Muro Maɗesi tasi Yeso ima Mak Worong 9 - Findel i DeeƁwe Ti Alis i Ron

¹ Yeso lakus ni, “I ma laksu mwawei, shini ima sima mangra nati si wa ɗing ti kaitat i DeeƁwe yis yes ti andok ames tawe, ɗak si mot.”

Ɗashen i Yeso

² Takfai i mukon taan, Yeso zan Pita, hu Jemis, hu Jwon, watus ta hai mbai anggash. Unai lo' i Yeso shenus ta wei ames.

³ Arom ames si nzyu ya si pipel syak, ɗeng ndok ɓa u saya si pipel andi na naya kwa.

⁴ Iliya hu Mosis si pwak ya ta kyeli, sin findel ti Yeso.

⁵ Pita lak Yeso ni, “A makofiti, mute amukan nati ɗat. Ka mas bukak ataat, asa andek, ti Mosis andek, ti Iliya andek.”

⁶ Pita hu myayus, myanat ti ka'us fwet, shang aɗeng ima ɓa u lak kwa.

⁷ Unai ɓwar nin pwak ya vohus ya, ɗak la nin ta ɓwari wi ti ni, “Mai a Al amen ima i ɓwet sus fwet. Hal hun yus!”

⁸ Myan andek si ɗing kyel tarara, si hum ɗing ti ɗeng kwa, a Yeso je yis akul hu sin.

⁹ Si te muɗor ya ta si anggashi, Yeso dulus mwal nyai, myan ima Al i Maɗufal luk fit ta mot wi tawe, ɗak hu lak.

¹⁰ Si ka' ɗamam mii ta mulwat yus ti, sin mataa i hai nyai, “Ami mii ‘muluk fit ta mot ya?’ ”

¹¹ Si lul ta Yeso nyai, “Ami kin som kofiti si anggut hai si ni, a kpang Iliya u tong yes ya?”

¹² Yeso matussi ni, “A mwawei, Iliya ma mutong yes ɓa u ɗak ti ɗamam ta shak tawe. Ɗak ami kin si worong nyai, a kpang Al i Maɗufal u wo shum si nggwetus ya?

¹³ I ma laksu, Iliya tuu yes, tisi masus ɗamam ima sima ɓweti, ta ngga' ima si worong si yis hai.”

Yeso Ngga Rin Mafwashi Ya Tasi Al Hai

¹⁴ Myan ima si humkyel, si ɗing male' i ɗufal hu som kofiti si anggut hai si vo anggum i som koltifai amesi ya, sin uɓet tikul.

¹⁵ Tasi myan ima ɗufal si ɗing Yeso, si shok na fwai fwet, si tital si wa too' sus.

¹⁶ Lulus ni, “Ami lang ima huma uɓet tikul hu sin ya?”

¹⁷ Maɗufal nin ta saa ti suɓuti matussi ni, “A makofiti, i kola al amen ima rin mafwashi langus hai, shahus findel.

¹⁸ Myan ima rin mafwashii si luk fit, hwyai tus ya ta fisha, yis but ti lyau ta fo, yis nggwaran ti anggurai u njeng ratat. I lak som koltifai ama ɓa si ngga rin mafwashii ya, si mba wet.”

¹⁹ Yeso matussi ni, “Hun waya mii, ima hu fa mwawei kwa, som i masti mafwashi! I wa mute akul hu hun wa nggi myani ya? I wa ka'ti mulut ti hun wa nggi myani ya? Yehun ti ali nati.”

²⁰ Unai si kolus ali. Myan ima rin mafwashii ɗing Yeso, fo abet zan ali mati kyel ta fisha tehus ratatat yis ɓwiring, yis but ti mabwatat ta fo.

²¹ Yeso lul ta dees i ali ni, “Ɓo masti mai a tami ya?” Matussi ni, “Ii tasi myan ima si alus.

²² Ndwak u zanus u hwiti ta man wi hu ham ɓa u forus ya. Na ha shang ɗama i masi, ɗinga shum asinin ha bum nin.”

²³ Yeso matussi ni, “Ami mai ha laki ya, hama nyai, ‘Na ha shang aɗeng i masi ya?’ Ha shangi shak ɗamam si wa mas ta kyel i maɗufal ima fa mwawei.”

²⁴ Fo abet dees i ali matussi ti njeng ni, “I fa mwawei! Bumana ɓa i ɓin njeng i munggwya i fati mwawei amen!”

²⁵ Myan ima Yeso ɗing ɗufali sin titalal yes kyel ames, unai lak rin mafwashii ɓin nyai, “Ha rin i mandu' i ma laksa, langa ya na al mai wi, kan ha hum mulang sus hai kwa fweng.”

