Muro Maɗesi tasi Yeso ima Mak Worong 16 - Findel i DeeƁwe Ti Alis i Ron

Muluk Fit i Yeso Ta Mot Wi

¹ Myan ima Mwen ti Lafos ti lang ta, Uryam ta Magdala, hu Uryam nati Jemis, hu Usalomi, si yes ti mabuf i yitat mafyongi, ɓa si fyal funat ames si.

² A mwen ti bya', tamwen ti muɗu i ɓwe si wa fiyaiyi.

³ Sin luli ti ɗiyai ames nyai, “Awe ma wa tuk sikan afungi ya ta fo i fiyaiyi ya?”

⁴ Si ha' hai fit, si ɗingi maɗeng tuu tuk mbai mafungi ya ta ɓwai.

⁵ Sin mulang ta fiyaiyi ndai, si ɗing zalang nin ti arom mapeli, yis amun ta ɓwai ra i ucwa, unai myanat ka'us.

⁶ Yis nyus, “Ka hu mwen kwa! Hu ma far ti a Yeso i Nazaret ima si nggwakus ta si shanggam hai. Mana kwa. Tuu luk fit ta mot wi! Ɗing hun kyel ima si kin funat ames na.

⁷ Ɓu hu lak som koltifai amesi hu Pita, nyai, ‘Mayus wa mutong ta Galili. A ta te'i hu wa ɗingsus ta, fota ngga' ima ai laku ta.’ ”

⁸ Unai si langus tawi sin ɗaro, si rangya ti titalal ta fiyaiyi wi, ɓurti myanat si tes cakat.

Kofti hai i Yeso ta ɗufal wi hu muhumkyel i Yeso ta fit

⁹ Myan ima Yeso luk fit tamwen wititit, mwen ti bya', pwak Uryam ta Magdala hai ti bya'. Ayit tima ai ngga hut rin mafwashi pyoron ya andi.

¹⁰ Yit ti wa ti lak som ima ai sin tikul hu yis ani, ti wisus sin shaat sin kawayai.

¹¹ Myan ima si hali nyai Yeso ma mushet, hu Uryam ti ɗingus hwak, si nggwes i fati mwawei.

¹² Takfai ti andi, ɗufal apil shini ta saa ti som koltifai ames, sin wa foti ashwa nin, Yeso pwakus hai, si ɗingus tes akat.

¹³ Si hum kyel si lak anggumi, si nggwes i fati mwawei hwak.

¹⁴ Ta takfai, Yeso pwak ya ta kyel i hure mulang andek ani myan ima sin cwai ti cwa. Lakus ɓin ti musut i munggwya i fati mulut hu njeng na hai i munggwya i fati mwawei si som ima si ɗingus takfai ti muluk fit ames.

¹⁵ Yeso lakus ni, “Ɓu ta naya shak, hu mba Muro Maɗesi amen wa kyel i ramam shak.

¹⁶ Shak maɗufal ima fa mwawei si masus batisma, a yis ma wa mupwet. Maɗufal ima nggwes i fati mwawei a yis si wa totsus ɓur.

¹⁷ Ɗamam i shok na fo mii sin koltifai ti som ima si fa mwawei. Ti asum amen si wa nggati rin mafwashi ya, si wa findel ti alisas akat-akat.

¹⁸ Si wa zan ti ɗamafwashi ti ra, na si wo manda i mot ma wa masus ɗama kwa, si wa kinti som ima si ti mwatanan ra hai, si wis cala.”

¹⁹ Takfai tima Deembai Yeso mbit laksus findelal mii, DeeƁwe ha'us ya wa fit, wa te amun ta ra i ucwa ames.

²⁰ Unai som koltifai amesi si wa sin mba ti Muro Maɗesi ames ta kikyal shak. Deembai yis wis sus ti, yis kinti ɗamam i shok na fwai sin koltifai ti findel ames.