Muro Maɗesi tasi Yeso ima Mak Worong 5 - Findel i DeeƁwe Ti Alis i Ron

Yeso Fa Maɗufal Marin Mafwashi i Garasi Cala

¹ Myan ima si ndok ta fo i yiir si pis fiti, wa ta' ti som Garasin.

² A myani Yeso ɗorkyel ta wii kwangi, unai mawangan nin ima hya ti rin mafwashi, lang ya ta wii fiyayai wa kyel ames.

³ Ai Mawangani yis yus tyayan ta kyel fiyayaiyi, ɗufal si mba no'sus ti shitam wet.

⁴ Si wo no'sus ti shitam ra hu sisai, shak ta andi u ɗwak shitami ya, awar i shitami ɗwak ya hwak andek-andek. Ɗeng ndok ɓa u masus ɗama kwa fweng.

⁵ Ngang fo' ta reni, yis ta fiyai hu ɗanggash, yis gwa'an ti rafo, yis mbwalangan ti lo' ya ti afyai.

⁶ Myan ima ɗing Yeso ta maleng, unai lang ti tital fur ta wei ames.

⁷ Gu' rafo ni, “Ami ama ta ti yin ya, a Yeso, Al i DeeƁwe Mambaitat shak? I fwalsa ɓurti DeeƁwe, kan ha fan shum kwa.”

⁸ Ɓurti Yeso tuu nyus, “Langaya na maɗufal mai wii, ha rin mafwashi!”

⁹ Unai Yeso lulus ni, “A asum ama aweya?” Unai matussi ni, “Asum amen a Male'i, ɓurti ni ma buu.”

¹⁰ Unai rini fwal Yeso ti ambas, ɓurti kan nggahus ya ta kyeli kwa.

¹¹ Nasi myan mai, shini sin ɗing ti nggishash hyang tasi fwere nin.

¹² Rin mufwashani si cu wei ti fwalsus nyai, “Tuka nin wa kyel i nggishash mii, hona nin ni langus hai.”

¹³ Unai ɓwet ɓa si lang ta nggishi wi, fo abet rin mufwashani si rangya ta maɗufali wi, si rang ta nggishashi wi. Nggishashi shak si ɗor ti tital si fwar ta yiir wi, si mwat ta wi. Nggishashi si kol nggal apil (2,000).

¹⁴ Som i ɗing ti nggishi si tital si lang ta ashwaha hu fo i fiselal, sin lak ti aɗeng ima wisus. Fo abet ɗufal sin rangya ɓa si ɗing aɗeng ima wisus si.

¹⁵ Ti yes ames ta kyel i Yeso, si ɗing maɗufal ima ai yis ti rin mafwashii. Yis amun ta mabel i Yeso, sok arom yis ta ambe' ames wi, unai myanat ka'us.

¹⁶ Som ima si ɗing aɗengi, si lak ɗufal ngga' ima ma rin mafwashi wis cala, hu ngga' ima nggishashi si rang ta ham wi.

¹⁷ Unai ɗufali si fur fwal ti Yeso ɓa u honus ashwa ames.

¹⁸ Myan ima Yeso yis mulang ta kwang i ham ɓa u wis, unai maɗufal ima wis cala ta wangani, fwalus ɓa si wa tikul.

¹⁹ Unai Yeso matussi kwa, shak ta andi nyus, “Ɓwa wur kyel i somma, ha lakus mbaitat i aɗeng ima Deembai masai, hu ngga' ima ɗing shum asai ta.”

²⁰ Unai maɗufali wa Dekapolis, lak mbayai i ɗamam ima Yeso masusi, ɗufal shak si shok na fwai.

Al Tima ti Mot hu Mbor Mumwatan

²¹ Yeso pis ta fit ti hwak ta wii kwang i hami, yis ta fo i yiiri, male' ɗufal si nggarus ya.

²² Unai mbai nin ta mare i DeeƁwe ma asum Jairus yis ta, ti ɗing ti Yeso fur ta wei ames,

²³ fwalus ti ambas. Yis nyai, “Al muvati asun tima fo i mot. Naɗin ha yes ha kinut ra hai, na ti wis cala ti pwet.”

²⁴ Unai si wa tikul hu Yeso. Male' ɗufal sin koltifai asussi, sin mbwa'an sus.

²⁵ Ta saa ti ɗufali, mbor nin ti ta, ai yit ti mwatan ima wash yis waya, ima kol wilyal hure mulang apil.

²⁶ Ti wo shum fwet, ta kyel i som fati manda, ti pun sufat amet ya. Shak ta andi ti njeng kwa, mwatani cus wei ti muɓal.

²⁷ Myan ima ti hal mangga' i Yeso, unai ti yes ti salmwe' ta ɗufal wi, ti ngge' fagin ames.

²⁸ Ti lak ta mulut amet nyai, “Na i ngge' fo i fagin ames kyek, i wa njeng.”

²⁹ Fo abet wash ima ai yis wayai, kat ya, ti hali ta lo' amet ti wis cala.

³⁰ Fo abet Yeso hali njeng nin lang ya ta lo' ames, hatat ti fai ta suɓuti wi ni “Awe ngge' fagin amen ya?”

³¹ Unai som koltifai ames si matussi si ni, “Ɗinga ngga' ima ɗufal si mbwa'an sa ta, shak ta andi ha nyai, ‘Awe ngge' un ya?’ ”

³² Unai Yeso hatat ɗing kyel tarara ɓa u ɗing maɗufal ima mas ani aɗengi.

³³ Unai mbori ti shang aɗeng ima wis sut, ti yes ti fur ta mabel ames, ti myanat, lo'i yis yus muro, ti lak kus mwawei ya.

³⁴ Unai nyut, “A mbor, fati mulut amesh fash cala, shi njeng ta shum amesh, shish yush wa ti murak i mulut.”

³⁵ Yis ɗiri ti findel, unai shini ta wur i Jairus mbai i mare i DeeƁwe, si yes si ni, “Al asai ti motut, kan ha fa makofiti mai shum kwa.”

³⁶ Yeso ra'us hal ti aɗeng ima si laki kwa. Lak mbai i marei ni, “Ka ha mwen kwa, Faha mulut kyek.”

³⁷ Hon ɗeng kolfai asussi kwa, wa ti Pita hu Jemis hu nusus Jwon.

³⁸ Ti muru ames ta wur i Jairus, mbai i marei, hali sin rafo, ɗeng yis hal ti ɗeng kwa.

³⁹ Lang ta wi nyus, “A ɓurti mi huma rafo hun kawayai ya? Al amoti ti mot kwa, tima ɗarak.”

⁴⁰ Unai si musas sus. Takfai tima nggas ya shak ta saikyel, unai ha' deet hu nasut hu som koltifai ames ima sima tikul, langtus ta kyel ima funat i ali mata.

⁴¹ Ka' ra amet nyut, “Talita kumi!” Ma nyai, “A foti al, ima nyai shush, luk shi fit!”

⁴² Fo abet ali ti luk fit ti at, si shok na fwai shak asussi. Ali a muwil hure mulang apil.

⁴³ Yeso lakus gbak-gbak, ka si lak ɗeng aɗeng ima si ɗingi kwa. Unai ni ɓa si fat cwa ti cu.