Muro Maɗesi tasi Yeso ima Mak Worong 6 - Findel i DeeƁwe Ti Alis i Ron

Mashit Kaciwa' Ngye

¹ Yeso lang ta kyeli wis ashwa ames, som koltifai asussi sin tifai.

² Myan ima Mwen ti Lafos ti ru, fur kofiti ta mare. Ɗufal hyang ima si halus yis kofiti, si shok na fwai, sin luli nyai, “Maɗufal mai wis ɗamam mii ii ta leya? Awe fas musut i pirisi mai, ima ma masti ɗamam i shok na fo ati ya?

³ Ka nyai a al i manggwak ti kikyal ani hoo? Mai a al i Uryam ima shunus a Jemis, hu Josep, hu Jud, hu Siman kwa haa? Shunus murwafi sima tikul hu kan kwa haa?” Unai si nggwetus.

⁴ Yeso lakus ni, “Mashit wyas ngye ta kikyal shak, a ta ashwa, hu gung, hu wur ames je, wyas ngye ta kwa.”

⁵ Wis njeng i masti ɗamam i shok na fo nin ta kwa, a ndyong je ima sima kaciwa' cala kinus ra hai, si wis cala.

⁶ Yis hwak aɗengi fas shok na fo ti ngga' ima si nggwes i fati mulut ta. Unai Yeso yis nggaari ta hweng wa hweng yis kofiti.

Yeso Ro Hure Mulang Apili

⁷ Lai mulang apili yes kyel ames, ɓa u rohus apil-apil, fas mbaitat ta si rin mafwashi.

⁸ Lakus findel mai ni, “Kan hu zan ɗama i wa ɗa'at kwa, kan hu zan folok, hu rukul, hu mala i cef kwa, a cwang je hu wa zani.

⁹ Ru' hun kpakasak, ka hu har faginan apil kwa.

¹⁰ Shak wur ima hu ɗorkyel ta, tehun ta kyeli yes mwen tima hu wa honti ashwai.

¹¹ Shak kyel ima si matu ta kwa, ahun si halu kwa, tabwathun ɓura i sisai amu ya hu wu, ɓa u kof si nggwes i halsu.”

¹² Andi si lang ya, sin mba findel i DeeƁwe nyai, ɓa ɗufal si hatat.

¹³ Sin nggati rinan mafwashi ya ta ɗufal wi, sin fyal ti som i kaciwa' cala hyang mbar sin wis ti cala ames.

Si De' Hai ti Jwon Mabatisma Ya

¹⁴ Ai Makai nin ma asum Herod, hal ɗamam ima Yeso masi, ɓurti asum i Yeso kawa ta kikyal hyang. Shini sin nyai, “A Jwon Mabatisma luk fit ta mot wi, a yis nai kin ma masti ɗamam i shok na fo mai.”

¹⁵ Anggum i ɗufali si ni, “A Iliya.” Shini hwak si ni, “Mai a mashit i DeeƁwe, fota andek ta saa ti som ima ai i hwer.”

¹⁶ Myan ima Herod hal mai, lak ni, “A Jwon ima i de' hai ames ya, a yis luk fit ta mot wi!”

¹⁷ Ai, Herod ti haisus, ro muro ɓa si ka' Jwon si no', si kin ta wur i shitam. Mas mai ɓurti ai, kunggo Uhirodya mbor tima ai ti nusus Filip.

¹⁸ A aɗeng ima kin nai, Jwon lak Herod ni, “Le' ɓa ha kol mbor ti nusa.”

¹⁹ Uhirodya ti ka' Jwon ta mulut, yit ɓweti for sus. Kaciwa' kinti ra i Herod, ti wis njeng kwa,

²⁰ ɓurti Herod ma fwang ti Jwon. Ma myanatsus fo ɓurti shangi Jwon a manderei hu masapai. Myan ima Herod hal Jwon ringus ti ambas, shak ta andi ɓyat ɓa u halus.

²¹ Ta dala Uhirodya ti wis kyel. Mwen i mbe'i ti al i Herod ti ru, unai ɗi got. Lai kaya, hu mbayai i som ɓwol, hu mbayai i ɗufal i Galili.

²² Ta kyel i gotti, al ti Uhirodya ti lang ador, ɗat Herod hu mwalmwat ames ta si ɓwi. Unai Makai Herod lak ali ni, “Lul shi shak aɗeng ima shima ɓweti i wa fashush.”

²³ Unai fat kintiɓwi ti shiɗat nyai, “Shak aɗeng ima shi lulun i wa fashush, ima kol ɓwai i kaitat amen.”

²⁴ Ti lang ya ti wa kyel i nasut ti nyut, “Ami i wa luli ya?” Unai ti matuti ti ni, “Hai ti Jwon Mabatisma tasi kunggwang hai.”

²⁵ Fo abet ali ti humkyel ta kyel i makaiyi ti ni, “I ɓweti ha fan hai ti Jwon Mabatisma tasi kunggwang hai mwashi.”

