Muro Maɗesi tasi Yeso ima Mak Worong 7 - Findel i DeeƁwe Ti Alis i Ron

Saiya hu Kaciwa' Saiya

¹ Farisiyawa hu som kofiti si anggut hai ima si yes ta Yerushalima, si suɓut si nggar Yeso ya ta saa.

² Si ɗing shini ta saa ti som koltifai asussi sin cwai ti cwa kaciwa' sati ra ya, ima si lai ii, “kaciwa' sapai.”

³ (Sin Farisiyawa hu shak som Ju si cwai cwa kaciwa' sati ra ya kwa, lakan ames kofusti andi tasi som i ɓele ames.

⁴ Na si humkyel ta matof, si cwai cwa kaciwa' sati ra ya kwa. Si ti lakan hyang ima si mat ta kyel i som i ɓele, fota sati cunjoha ya, hu ɓyalang, hu lungai.)

⁵ Unai Farisiyawa hu som kofiti si anggut hai, si lul ta Yeso si ni, “Ami kin som koltifai ama si masti mute i lakan i kaya kwa ya? Si cwai ti cwa ames ti ra, ‘kaciwa' sai ya.’ ”

⁶ Yeso matussi, “A kiga' Ishaya ai lak findel i som shit na hai yuti, hun som rere, fota ngga' ima worong ta, “ ‘Ɗufal mii sima fasun ngye ti a ɓwish ames kyek, mulwat ames mas maleng ti yin.

⁷ Si cwaisun afut a gbya', kofiti ames, a lakan ima si kofi a laki i ɗufal kyek.’

⁸ “Hu hon laki i DeeƁwe, hu ka' lakan i ɗufal.”

⁹ Lakus ni, “Hu shingat fwet ima hu zan findel i DeeƁwe hu kin ya ta ɓwai, ɓa hu kin mulwat tasi lakan i ɗufal hai!

¹⁰ Ma fota ngga' ima Mosis lak ta, ‘Fa dya hu nasa ngye,’ hu ‘Shak maɗufal ima se' dees ahun a nasus, a kpak si forus.’

¹¹ Shak ta andi, hun hu ni, a kiga' ɓa ɗufal si lak hu dees hu nasus si ni, ‘Shak bum ima hu nin wa mati na kyel amen, hu wa wisi kwa, ɓurti tii fa DeeƁwe ya.’

¹² Unai hu honus ɓa u bum dees ahun a nasus ti ɗama kwa.

¹³ Ɓurti andi hwak hu kin findel i DeeƁwe tes i ɗama i gbya', a lakan amu ɓin shak. Hu mas ɗamam hyang fota mai.”

¹⁴ Unai Yeso hum lai ti ɗufal ta kyel ames, ɗak ni, “Hal huna shak asui, ɓa hu ka' mai ta hai.

¹⁵ A cwa ima ha kin ta fo ama kyan ha te ‘kaciwa' sapai’ kwa, a aɗeng ima lang ya ta mulut i maɗufal, kyan u te ‘kaciwa' sapai.’ ”

¹⁶ Maɗufal ima mati mwal i hali, u hali.

¹⁷ Takfai tima hon ɗufali, lang ta wur. Som koltifai amessi si lulus mangga' i kaani mai.

¹⁸ Lakus ni, “Hun hwak hu ka' mai ta hai kwa haa? A cwa ima ha kin ta fo ama kyan ha te ti ‘zuruk kwa.’

¹⁹ Ɓurti laang ii ta mulut ama kwa, a ta ɗar ama kyek, u lang ya.” Ti lak ti mai, Yeso ni shak cwaha si mati “sapa.”

²⁰ Unai cu wei ti nyai, “A aɗeng ima lang ya ta mulut i maɗufal a yis kyanus u te ‘kaciwa' sapai.’

²¹ Ɓurti shak ɗamam mii si yias ii ta wi i mulut i maɗufal, ambe' mafwashi, arak i zuruk, shir, hu for ti maɗufal, hu raki hu mbor ti ɗeng,

²² komam, muk, yok, dang, se', ngye na hai, hu halngyat.

²³ Shak ɗamam mafwashani mii si yes ii ta mulut, a sin si kyan maɗufal u te ‘kaciwa' sapai.’ ”

Fati Mulut i Mbor ta Surofinikya

²⁴ Takfai ti andi, Yeso hon kyel ani wa ta' ti Taya, wa lang ta wur nin, ɓwet ɓa ɗeng u shangi mata wuri kwa. Shak ta andi, ɗufali si shangi mata wuri.

²⁵ Fo abet mbor nin tima al asut mu vaati ti mati rin mafwashi, ti hali Yeso mata wuri. Ti wa ti fur ta mabel ames,

²⁶ ti fwalus ɓa u re' al asut rin mafwashii ya. Mbori a moti Girik, si alut ta ta' ti Surofinikya.

²⁷ Yeso nyut, “Hon shi fe si kaf tawe, ɓurti a kiga' si fa kyara cwa i fe kwa.”

²⁸ Ti matussi ti ni, “Angga'i nai a Deembai, shak ta andi, kyara si cwai anggum i cwa i fe ima ndaak ta fisha.”

²⁹ Unai nyut, “Ɓurti muro maɗesi amesh mai, ɓwishush wur, rin mafwashii tuu hon al ashushi.”

³⁰ Unai ti wit wur, ti wis al asut yit raki ta kyel marak, ma rin mafwashii tuu wis.

Yeso Fa Mandu' Cala

³¹ Unai Yeso hon Taya wa Saidon, ta fo Yiir i Galili, hu ta' ti Dekapolis.

³² Ta kyeli, ɗufal shini si kol Yeso maɗufal nin ima a mandu', hu findyal kwa, si fwalus ɓa u kin maɗufali ra hai.

³³ Takfai tima Yeso her ti maɗufali ya ta ɓwai, ɗak ti' fe i ra ames ta mwal i maɗufali, tuf lyau ta foti ra ngge' ti alis ames.

³⁴ Yeso ɗing kyel ta fit dul lafos, ɗing shum asussi ni, “Efata” ma nyai, “Matɓu ha!”

³⁵ Fo abet mwal i mandu'i si matɓu, alis ames mahwet fur findel kparara.

³⁶ Yeso ni hus kan si lak ɗeng kwa. Shak aɗeng ima lak, te fota ni ɓa si cu wei ti buti ndai.

³⁷ Ɗufal si jakak fwet ta shok na fwaiyi nyai, “Mas shak ɗamam ames ndyas! Ɗing huni, mandu' hal findel ɗak mandu' findel kparara.”