Muro Maɗesi tasi Yeso ima Mak Worong 13 - Findel i DeeƁwe Ti Alis i Ron

Matkof i Ɗamam i Dala

¹ Yeso yis mulangya ta Wur i DeeƁwe ndai, andek ta saa ti som koltifai amesi nyus, “A makofiti, ɗinga musut i mbai ta' ima si masi ti mafyai mai, hu ta' maɗesi mai kwai.”

² Yeso humus ti kyel ni, “Ha ɗing mbayai i ta'a' mii haa? Som manggwya si wa honti afung nin ta hai nin kwa, si wa ɓasanti ya.”

³ Yeso yis amun ta hai Anggash i Yitat i Mbar si fit, kyel ima ɗing Wur i DeeƁwe ta, Pita, hu Jemis, hu Jwon, hu Andru si lulus ii mufot.

⁴ Si ni, “Laka nin ti, a tami ɗamam mii si wa mas ya? Ami ma wa kofi nyai ɗamam mii shak si nggas i hya ya?”

⁵ Yeso lakus ni, “Shingat hun, kan ɗeng dangu kwa.

⁶ Hyang si wa yes ti asum amen. Sin nyai, ‘Ayin ayis,’ ɗak si dang ɗufal hyang ya.

⁷ Myan ima hu hal ɓwol hu mangga' i ɓwol nati, hu te'i, kan hu mwen kwa. A kanggang ɗamam si te andi, shak ta andi, dala i naya ti ti yes kwa.

⁸ Ɓin ti wa muluk fit ta' hu ta' hai, ti luk fit kaitat hu kaitat hai. Fisha ma wa muro ta kikyal akat-akat, si mas hwem hwak. Mii shak a mahalal i shum.

⁹ “A kpak hu te ti shingat i haisu, si wa kolsu ta wei i kaya, si ndash shu ta mare i DeeƁwe. Si wa kolsu ta wei i som i kunggul hu kaya ɓur ti hun a som koltifai amen. Mai ma wa mute i fisel tima hu lakus Muro Maɗesi amen.

¹⁰ A kpak Muro Maɗesi mai u tong ta shak ramam i naya wi ti bya'.

¹¹ Myan ima si ka'u si watu ta fo ɓurti, ka hu tirim ti aɗeng ima hu wa laki kwa. Lak hun aɗeng ima DeeƁwe kinui ta mulwat tasi myani, ɓurti a hun hu wa findel kwa, a Rin Masapai.

¹² Maɗufal ma wa cwai ti han i nususi ɓa si for ya, dee ma wa cwai ti han i al ames. Fe si wa zan ti wei ti hu dees, ɓa si fwarus ya.

¹³ Ɗufal shak si wa ɗanggwya tu ɓur sun, yis ima ka' agung wa dala ma wa mupwet.

¹⁴ “Hu wa ɗing ti ‘ɗamam i male' ima si kwal mufur’ sin mangra ta kikyal ima a ames kwa. Myan ima hu ɗingi andi, ma ambe' u shangi. Na hati mute ta ta' ti Judya, titala ha lang ta ɗanggash!

¹⁵ Maɗufal ima mata si hai i mahom ames, kan ɗor ya u lang ta wur wa zan ti ɗama kwa.

¹⁶ Maɗufal ima mata yang, kan humkyel ta wur ɓa u zan mogo kwa.

¹⁷ Mweni ti wa mute ti shum fwet, ta si arof ima si ti harai hu ima si ti kalajwau!

¹⁸ “Fwal hun DeeƁwe ka ɗamam mii si fur ti fu kwa.

¹⁹ Ta si myan ima DeeƁwe mas naya yes mukonan mii, ti si mas shum mafwashi nin fota mai kwa. Takfai ti mai, shum nin ma wa muhum mute fota mai kwa fweng.

²⁰ Naɗin wa' Deembai dya' mukonan mii ya kwa, naɗin ɗeng u pwet kwa. Dya' mukonan mii ya, a ɓurti som ima benus.

²¹ Tasi myan ani, na ɗeng ni hu, ‘Ɗing huni, Kristi mai!’ A hun ‘Ɗing huni, unai ta te'i!’ Ka hu fa mwawei kwa.

²² Ɓurti som ima si nyai sin a Kristi, hu som i shit i fyarat si wa mulangya. Si wa masti ɗamam i kofiti, hu ɗamam i shok na fwai, ɓa si dang ta ima DeeƁwe benusi hwak, na yis wa matwis.

²³ I laku ya hwer, ɓurti ɓa hu te ti shingat.

²⁴ “Tasi mukonan ani, takfai ti shum mahyangi, “ ‘Ɓwe ti yut wa kikyawat, ture hwak u fa kweneng kwa.

²⁵ Ɓyar si wa ndakan ta fit, mbayai i ɗamam ta fit si wa gicik hwak.’

²⁶ “A tasi myan ani, si wa ɗing ti Al i Maɗufal yis mupwak ya ta ri' wi, ti mbaitat ames ta cinjangati.

²⁷ Ma wa ro ti som lu' ames ɓa si suɓut som ima benus ta kikyal shak, ta anggwe' i naya wa anggwe' i fit.

²⁸ “Mwashi, wis hun shangi mai tasi yit ti makambong. Na ti ɓak ra, ti sa mwal mumwai, hu shangi fu ti kat ndyong ndai.

²⁹ Angga'i nai hwak, na hu ɗing ɗamam mii sin mufur, hu shangi myan si kat vaat, mana fo i kwap.

³⁰ I ma laksu mwawei, waya moti ti wa mulang ta kwa, na ɗamam mii shak si fur fisha tawe.

³¹ Fit hu fisha si wa mumbit, findel amen ma wa mumbit kwa.

Ɗeng Shang Mweni hu Myani Kwa

³² “Ɗeng shang mweni hu myani kwa. Som lu' i DeeƁwe hu Al i DeeƁwe shak si shang myani kwa, a DeeƁwe je shangi.

³³ Tehun mweret! Tehun ti shingat! Hu shang myan ima ɗamam mii si wa mufur kwa.

³⁴ Ma fota maɗufal ima ma wa ɗa'at. Ma wa honti wur ames ta ra i yarai ames shak, u kaarus roha i masi ti andek-andek. Ma wa lak ti maɗing ti kwapi ɓa u ɗingi ndere.

³⁵ “Ɓurti andi, tehun ti shingat, ɓurti hu shang myan ima mawuri ma wa muhumkyel kwa. A myan ima korong tutol, ahun a tamwen, ahun a tango, ahun a sai fo' ɗak.

³⁶ Kan hum kyel kaciwa' shangi amu, u wisu hun yu ɗarak kwa.

³⁷ Aɗeng ima i laksu, i lak ti ɗufal shak, ‘Tehun ti shingat!’ ”