²⁶ Lo' i makaiyi tidyas ti mai findeli. Ɓwet ɓa u nggwes i hya ti aɗeng ima lak kwa, ɓurti shiɗat ima masi ta wei i mwalmwat ames.

²⁷ Fo abet ro al i muro ames ɓa u de' hai ti Jwon. Unai lang ta wur i shitam de' hai ti Jwon,

²⁸ yes ti tasi kunggwangi hai, fa ali, ɗak ti fa nasut.

²⁹ Ti hal ti aɗeng mai, som koltifai ti Jwon si wa si zan funati, si lai.

Yeso Cu ti Ɗufal Nggal Hara

³⁰ Takfai tima Som Muro i Yeso si humkyel, si mbas shak ɗamam ima si masi hu ima si koftii.

³¹ Unai Yeso nyus, “Yehukan ka wa si ɓwai ɓa ka lafos.” Yis lak mai, ɓurti ɗufal hyang ima si yes ta muhumkyeli si shas wis ti myan i cwai ti cwa.

³² Unai si rang ta kwang i ham si wis ta kyel ima ɗeng mata kwa.

³³ Shak ta andi, ɗufal hyang ima si ɗingus sin mulangya, si shangus, si rang ti titalal i sisai ta ashwaha, si tongus muru ta kyel ima si wa ta.

³⁴ Ti muɗorkyel i Yeso ta kwang i hami, ɗing suɓut i ɗufal hyang ta kyeli, ɗing shum asussi ɓurti si te fota tutwai ima si yus kaciwa' maɗingsus. Unai fur kofsus ti ɗamam hyang.

³⁵ Nasi myan mai, ango ti mas, som koltifai asussi si wa kyel Yeso, si nyus, “Kyel mai a ya, mwashi ango ti mas.

³⁶ Ti' hun ɗufal mii ya, si lang na ashwaha ima si na nggas mii, si juwil cwa si cu.”

³⁷ Unai Yeso matusi ni, “Hun fa hu yus ɗamanin si cu.” Si nyus, “Ni ti amiya? Aɗeng ima ma wa cwai ti ɗufal mii, a cef i ro i wil, ɗak cu tus!”

³⁸ Yeso nyus, “A folok awen hu mati ya? Ɓu hu ɗingi.” Myan ima si wa si ɗingi, si nyus, “A folok hara hu gushe apil.”

³⁹ Yeso lak som koltifai ames ɓa si kin ɗufali si te amunan si falan hai ti gikak-gikak.

⁴⁰ Andi si te amunan abet, shini ndik andek (100), shini hure hara (50).

⁴¹ Zan folok hara hu gushe apili, ɗing kyel ta fit, palang DeeƁwe. Unai nggyal foloki, fa som koltifai amesi, si kaar ɗufali. Andi hwak kaar shak ɗufali gushei.

⁴² Ɗufal si cu si kaf shak asussi.

⁴³ Som i koltifai ames si har ruruk i foloki hu gushei ima kati, kol cet hure mulang apil.

⁴⁴ A arya nggal hara si cu foloki.

Yeso At si Ham Hai

⁴⁵ Fo abet Yeso kin som koltifai ames, ɓa si lang ta kwang i ham, ɓa si cu wei ti wa Betsaida, yis u ti' ɗufal ya tawe.

⁴⁶ Takfai tima honus, ɗu tasi ɓwai i anggash ɓa u fwal DeeƁwe.

⁴⁷ Ti ango fing-fing, kwang i ham yis ta saa ti yiir, Yeso kat ahwesi ta fisha.

⁴⁸ Ɗingus sin mba ti tuk ti kwang i hami wet, ɓurti se manjengi mayus sha ti ɗa'at. Myan ima mwen ti kat ndyong ɓwai, unai wa ta kyel ames yis ati ta si hai i ham. Masi fota mayus mulang ii hai.

⁴⁹ Si ɗingus yis ati si hami hai, si ni ashang a malu' nin, si gu' raafo.

⁵⁰ Myan ima shak asussi si ɗingus, si langus ta wi. Fo abet findelus ni, “Kan hu mwen kwa! Ayin, rwish hun ya.”

⁵¹ Unai ɗu ta kwang i hami, ɗak sei kat ya. Si shok na fwai fwet,

⁵² ɓurti si ka' aɗeng ima Yeso masi ti folok ani ta hai ndere kwa, ɓurti njeng na hai ames.

⁵³ Myan ima si pis ta fit ashwa ti Jenesaret, si no' kwang i hami ya ta fit.

⁵⁴ Ti mulangya asus ta kwang i hami, ɗufal si shangi a Yeso.

⁵⁵ Si lang titalal ta ta'i, sin har ti som i mwatanan si ɗam i marak ames hai, sin yes ti shak ta kyel ima si hali mata.

⁵⁶ Shak kyel ima lang ta hu wi ashwa, mbai hu ali, sin kol sus som i mwatanan tasi lapanan hai ta matof. Si fwalus ɓa si ngge' fo i fagin ames kyek. Unai shak maɗufal ima ngge'us, wis cala.