Muro Maɗesi tasi Yeso ima Mak Worong 4 - Findel i DeeƁwe Ti Alis i Ron

Kaani hu ma Ahan ma Alai

¹ Mwen nin ndai, Yeso fur kofiti ta foi yiir i Galili. Male' ɗufal si suɓut ta kyel ames, ɓurti hya i ɗufali, kyel ti twaha, kin Yeso lang ta kwang i ham te ta. Ɗufal si te tasi tur i foi hami.

² Yis kofiti si ɗamam hyang ti findel i kaani.

³ Ni, “Hal huni! Ma ahan nin wa lai ti musut ta yang.

⁴ Te ak ti musuti, shini si fur ta fisel, avyash si yes si tang ya.

⁵ Shini si fur ta afyai wi, kyel ima mati ta' hyang kwa, fo abet musuti ɓu, ɓurti ta'i mayus tashkalak.

⁶ Myan ima ɓwe ti ka', ɓurti si mati sisyar kwa, a o i ɓwe ngyesh ya, si shokus.

⁷ Shini musuti si fur ta aren wi, areni luk fit zure' us ya, ɓurti andi si shu fe kwa.

⁸ Shini si fur tasi ta' maɗesi hai. Mii si ngye si al, shini si wis karat maɗesi, anggumi si wis karat hyang, anggumi si wis male' i karat.”

⁹ Unai Yeso nyus, “Mamwal i hali, u hali.”

¹⁰ Myan ima Yeso yis ahwes, som koltifai asussi hure mulang apil hu shini ima si tikul, si lulus lul tasi mangga' i findel i kaani mai.

¹¹ Unai Yeso nyus, “Hun, DeeƁwe fu shang ti kinggyongat i kaitat ames. Som ima sita saikyel, si wa kofsus ɗamam ta fisel ti kaani.

¹² Ɓurti, “ ‘Ɗufal mii si wa ɗingi ti shishat kpwet o, si wa kini ta mulut kwa fweng, si wa hali ti mwal kpwet o si wa shangi kwa fweng, ɓurti kan si hatat si shussi ya!’ ”

¹³ Unai Yeso nyus, “Na hu shang kaani mai kwa, atini hu wa shang ti anggum i kaani ya?

¹⁴ Musut ima ma ahani ak, a findel i DeeƁwe.

¹⁵ Shini ɗufali sima fota ta' i fisel ima si lai musut ta. Myan ima si hal findeli, fo abet Shatan yes fyal findeli ya ta mulwat.

¹⁶ Musut ima si fur ta afyai wi, a ɗufal ima si hal findeli, si mat ra apil-apil.

¹⁷ Ɓurti si shu sisyar ta ta'wi fwet kwa, si pwet i myan ndyong. Myan ima shum ahun a anggwya luk fit ɓurti findeli, unai fo abet si furus.

¹⁸ Musut ima si fur ta aren wi, sima fota ɗufal ima si hal findeli,

¹⁹ ɗak tirim i mute naya, hu dang i ramwayat, hu shak gwel i ɗamam shini, si yes si vwere' findeli ya, findeli tehus ii gbya'.

²⁰ Musut ima si fur ta si ta' maɗesi hai, sima fota ɗufal ima si hal findeli, si mat, shini si wis karat maɗesi, anggumi si wis karat hyang, anggumi si wis male' i karat.”

Man ti Mukof tima Si Gu'ut Kwang Hai

²¹ Unai lakus ni, “Awe lwa' mukof ɗak vo ya ti mbai kwang, ahun u kin ya ta ɗar i kyel marak ya? Ka nyai si kyan tasi kwetleng hai hoo?

²² Shak aɗeng ima mata mufot wi, si wa mulang tus ya, aɗeng ima mata mavo, a kpak, u lang ya nasi kweneng hai.

²³ Mamwal i hali, u hali.”

²⁴ Cu wei ti nyai, “Hal huni ndere, kwang tima hu mba ti, ayit si wa mbasui ti si mbwa'i.

²⁵ Shak maɗufal ima mati, si wa fasus si mbwa'i. Som ima si mati kwa, al maɗeng ima mati, si wa mati ya.”

Kaani ti Musut ima Mangye

²⁶ Lakus hwak ni, “Kaitat i DeeƁwe ma fota maɗufal ima wa ak ti musut ta yang.

²⁷ Ka kon ti ɓu, musuti tor, ngye, kaciwa' yis shang ngga' ima musuti ngye ta.

²⁸ Ta'i ti haisus kin musuti ngye, shu gungai, re' hihai, mas macwa fwet.

²⁹ Myan ima macwai nung, unai zan bakam i karat ames, ɓurti myan i karat ndok.”

Kaani ti Musut ima ma Hyangang Kwa

³⁰ Lakus hwak ni, “Ka wa kaan ti kaitat i DeeƁwe ti amiya? A hun anggi findel i kaani ka wa ti mbai ya?

³¹ Ma fota musut i gadina ima ma hyangang kwa, si lai ta fisha.

³² Shak ta andi, myan ima si lai, ngya u te i mbai fwet tasi shak yitat, u shu ra hyang i mbayai. Avyash hyang si wa ta' ti wurai ames ta manjingi wi.”

³³ Ti musut i kaani mai hyang, Yeso lakus findel ta ngga' ima si wa shangi ta.

³⁴ Findyalus kaciwa' findel i kaani kwa. Myan ima yis ahwes hu som koltifai asussi, tyai u kofus ti, u lakus aɗeng ima findel i kaani ma laki.

Yeso Kin Se Manjengi Rak

³⁵ Mwen ani, ma ango ti mas, Yeso lak som koltifai amesi ni, “Ka pis fiti.”

³⁶ Si hon male' i ɗufal ta kyeli, si lang ta kwang ima Yeso mata. Si pis fiti tikul, anggum i kwangangi si kolfai.

³⁷ Unai pelem luk fit ti ambas, yis gicik ti hami, hami rang ta kwangi wi, kwangi kat ndyong i ndyolok.

³⁸ Yeso tes ta takfai i kwangi, yis yus raki, mwet hai si ɗama hai. Si wa si ɓusho hus si nyus, “A makofiti, ka kpa! Ha tirim kwa haa?”

³⁹ Unai ɓusho, ti' pelemi ra, lak hami ni, “Raka ti hai, tya cakat!” Unai pelem rak fo abet, kyel ti te ryot.

⁴⁰ Lak som koltifai amesi ni, “A ɓurti mi hu mwen fwet ya? Hal mwashi hu fa mulut kwa haa?”

⁴¹ Myanat ka'us fwet si lak ɗiyai nyai, “Awe mai, ima pelem hu ham si halus ya?”