Muro Maɗesi tasi Yeso ima Mak Worong 15 - Findel i DeeƁwe Ti Alis i Ron

Yeso ta Wei i Pailet

¹ Tamwen wititit, mbai i kocokak, hu kaya, hu som kofiti si anggut hai, hu som i totti puɓwar shak si ɓeti. Unai si no' Yeso, si langtus ya, si kol Pailet, makunggul i Rom.

² Pailet lulus nyus, “A ha a makai i som Ju haa?” Yeso matussi ni, “Hei, ta ngga' ima ha lak ta.”

³ Unai mbai i kocokaki lak ɗamam mufwashani hyang si yis hai.

⁴ Pailet hum lulsus nyai, “Hati aɗeng i laki hai findelal mai kwa haa? Hala male' i findelal mafwashi ima si laki na hai yati!”

⁵ Yeso tes mbaa, aɗengi fa Pailet shok na fo.

⁶ Myan i Got i Pissihai, Pailet mana wak ti maɗufal ima ma mano' ii ra, ima ɗufal si lul.

⁷ Ta myan ani, maɗufal nin ma asum Barabas ai yis ta mano' wi hu shini, ɓurti for ti maɗufal, myan ima sin ɓyaranganya.

⁸ Ɗufal si yes ta kyel i Pailet, ɓa u masus aɗeng ima mana masusi.

⁹ Unai matussi ni, “Hu ma ɓweti i waku makai i som Ju i ra haa?”

¹⁰ Shangi a ɓur ti nadon kin mbayai i kocokaki si fa Yeso ta ra yusti.

¹¹ Mbayai i kocokaki si shuk ɗufal ɓa si lul si wakus Barabas i ra, ii foi Yeso.

¹² Unai Pailet lulus ni, “Ami hu ɓweti i masi ti maɗufal ima hu layani ii makai i som Ju ya?”

¹³ Si cu i fo sin nyai, “Nggwak hun yus si shanggam hai!”

¹⁴ Pailet lulus ni, “A ɓur ti mi ya? Mas a mafwashi i mi ya?” Si cu i fo shak ti ambas sin nyai, “Nggwak hun yus si shanggam hai!”

¹⁵ Ɓurti Pailet ma ɓweti u ɗak ti ɗufal mulwat, catus Barabas ii ra. Takfai tima ndash Yeso, fa ɓa si wa si nggwakus tasi shanggam hai.

Som i Ɓwol si Gbaf Yeso ya

¹⁶ Unai som i ɓwoli si watus ta taya i makocoki, ɗak si lai anggum i som i ɓwoli shak ta kyel andek.

¹⁷ Si kinus ndi ti fagin ti kaitat nin mujuwi, ɗak si nggi' rurwan i maren nin si kinusi ta hai.

¹⁸ Unai si gbafus ya, sin nyai, “Mukon asa ti herta, a makai i som Ju.”

¹⁹ Si ka' nggwakansus ti yal ta hai, sin twafansus lyau hai, ɗak si cinggir sin to' sus fota to' i ngye.

²⁰ Takfai tima si gbafus ya si zan fagin mujuwi i yi ya, si ti'us arom ames. Unai si langtus ya ɓa si nggwakus.

Si Nggwak Yeso ta si Shanggam hai

²¹ Unai maɗufal nin ta Sairin, ma asum Siman, dees i Alekzanda hu Rufas, yis yus yes ta ya. Si kinus kpak ɓa u ha' Shanggami.

²² Si wa ti Yeso ta kyel nin ima si lai i Golgota, (nyai a Kyel i Kyas i hai).

²³ Unai si ti'us ham i manggɓu' ima si fut hu mur, ɗak nggwes i mati.

²⁴ Ɗak si nggwakus tasi shanggam hai. Si kar arom amesi, si hwi aben si aromi hai, ɓa si ɗing aɗeng ima si wa wisi ti andek-andek.

²⁵ A si shitam karfu' ti mwen, si nggwakus tasi shanggam hai.

