Muro Maɗesi tasi Yeso ima Mak Worong 3 - Findel i DeeƁwe Ti Alis i Ron

¹ Myan nin hum mulang ta mare, maɗufal mashoki ra nin yis ta kyeli.

² Som ima si nadon ti Yeso si far ti ngga' ima ɓa si wisus ti mafwashi, unai si shus shishat hai, ɓa si ɗingi a hun ma wa fati mashok ra mai cala Mwen ti Lafos ɗak.

³ Yeso lak mashok rai ni, “Lukka fit ha te mangra na wei i ɗufal.”

⁴ Unai Yeso lulus ni, “Anggi ma kiga' si anggut tasi Mwen ti Lafos ya? A masti maɗesi ahun a masti mafwashi ya? A bum ti mupwet ahun a fori ya?” Unai si kat ryot.

⁵ Shus shishat hai, ɗingus tarara ti futut, ta kikyawat ti muluti hwak ɓurti njeng na mulut ames. Unai lak mashoki rai nyus, “Tasa ra ama.” Unai tas rai, wis cala.

⁶ Unai Farisiyawa si lang ya ta kyeli, fo abet si mas suɓut i ka'ti man hu ɗufal i Herod, si findel si ngga' ima ɓa si for Yeso ta.

Suɓut i Ɗufal Si Kolfai Ti Yeso

⁷ Yeso hu som koltifai asussi si hon kyeli, wa ta foi yiir, ɗufal hyang ta ta' ti Galili hu Judya si kolfai asussi.

⁸ Ta Yerushalima hu ta ta' ti Idumya, hu fit i Ɗara i Jodan, hu ta kikyal i Taya hu Saidon, male' ɗufal si yes kyel ames, ɓurti si hal ɗamam ima maasi.

⁹ Ɓurti ɗufal si ɓal, Yeso lak som koltifai asussi ɓa si farus kwang i ham nin u te i hai, kan ɗufal si vohus ya.

¹⁰ Ɓurti ai fa som hyang cala i lo'a' ames, som mwatanan si twak kikyal ɓa si ngge'us.

¹¹ Myan ima rin mafwashi si ɗingus, si fwar ta mabel yusti, sin rafo nyai, “A ha a Al i DeeƁwe!”

¹² Ti'us ra kan si lak yis awe kwa.

Yeso Ben Som i Muro Ames

¹³ Yeso ɗu ta ɓwai i ɗanggash nin, lai som shini ima ma ɓwet sus, unai si yes.

¹⁴ Ben ɗufal hure mulang apil ta saa yusti, kinus asum ii Som Muro. Benus ɓa si te tikul hu yis, ɓa u rohus si wa si mba findel i DeeƁwe ta kikyal,

¹⁵ ɓa si wis andok i nggati rin mafwashi ya.

¹⁶ Mii a ɗufal hure mulang apil ima benus. Siman (ima Yeso fas asum Pita),

¹⁷ Jemis hu nusus Jwon a fe i Zebedi (ima fas asum Bowanejis, ima ma kofi nyai sin a Fe Bara),

¹⁸ Andru, Filip, Batolomi, Matyu, Toma, Jemis al i Alfyus, Tadyus, Siman ma nadon,

¹⁹ Judas maɗufal i Iskaryot, ima ta takfai cu han i Yeso.

Yeso hu Ba'alzabul

²⁰ Unai Yeso lang ta wur, male' ɗufal si suɓut hwak, kol ta kyel ima yis hu som koltifai asussi, si wis myan i cwai ti cwa kwa.

²¹ Myan ima shunus si hal aɗeng mai, si wa ɓa si zanus ya, ɓurti sima nyai, “Wanganus.”

²² Som i kofiti si anggut ima si ɗor ta Yerushalima si ni, “Ba'alzabul langus hai! A ti njeng i makai i rin mafwashi ma nggati rinan mafwashani ya.”

²³ Unai Yeso laiyus, lakus findel i kaani nin ni, “Atini Shatan u ngga Shatan ya?

²⁴ Na kaitat matkar u zan wei ti ɗyus, kaitat ani ma wa mute mangra kwa.

²⁵ Andi hwak na wur ti matkar ti zan ti wei ti ɗyut, wur andi ti wa mute mangra kwa.

²⁶ Na si ni Shatan zan wei ti ɗyus, kof yis hwak matkarus. Mawa masi atini u te mangra ya? Anggwe' asus ti ru ndai.

²⁷ I laksu ndai, awe ma wa mulang ta wur i maɗufal manjeng u harus ɗamam ya ya? A maɗufal ima ɓin njeng ma wa no'sus ya tawe, ɗak har ɗam i wuri ya.

²⁸ “I ma laksu mwawei, DeeƁwe ma wa shwaiti shak som mafwashani ames ya, hu findelal i ale'.

²⁹ Shak ta andi, maɗufal ima lak findelal i ale' ta si hai i Rin Masapai, DeeƁwe ma wa shwaisusi ya kwa fweng. Musut i mafwashi mai, i myan hu myan.”

³⁰ Lak mai ɓurti sima nyai, “Ama rin mafwashi.”

Naa ti Yeso hu Shunus

³¹ Unai naa ti Yeso hu shunus si ru na takfai, si te mangrai ta saikyel, si ro ɗeng ɓa u lang ta wii u laiyus.

³² Male' i ɗufal sin amunan si nggarus ya, unai si lakus si ni, “Nasa hu shuna si mata saikyel, sima farsa.”

³³ Yis matussi ni, “A hu we si mii nasun hu shunun ya?”

³⁴ Unai hatat ɗing ɗufal ima si nggarus ya ni, “Ɗing hun hu nasun hu shunun mi nati!

³⁵ Shak maɗufal ima mas aɗeng ima DeeƁwe ma ɓweti, a yis mii nusun, ti mii tusun, ti mii nasun.”