²⁶ Rini mat shaat, zan ali sere' ti kyel ta fisha. Ali katus ta fota funat, ɗufal si ni, “Tuu motus.”

²⁷ Shak ta andi, Yeso ka' ra ames zanus fit, ɗak te mangra.

²⁸ Takfai tima Yeso lang ta wur, unai som koltifai ames si lulus nyai, “Ami kin nin ni shang nggati rini ya kwa ya?”

²⁹ Matussi ni, “Mai musuti ma wa mulangya, a ta fisel ti fwal ti DeeƁwe je.”

³⁰ Unai si hon kyeli si sa ta ta' ti Galili. Yeso ɓwet ɓa ɗeng u shang kyel ima si mata kwa,

³¹ ɓurti ai yis kofti a som koltifai amesi je. Lak findel ta hai yusti nyai, “Si wa fati Al i Maɗufal ɓa si cu han ames ta ra i ɗufal, si wa for sus ya. Takfai ti mukon ataat ma wa muluk fit.”

³² Si ka' hai i maɗeng ima ma laki kwa, sin yus myanat i lul ti hai i findeli.

Awe mii Mbai Ya?

³³ Si yes Kapanahum. Myan ima yis ta wur, Yeso lulus ni, “Ami ɗin hun uɓet i hai ta fisel ya?”

³⁴ Si tes cakat ɓurti sinin uɓet ta fisel nyai, “Awe mii mbai na saa kan ti ya?”

³⁵ Unai te amun ɗak lai mulang apilli nyus, “Na ɗeng yis ɓweti mute ii bya', a kpak u te ii dala, hu mamuro i shak.”

³⁶ Unai zan al al nin, kinus Tasa asus, ɗak ka'i ta fajin ames nyus,

³⁷ “Shak maɗufal ima mat al al mai ti asum a sun, matun ayin ndai. Shak maɗufal ima matun, ayin je matun kwa, mat a yis ima rohun.”

Maɗufal ima Ma Ha' ti Wei ti Kan Kwa Amukan

³⁸ Jwon ni, “A makofiti, ni ɗing maɗufal nin yis nggati rin mafwashi ya ti asum a sa. Ni lakus ɓa u hon, ɓurti andek na saa kanti kwa.”

³⁹ Yeso nyus, “Ka hu shahus kwa. Ɗeng ma wa masti ɗama i shok na fo ti asum a sun, ɗak humkyel u lak mafwashi na hai amen kwa.

⁴⁰ Shak maɗufal ima ma ha' ti wei ti kan kwa, amukan.

⁴¹ I ma laksu mwawei, shak maɗufal ima fu cunjo i ham ti sum i Kristi, a kanggang ma wa wis ti mal amen.

Kinti Masti Mafwashi

⁴² “Kan ɗeng kin andek na saa ti fe muyayi ima si fa mwawei mii u mas mafwashi kwa. Na masi andi, mayus wa mute hai ti mbwesh, si no'us afung ti nuk ta la, si hwitus ya ta yiir wi.

⁴³ Na ra ama yis kinsa masti mafwashi, lefa ya. Ma ya wa mute hai ti mbwesh ha lang ta mupwet wi ti ra andek, hu ima ha lang ta wur i man ti ra apil.

⁴⁴ A ta kyeli, ‘Rundwas ames si mot kwa, mani hwak mwat kwa.’

⁴⁵ Na sai ama ma wa kinsa masti mafwashi, lefa ya. Ma ya wa mute hai ti mbwesh ha lang ta mupwet wi ii gundung, hu ima si hwita ta wur i man ti sisai apil.

⁴⁶ A ta kyeli, ‘Rundwas ames si mot kwa, mani hwak mwat kwa.’

⁴⁷ Na a shit asa tiwa kinsa masti mafwashi, re'a ya. Ma ya wa mute hai ti mbwesh ha lang ta Kaitat i DeeƁwe ti shit andek, hu ima si hwita ta wur i man ti shishat apil.

⁴⁸ A ta kyeli, “ ‘Rundwas ames si mot kwa, mani hwak mwat kwa.’

⁴⁹ “A ti man si wa sapa ti ɗufal ya shak, fota ngga ima si sapa kuna ya ti amma.

⁵⁰ “Amma a ɗama maɗesi, na ammai mimya kwa, si wa masi atini u mimya ya? Mute ti ɗiyai amu u te fota ngga' ima mimyat i amma mata. Tehun cala ti ɗiyai amu.”