²⁶ Si worong aɗeng ima kin si nggwakus tasi shanggam hai nyai, A MAKAI I JU.

²⁷ Si nggwak kpokak i masher apil ta, hu yis, andek ta ra i ucwa ames andek ta ra i ukutyal ames.

²⁸ (Mai fur ɓa Worong i DeeƁwe u hya, ima ni, “Si mbe'us ta saa ti som mufwashi.”)

²⁹ Som ima si musata sin laksus findel i gbya' hai, sin kinggit ti hihai ames nyai, “Gbaak! Ha ima ha ni ha wa nggul ti Wur i DeeƁwe ya, ha ta' ta takfai ti mukon ataat,

³⁰ ɗora ya ta si shanggam hai, ha bum hai sa ma!”

³¹ Andi hwak mbayai i kocokaki hu som kofiti si anggut hai, si musasus ta saa ti ɗiyai ames, sin nyai, “Bum shini, ɗak bum haisus kwa!

³² Ɓa Kristi mai, makai i Isar'ila, u ɗorkyel tasi shanggam hai mwashi. Na ni ɗingi andi, ɗak ni fa mwawei.” Mwa pilal ima si nggwakus tikuli, si sya'us hwak.

Mot i Yeso

³³ Sai ren, unai maɓing vo ashwai ya shak, wa shitam ataat ti ango.

³⁴ Ta shitam ataati, Yeso kawa ti la munjengi ni, “Eloi, Eloi lama sabak tana?” Ma nyai, “A DeeƁwe amen, a DeeƁwe amen, ami kin ha mas gbya' ti yin ya?”

³⁵ Myan ima shini sin mangrai ta kyeli, si hali andi, si ni, “Hal huni, ma lai ti Iliya.”

³⁶ Unai andek ames tital wa jop soso ta ham macani wi, ti' tasi cwang nin hai, ti' Yesoi ɓa u wo. Yis nyai, “Hon hun yus! Ka ɗingi ahun Iliya ma wa yes u ɗortus ya.”

³⁷ Unai Yeso kawa ti njeng, ɗak dul lafos i dala.

³⁸ Fo abet, fagir mbai ima mata Wur i DeeƁwe matkar apil, ta fit yes kikyel.

³⁹ Mbai i som ɓwol nin ta Rom, ima ma mangra ta wei i Yeso, hal kawa ames, ɗak ɗing ngga' ima mot ta, unai ni, “A mwawei maɗufal mai a Al i DeeƁwe!”

⁴⁰ Arof shini sin ɗing ti ɗamami ta maleng. A hu Uryam ta Magdala, hu Uryam nasus ti Jemis mavaati hu Joses, hu Usalomi.

⁴¹ Arof mii, a sin ai sin koltifai asussi, myan ima yis ta ashwa i Galili sin ɗisus cwa. Arof hyang ima ai sin wayan Yerushalima tikul, sin ta kyeli.

Lai i Yeso

⁴² Mwashi a ango ti Mwen ti Ɗak ti ɗamam ta, a mwen tima ɓa wasan Mwen ti Lafos.

⁴³ Maɗufal nin ta Arimatya, ma asum Josep, ma andek ta saa ti kaya ima ɗufal si fayansus ngye. Ai yis shwaiti yes i kaitat i DeeƁwe ti haisus. Wa kyel i Pailet kaciwa' myanat, lul funat i Yeso.

⁴⁴ Pailet shok na fo myan ima hali Yeso tuu motus. Unai lai mbai i som i ɓwoli ɓa u lul a hun Yeso tuu yash ti mot ɗak.

⁴⁵ Myan ima hal findeli ta fo i mbai i som ɓwoli, unai fa Josep funati.

⁴⁶ Josep yes ti lukul i lai, ɗor ti funati ya, nggi' ta lukuli wi, kin ta fiyai ima si yong ta afung wi. Ɗak kin si tuk mbai i mafung ta fo i fiyaiyi.

⁴⁷ Uryam ta Magdala hu Uryam nati Joses, si ɗing kyel ima si kinus ta.