Matkof i Yeso Ta Kyel i Jwon 11 - Findel i DeeƁwe Ti Alis i Ron

Ɗufal Apil

¹ Unai si fan munggi' ti amba nin fota cwang si nyun, “Ɓwa ha mbe' Wur i DeeƁwe hu kyel i kuna, ha mbe' som ima si cwai ti DeeƁwe afut ta wii.

² Kan ha mbe' ta taya i Wur i DeeƁwe kwa, ɓurti si fa ya ta ra i Ramam. Si wa ɗwasan ti ashwa musapai i turyan hure ɓaras tau pili.

³ I wa fati som apil, ima a shit amen, andok i lak ti findel i som shit i mukonan nggal andek, ta ndik apil ta hure taani (1,260), sin shwaiti arom i shaat.”

⁴ Apilal mii a yitat i mbar apil, hu kwetlengang apil ima sima mangrai ta wei i Deembai i shak naya.

⁵ Na ɗeng ni gbuk ɓa u kinus afol, man ti wa mulang ta fwai ames ti cu som i ha'sus ti wei ya. Angga' ima shak som i ha'sus ti wei si wa mwatan ta nai.

⁶ Ɗufal mii si ti andok i voti ri' ya hu sha ti foon myan ima sin lak ti findelal i som shit. Si ti andok i hatat ti ham ya ii wash, hu andok i yes ti worowa na naya ta myan ima si ɓweti.

⁷ Myan ima si mbit lak ti findelal ames, lo i ya maɓin ima lang ya ta hum manggyongi ani ma wa masti ɓwol ti sin, u ɓin njeng ames u fwarus ya.

⁸ Si wa honti funatat ames ta fisel i mbai ashwa, kyel ima si nggwak Deembai ames ta, tima ti kaani si lai ii Sodom hu Masar.

⁹ Shak ɗufal, hu gungai, hu alisas hu ramam si wa sha ti laisus, sin shwaiti funatati shishat hai i mukon ataat ta ɓwaiyi.

¹⁰ Ɗufal i naya si wa jakak ti mot i ɗufal apili, sin got, sin tuk ti ɗiyai malal, ɓurti som shit apil mii si fa ɗufal shum na naya ii calai kwa.

¹¹ Unai takfai ti mukon ataat ta ɓwaiyi, lafos i mupwet yes ta kyel i DeeƁwe lang ta wii yusti, unai si luk fit mangrai. Myanat mangjengi ka' ɗufal ima si ɗingus.

¹² Unai si hal la munjengi ta fit yit nyai sus, “Yehun na fit nati.” Unai si ɗu ta fit saa ti ri' si wis, som i ha' ti wei ti sin sin ɗingi.

¹³ Tasi myan ani fo abet fisha ro jiir, nggwa andek ta saa ti hure i ashwai nggwal. Ɗufal nggal pyoron (7,000) si mwat ta saa ti a ro i fishai. Ɗufal ima si pwet myanat ka'us si fa DeeƁwe i kyel fit ngye.

¹⁴ Mwe mupil ti lang ta, mwe mutaat tima yes ndai.

Ngyef Mupyoron

¹⁵ Unai malu' mapyoron fu' ngyef asus, ɗak si hal laha munjengani ta fit ima ni, “Kaitat ti naya ti hat ii kaitat i Deembai amukan hu Kristi ames, ma wa masti kaitat i myan hu myan.”

¹⁶ Unai tabwa' hure apil tau ɓarasi, ima sima amun si kunggwal i kaitat ames hai ta wei i DeeƁwe, si fur ta mabel i DeeƁwe, si cus afut.

¹⁷ Sin nyai, “Ni palanga, Deembai DeeƁwe Mambaitat shak, ha ima ha mii mwashi, ha mii hwer, ɓurti andok ama mbai tuu fur cwai ti kaitat.

¹⁸ Ramam si mas futut, futut ama yes. Myan i tot ti ɓur si som ima si mwat ru, hu tal ti som shit hu yarai ama myatat, hu som sapai, hu ima si mwen asum asa fo, shak mbai ta mavaati, hu rafat ti ima si rafat naya ya.”

¹⁹ Unai Wur i DeeƁwe ta fit maɓu ya, si ɗing akwati i dakwa ames ta wii i Wuri. Ɗak kyel ti nzilwit, ti ndo, ti taɗas, fisha ti ro, mbayai i siir si ndaak.