Muro Maɗesi tasi Yeso ima Mak Worong 11 - Findel i DeeƁwe Ti Alis i Ron

Yeso Lang ta Yerushalima

¹ Myan ima ru nggas ti Yerushalima hu Betafaji hu Betani ta ɓwai i nggas ti Anggash i Yitati Mbar, unai Yeso ro apil ta saa ti som koltifai amesi.

² Lakus ni, “Lang hun ta ashwa ani ta wei yuti. Ti mulang ta amu, hu wa wisi si no' al i njaki nin ta, ima wa' ɗeng tuu langi. Hu hwet ya hu yes ti nati.

³ Na ɗeng lulu, ‘Ami kin hu masti mai ya?’ Hu nyus, ‘A Deembai ma ɓweti, ma wa muhum ti kyel ndai.’ ”

⁴ Unai si wa, si wis al njakii mano' ta fo i fisel ta fo i wur nin, si hwet ya.

⁵ Unai ɗufal ima si mangra ta kyeli si nyus, “Ami hu masi ya? Ami kin hu hwet ti al njaki ya ya?”

⁶ Si lakus aɗeng ima Yeso lak, unai somi si honus si wis.

⁷ Myan ima si yes ti al njakii ta kyel i Yeso, si wash arom ames ta si njakii hai, ɗak Yeso ɗu ta te amun i hai.

⁸ Unai ɗufal hyang sin wash ti arom ames, shini sin wash ti rai yitat ima si nggyal ta ya, ta fisel.

⁹ Ɗufal ima si ta wei hu i takfai sin taanja, sin nyai, “Mbaitat i DeeƁwe!” “Disyo' tasi ima ma yes ti asum i Deembai!”

¹⁰ “Maɗesi u te si kaitat ima ma yes ta kyel i demukan Devid!” “Mbaitat mbai ta fit!”

¹¹ Unai lang ta Yerushalima, wa lang ta Wur i DeeƁwe, ɗing kyel tarara si ɗamam hai shak. Lang ta kyeli wa Betani hu Hure Mulang Apili, ɓurti ango ti mas.

Yeso Sapa Wur i DeeƁwe Ya

¹² Wasan tamwen si te honti Betani, hwem ti hanus Yeso.

¹³ Ɗing yit ti makambong nin ta maleng, yit ti mwal fwet. Unai hat wa ashang u wisut ti fe. Myan ima ruta, wisut ti ɗama kwa a mwal kyek, ɓurti a myan i makambong kwa.

¹⁴ Unai lak yiti ni, “Kan ɗeng hum wis ti macwa na kyel amesh kwa.” Som koltifai amesi sin hal ti aɗeng ima ma laki.

¹⁵ Ti muru ames ta Yerushalima, Yeso lang ta Wur i DeeƁwe, fur ngga som i juwili ta juwiliyai ta kyeli, hatat ti tebur i som i mashen i cef, hu ɗam i mute amun i som juwil ti gurgutaha ya.

¹⁶ Unai shahus woor ta Wur i DeeƁwe.

¹⁷ Ɗak kofusti yis nyai, “Si worong nyai, “ ‘Si wa lai ti wur amen ii wur i fwal ti DeeƁwe i ɗufal shak,’ hun hu hat ti ii ton i asher.”

¹⁸ Mbayai i kocokak hu som kofiti si anggut hai, si hal mai, ɗak si fur far ti fisel i for sus ya. Si myanat ti Yeso fo, ɓurti shak ɗufal sima shok na fwai ti kofiti ames.

¹⁹ Myan ima ango ti mas, Yeso hu som koltifai amesi si lang ya ta wi i mashwai.

Yit ti Makambong Ti Shok

²⁰ Si tes wa tamwen, si ɗing yit ti makambongi ti shokut ta sisyari.

²¹ Pita mbe' ɗak lak Yeso ni, “A makofiti, ɗingai! Yit ti makambong tima ha ti'ut ra andi, ti shokut!”

²² Yeso matussi ni, “Fahun mulut si DeeƁwe hai.

²³ I ma laksu mwawei. Maɗufal ma wa lak ti anggash moti nyai, ‘Ɓwish shi ndak ta yiir.’ Na yis ti mulut apil kwa, fa mwawei nyai aɗeng ima laki ma wa mufur, ma wa mas ta ngga' ima laki.

²⁴ Ɓurti andi, i ma laksu, shak aɗeng ima hu fwal ta DeeƁwe, fahun mwawei nyai hu mat, ma wa mute ii mamu.

²⁵ Myan ima hu te mangra fwal ti DeeƁwe, na hu ti ɗama si ɗeng hai, shuhun yusi ya, ɓa Deemu i kyel ta fit u shuhu mafwashi amu ya.”

²⁶ Na hu shu ɗufal mafwashi ames ya kwa, andi Deemukan i kyel ta fit hwak ma wa shwaisu mafwashi amu ya kwa.

Lul ta si Andok i Yeso

²⁷ Si hum muru ta Yerushalima, Yeso yis ati ta taya i Wur i DeeƁwe, unai mbayai i kocokak hu som kofiti si anggut hai hu kaya si yes kyel ames.

²⁸ Si lul nyai, “A ti nggi andoki hama masti ɗamam mii ya? Awe fa andok i masti mai ya?”

²⁹ Unai Yeso nyus, “I wa masu lul andek. Na hu matuni, i wa laksu ti andoki ima kin i masti ɗamam mii.

³⁰ Batisma i Jwon yes ii ta fit, ahun ii ta kyel i ɗufal ya? Lak hunati!”

³¹ Unai si ɓeti ɓatasin nyai, “Na ka ni mat, ‘ii ta fit,’ ma wa lul sikan fo, ‘A ɓurti mi hu fa mwawei si yis hai kwa ya?’

³² Na ka ni, ‘Mat ii ta kyel i ɗufal.’ ” Si myanat ti ɗufal fo, ɓurti ɗufal shak si fa mwawei nyai, Jwon a mashit i DeeƁwe i mwawei.

³³ Unai si matussi si ni, “Ni shangi kwa.” Yeso nyus, “Andi yin hwak i wa laksu ti kyel ima i mat andok i masti ɗamam mii ta kwa.”