si nitus a maɗakyir hu Shatan, ima dang naya shak. Si hwitus ya na naya akul hu som lu' ames.

¹⁰ Unai i hal mbai la nin ta fit, ni, “Mwashi, bum hu andok hu kaitat ii DeeƁwe amukan, hu mbaitat i Kristi ames si yes. Ɓurti yis a ma se' ti shunukan ima ma sya'ansus ta wei i DeeƁwe fo' ta reni, si hwitus ya na fisha.

¹¹ Si cu uges si yis hai saa ti wash i Al Marai, hu findel i mwawei ames si Yeso hai. Si ɓwet haisus fwet kwa, si fa mupwet ames ɓa si mwat.

¹² Ɓurti andi, jakak hun hun fit hu hun ima hu mata! Mwe asui naya hu yiir, ɓurti ɗamafwashi mai ɗor na kyel amu! Ɗak hya ti futut, ɓurti shangi nyai myan ames katus ndyong.”

¹³ Myan ima ɗamafwashii ɗingi si hwitus ya na naya, lang tifai ti mbor tima ti al al marei andi.

¹⁴ Si fa mbori kurya apil i wool mbai, ɓa ti lukut ti wa ta kyel ima si ɗakut ti ta ya, kyel ima si wa ɗingsut fo ta i myan, myan apil ta ɓwaiyi i myani, kyel ima ɗamafwashii ma wa muru ta kwa.

¹⁵ Unai ɗamafwashi taf ham ya ta fo ames fota ɗara, ɓa u fyal mbori u wis ti.

¹⁶ Unai fisha bum mbori ti ɓwai ti fo ya, ɗak fishai wo ham ima lang ya ta fo i ɗamafwashii.

¹⁷ Unai ɗamafwashii mas futut ti mbori fwet, luk fit ti maraf wa masti ɓwol ti anggum i fe ameti ima si hal ti anggut i DeeƁwe, sin ka'ti findel i Yeso.