Matkof i Yeso Ta Kyel i Jwon 1 - Findel i DeeƁwe Ti Alis i Ron

Ɓwaiya

¹ Kaada moti ti mati ɗamam ima DeeƁwe fa Yeso Kristi, ɓa u kof yarai ames aɗeng ima a kpak u fur fisha. A DeeƁwe kin malu' ɓa u kof yere ames Jwon,

² a yis lak shak ɗamam ima ɗingi ya kparara. Mai a findel i DeeƁwe hu findel i mwawei i Yeso Kristi.

³ Disyo' ma si shak maɗufal ima mbe' worong ima si lak i mashit mai ta wei i ɗufal, disyo' ma si shak ɗufal ima si hali, si kin aɗeng ima si worongi ta mulut ɓurti myan si kat ndyong.

Too'

⁴ Kaada moti ii ta kyel Jwon, wa kyel i cotat pyoron ta ta' ti Asya. Mal maɗesi hu mute cala u te akul hu hun, ta kyel i yis ima mii mwashi, hu ima ai, hu ima ma yes, hu ta kyel i rinan pyoron ima si mii ta kyel i makunggul ames,

⁵ hu ta kyel i Yeso Kristi, shit amen ma mwawei, al i bya' saa ti som ima si luktus fit ta mot wi, makaitat si hai i kaya i naya. Kristi ɓwet kan, shu wash ya ɓa u cat kan ii ra ta mafwashani wi.

⁶ Ayis kin ka te ii som i kaitat hu som i kocok i ro i DeeƁwe hu Dees, cinjangat hu andok i myan hu myan wa kyel ames! Aandi.

⁷ Ɗing huni, ma yes ta ri' wii, shak ɗufal si wa ɗingsus, ta som ima si torusi, shak ramam i naya si wa shaat ɓursus. Ɓa u te andi! Aandi.

⁸ Deembai DeeƁwe lak ni, “Ayin a Alfa hu Omega, i mii Bya' hu i Dala, i mwashi, hu i ma ai, hu ima ma yes, yis a Mambaitat Shak.”

Andek Fota Al i Maɗufal

⁹ Ayin nusu Jwon, myu ima ka woti shum tikul saa ti kaitat hu ka'ti agung i rwish ya ima a amukan saa ti Kristi. Si zanun si hwitun ya ta rus i Patmos ɓurti findel i DeeƁwe hu findel ima i lak si Yeso hai.

¹⁰ Mwen ti Deembai, yin ta saa ti Rin wi, i hal la nin yit kawa fota la ti ngyef na takfai yunti.

¹¹ Lai ti ni, “Woronga aɗeng ima ha ɗingi si kaada hai, ha tuk wa kyel suɓut i som koltifai ta ashwaha pyoron, wa Afisa, wa Simirna, wa Pegamum, wa Tyatira, wa Sardis, wa Filadelfya, hu wa Lawudikya.”

¹² I hatat ɓa i ɗingi awe ma findel sun ɗak. Myan ima i hatat i ɗing kwetlengang i pitila pyoron i ugbwirik mujuwi.

¹³ Ta saa ti kwetlengangi i ɗing ɗeng “fota al i maɗufal,” ru' ndii ti fagin musyai ti ɗor wa sisai ames, hu fata' i ugbwirik mujuwi ta fajin ames.

¹⁴ Sya i hai ames si pipel syak fota fyu, ii ma pipel fota han ti fo', shishat ames fota alis i man.

¹⁵ Sisai ames si te fota shitam ima nzyu ta wii man wi, la asus ti lang ya kalalal fota rufwish i ham.

¹⁶ Ta ra i ucwa ames, mati ɓyar pyoron, ta fo ames wi, awal macui ma fo apil lang ya ta. Shishat ames cinjang fota muka' i ɓwe na ti ru ta sai hai.

¹⁷ Myan ima i ɗingus, i fur ta mabel ames fota funat. Unai kinun ra i ucwa ames hai, nyun, “Ka ha mwen kwa. Ayin i mii Bya' hu i Dala.

¹⁸ Ayin a Mapweti ani! Ai i mot, ɗing huni i mii mapweti myan hu myan! I mati mbaitat si mot hai hu kyel i som lu'.

¹⁹ “Mwashi woronga ɗamam ima ha ɗingi, aɗeng ima ma mufur mwashi, hu ima ma wa mufur yes wei.

²⁰ Ɗamam ima si ta mufot wi i ɓyar pyoron ima ha ɗingi ta ra i ucwa amen, hu kwetlengang i pitila pyoron i ugbwirik mujuwi ani a yis mai, ɓyar pyoron ani, a sin si mii som lu' i suɓut i som koltifai kikyal pyoron, hu kwetlengang i pitila pyoron ani, a sin si mii suɓut i som koltifai.