Muro Maɗesi tasi Yeso ima Mak Worong 8 - Findel i DeeƁwe Ti Alis i Ron

Yeso Cut ti Ɗufal Nggal Ɓaras

¹ Si mukonan ani, male' i ɗufal si suɓut, si ti cwa i cwai kwa. Yeso lai som koltifai amesi yes kyel ames nyus,

² “I ɗing ti shum i ɗufal mii, ɓurti mukon ataat mai sin na kyel amen, kaciwa' ɗama i cwai.

³ Na i ti'us ya ɓa si wa wur ti hwem, si wa fwaran na fisel, ɓurti shini na saa yusti, si ti maleng.”

⁴ Som i koltifai amesi si matussi si ni, “Awe ma wa wisti folok ima ɓa si cu, na ya nati ya?”

⁵ Yeso lulus ni, “A folok awen hu mati ya?” Si matussi si ni, “A pyoron.”

⁶ Lak ɗufali ɓa si te amun ta fisha, zan foloki, palang DeeƁwe, nggyal, fa som koltifai ames ɓa si kaar ɗufali, si masi andi.

⁷ Si mati al gushe nin ndyong, hum palang ti DeeƁwe ɓur sus hwak, ɗak lak som koltifai ames ɓa si kar hwak.

⁸ Ɗufal si cu si kaf, ta takfai som koltifai amessi si har puɓus ima si kat ta cetat pyoron kyalak.

⁹ A arya nggal ɓaras si ta kyeli. Ɗak ti'us ya,

¹⁰ langus ta kwang i ham hu som koltifai amesi, wis ta' ti Dalmanuta.

¹¹ Farisiyawa si yes si fur masti Yeso lulal, ɓa si mbahus, si nyus ɓa u masus ɗamam i shok na fo ima ɓa u kof andok ames.

¹² Unai dul lafos munggyongi ɗak nyus, “Ami kin ɗufal i mwashi si far ti ɗing ti ɗamam i shok na fo ya? Ima laksu mwawei, i wa kofti ɗufal i mwashi mi ɗama i shok na fo kwa.”

¹³ Unai honus, hum mulang ta kwang i ham, pis fiti.

Yisti i Farisiyawa hu i Herod

¹⁴ Som i koltifai si nitima si yes ti folok kwa, a andek je si mati ta kwang i hami.

¹⁵ Unai dulus mwal ni, “Kam huni, mbe' hun ti yisti i Farisiyawa hu Herod.”

¹⁶ Si at si mai hai shak asussi, ɗak si ni, “Lak mai, a ɓurti kama ti folok kwa.”

¹⁷ Yeso shang aɗeng ima si laki, unai lulus ni, “Ami kin hu findel si folok hai ya? Huma ɗingi a hun hu shangi kwa ya? A hun hu njeng na hai waak?

¹⁸ Hu mati shishat hu ti ɗing ti kyel kwa, hu ti mwal hu ti hal ti findel kwa haa? Hu mbe',

¹⁹ myan ima i nggyal folok hara ɓurti ɗufal nggal hara haa? A cetat awen hu har puɓus ima kata ya?” Si matussi nyai, “Hure mulang apil.”

²⁰ “Myan ima i nggyal folok pyoron ɓurti ɗufal nggal ɓaras, a cetat awen i puɓusi hu har ya?” Si matussi nyai, “A Pyoron.”

²¹ Lakus ni, “Hu shangi kwa yes mwash haa?”

Yeso Fa Manzyau i Betsaida Cala

²² Myan ima si ru Betsaida, shini ɗufali si kolus manzyau nin, si fwal Yeso ɓa u ngge'us.

²³ Unai Yeso ka' ra i manzyauwi langtus ya ta ashwai. Tuf lyau ta shishat i maɗufali, ɗak kinus ra hai, Yeso lulus ni, “Ha ma ɗing ti ɗamanin haa?”

²⁴ Manzyauwi ɗing kyel ta fit ɗak ni, “I ma ɗing ti ɗufal sin fota yitat ima si nggaari.”

²⁵ Yeso hum kinti ra ta shishat i manzyauwi, unai shishati si matɓuya, si ɗing kyel, si ɗing ɗamam ndere.

²⁶ Yeso tukus wa wur yis nyai sus, “Ka ha lang ta ashwa kwa.”

Findel i Pita si Yeso Hai

²⁷ Yeso hu som koltifai ames si wa ta ashwa i nggas ti Kaisarya Filipi. Sin ɗiri ta fisel lulus ni, “Ɗufal si nyai yin aweya?”

²⁸ Si matussi si ni, “Shini si nyai, ha a Jwon Mabatisma, anggumi si ni, ha a Iliya, shini hwak si ni, ha a mashit i DeeƁwe nin.”

²⁹ Lulus ni, “Hun hee, hu nyai yin aweya?” Pita matussi ni, “Ha, a Kristi.”

³⁰ Yeso dulus mwal kan si lak ɗeng ɗama si yis hai kwa.

Yeso Lak Musut i Mot ima ma wa Masi

³¹ Unai fur kofsus ti nyai, a kanggang yis, Al i Maɗufal u wo shum si ɗamam hyang. Kaya hu mbayai i kocok hu som kofiti si anggut hai si tus wa munggwya, a kpak si forus ya. Shak ta andi, takfai ti mukon ataat ma wa muluk fit hwak.

³² Lakus findel mai rasman ta wei i ɗufal hyang, unai Pita dulus hyer tus ya si ɓwai ɗak lakus ɓin.

³³ Myan ima Yeso hat tifai ɗing som koltifai amesi, lak Pita ti ɓin nyus, “Herana ya ha Shatan! Ha hama mbe' ti a ɗamam i DeeƁwe kwa, a ɗamam i ɗufal kek.”

³⁴ Unai lai ɗufali hu som koltifai amesi yes kyel ames ɗak nyus, “Na ɗeng yis ɓweti u kolfai asuni, a kanggang u ɓwinggil hai asus, u ha' shanggam ames u koltifai asuni.

³⁵ Shak maɗufal ima wis mupwet asus, ma wa duni. Shak maɗufal ima dun mupwet asus ɓursun, ma wa wisi.

³⁶ Ami ma wa ɗat na maɗufali wis naya shak, ɗak dun mupwet ames ya?

³⁷ A hun ami maɗufal ma wa fai ii fo i mupwet ya?

³⁸ Na ɗeng yis shusho amen hu findel amen, na saa ti ɗufal ima sima arak i zuruk hu mafwashi mai, Al i Maɗufal ma wa shusho si yis hai hwak, myan ima ma wa yes ti mbaitat i dees hu som lu' ames masapai.”