Muro Maɗesi tasi Yeso ima Mak Worong 2 - Findel i DeeƁwe Ti Alis i Ron

Yeso Fa Gundung Cala

¹ Takfai ti mukonan ndyong, Yeso hum mulang ta Kapanahum, unai ɗufal si hali nyai yes wur.

² Ɗufal hyang si suɓut ta wuri, kyel ti hya mbyalam wa fo i mahom, kaciwa' wis ti kyel i kinti sai. Unai Yeso lakus findel i DeeƁwe.

³ Arya ɓaras shini si yes, sin ti mwes mashok lo' nin.

⁴ Ɓurti si wis fisel i mulang ti ta kyel ima Yeso mata kwa, ɓurti mute hya i ɗufal, si ɓo ndung i mahom ima Yeso mata ya, si ɓu swai yi ya i mbai, si ɗor ti mashok lo'i ta si lapan i marak hai.

⁵ Myan ima Yeso ɗing fati mulut ames, Yeso lak mashok lo'i ni, “A al amen, i shwa mafwashi ama ya.”

⁶ Ta kyeli, som kofiti si anggut shini sin amunan, sin ɗambe' ta mulwat ames, nyai,

⁷ “Ami kin maɗufal mai ma findel andi ya? A findel i ale' malaki! Awe ma wa shwaiti mafwashi ya, wa' DeeƁwe ya?”

⁸ Fo abet, Yeso ta rin ames shang aɗeng ima si mbe'i. Lakus ni, “Ami kin huma mbe' ti ɗamam mii ya?

⁹ Anggi ɓin mbwesh ɓa si ni, ‘I shwa mafwashi ama ya,’ sin hu ima si ni, ‘Lukka fit, nggi'a lapan ama, ha wa ya?’

¹⁰ Ɓa hu shangi nyai yin, a Al i Maɗufal, i mati mbaitat na naya, ɓa i shu mafwashi ya.” Unai Yeso lak mashok lo'i ni,

¹¹ “I lak sa, luka fit, zana lapan ama, ha wa wur.”

¹² Unai mashok lo'i luk fit, zan lapan ames, at sin ɗingi shak asussi. Aɗengi fa shak som ima si ta kyeli shok na fwai, sin ha' ti asum i DeeƁwe fit nyai, “Tini ɗing ɗama nin fota mai kwa!”

Yeso Lai Lawi

¹³ Nin myani hwak Yeso hum mulangya, wa ta foi yiir, som hyang si yes kyel ames, fur kofsus ti.

¹⁴ Myan ima yis nggaari, ɗing Livai al i Alfyus, yis mute ta kyel i mati cef i wufen. Yeso nyus, “Kolafai asuni,” unai Livai lukfit kolfai asussi.

¹⁵ Mwen nin ndai, Yeso yis cwai ti cwa i mukon ta wur i Livai. Male' som i mati cef i wufen hu ima si laiyus ii som mufwashi, sin cwai ti cwa tikul hu yis, hu som koltifai asussi. Ɗufal hyang sin koltifai asussi.

¹⁶ Som i kofiti si anggut hu ima si mii Farisiyawa, si ɗingus yis cwai ti cwa hu ima si laiyus ii som mufwashi, hu som i mati cef i wufen. Si lul ta som koltifai ti Yeso si ni, “A ɓurti mi ma cwai ti cwa hu som i mati cef i wufen, hu som i masti mafwashi ya?”

¹⁷ Ti hal ti mai, Yeso nyus, “Maɗufal ima mati cala wai kyel i manda kwa, a mamwatan wai kyel i manda. I yes ɓa i lai a som ima a munderei kwa, a ima si ti mafwashi.”

Fisel Muwili hu Fisel Mumwai

¹⁸ Som i koltifai i Jwon hu Farisiyawa si mana ti ka'ti fo ya ta si cwa hai, unai shini ɗufali si yes si lul ta Yeso nyai, “Atini som koltifai i Jwon hu i Farisiyawa si mana ti ka'an ti fo ya tisi cwa hai, ɗak ama si kaa' fo ya kwa ya?”

¹⁹ Yeso matussi ni, “Atini mwalmwat i zalang makunggoi si wa ka'ti fo ya, yis zalangi yis ɗiri takyel ames ya? Si wa masi andi kwa, na zalang makunggoi yis ɗiri akul hu sin.

²⁰ Myan ma wa yes ima si wa zan ti zalang makunggoi ya ta kyel ames, a myani si wa ka'ti fo ya tasi cwa hai.

²¹ “Maɗufal zaan ɓwai i fagin mamwayi, u tor tasi hai i fagin mawili kwa. Na masi andi, ɓwai mamwayi ma wa nggi' ti fagin mawili u gwyak ya, rafati u ɓin i ma aiyi.

²² Maɗufal shwai ham i manggɓu' ta wii i rukul mawili kwa. Na masi andi, hami na can ma wa taɗas ti rukuli ya, u wis ya, rukuli hwak u rafatus. Wayou, maɗufali ma wa shwaiti ham i manggɓu' ta rukul mamwai wi.”

Deembai i Mwen ti Lafos

²³ Mwen ti Lafos nin, Yeso yis ɗa'at ta yang i macwa nin. Myani som koltifai asussi sin tifai, si fur warat ti hihai i macwai sin cwai.

²⁴ Farisiyawa si nyus, “Ɗingai, ami kin si nggyel ti anggut ya ti masti mai, Mwen ti Lafos ya?”

²⁵ Yeso matussi ni, “Hu mbe' tasi Worong i DeeƁwe aɗeng ima ai Devid hu myayus si masi myan ima hwem hanus kwa haa?

²⁶ Myan ima Abyata yis i mbai i som i kocokak, Devid lang ta Wur i DeeƁwe, zan folok masapai ima a kocokak je si cwai, cu, fa myayus ta hwak.”

²⁷ Unai Yeso nyus, “DeeƁwe mas Mwen ti Lafos a ɓurti ɗufal, mas ɗufal a ɓurti Mwen ti Lafos kwa.

²⁸ Ɗing huni, Al i Maɗufal a yis mii Deembai i Mwen ti Lafos.”