Matkof i Yeso Ta Kyel i Jwon 10 - Findel i DeeƁwe Ti Alis i Ron

Malu' i DeeƁwe hu Foti Kaada

¹ Unai i ɗing mbai malu' yis muɗor ta fit. Ri' vohus ya, munggargaɗing yit ta hai yusti, shishat ames tehus fota ɓwe, sisai ames fota cijai i man.

² Yis ti foti kaada nin ta ra ames awuri. Ti' sai i ucwa ames ya ta yiir wi, kin sai i ukutyal ames ta fisha.

³ Gu' raafo ti la mbai fota ndurum i kukum. Myan ima tutol laha i bara pyoron si taɗas.

⁴ Myan ima bara pyoroni si findel, yin ɓweti worongi, unai i hal la nin ta fit ti findel nyai, “Lisa aɗeng ima bara pyoron ani si laki, ka ha worong kwa.”

⁵ Unai malu' ima i ɗingi mangra si yiir hai, hu si fisha hai ha' ra i ucwa ames wa fit.

⁶ Shiɗat ti yis ima mii mapweti i myan hu myan, ima lan fit hu shak ɗamam ima sita wii, hu fisha ta shak ɗamam ima sita wii, hu yiir hu shak ɗamam ima sita wii. Malu'i ni, “For ti myan ya mana hwak kwa!

⁷ Ta mukonan ima malu' ma pyoroni yis ɓweti fu' ti ngyef asus, ɗam manggyongi i DeeƁwe si wa hya, fota ngga' ima lak som i ro ames som shit.”

⁸ Unai la tima ai i hali ta fit andi ti hum findel sun i hai nyai, “Ɓwa ha ha' kaada tya tima awuri ta ra i malu' ima ma mangra si yiir hai hu fisha ani.”

⁹ Unai i wa i lak malu'i ɓa u fan foti kaadai, unai nyun, “Mata ha cu, ti wa ɓolat ta ɗar ama, ta fo yati ti wa mimyat fota wan.”

¹⁰ I ha' foti kaadai ta ra i malu'i i cu ya, mimya fota wan. Takfai tima i ɗul, ɓolus na ɗar.

¹¹ Unai si lakun nyai, “A kpang ha lak findelal i som shit i hai, si hai i ɗufal hyang, hu ramam, hu alisas hu kaya.”