Muro Maɗesi tasi Yeso ima Mak Worong 10 - Findel i DeeƁwe Ti Alis i Ron

For ti Kunggo

¹ Yeso hon kyeli hat wa ta ta' ti Judya ɗak pis ta fit Ɗara i Jodan. Suɓut i ɗufal si hum yes kyel ames, fota ngga' ima mana masi, ɗak kofus ti.

² Farisiyawa shini si yes ɓa si mba hus, si lulus nyai, “Anggut ni a kiga' maɗufal u for mbor asus kunggo ya haa?”

³ Matussi ni, “Ami Mosis ni ɓa hu masi ya?”

⁴ Si ni, “Mosis ni a kiga' ɓa maɗufal u worongut kaada i for ti kunggo ya, u wakut i ra.”

⁵ Yeso matussi ni, “A ɓurti njeng na hai amu, Mosis worongu anggut moti.

⁶ Tasi bya', ‘DeeƁwe masus marei hu mumbori.’

⁷ ‘A ɓurti andi, maɗufal ma wa honti dees hu nasus, u te andek hu mbor asus,

⁸ andi sin apili si wa mute ii lo' andek.’ Si wa muhum mute apil kwa, si wa mute lo' andek.

⁹ “Ɓurti andi, aɗeng ima DeeƁwe no', kan maɗufal hwet ya kwa.”

¹⁰ Myan ima sin ta wur hwak, som koltifai amesi si lulus mangga' i findel mai.

¹¹ Matussi ni, “Na ɗeng for mbor asus kunggo ya ɗak kunggo uɗeng ta, mas arak i zuruk wa kyel mbor asus ti bya' hai.

¹² Na ayit ti for re amet kunggo ya, ɗak ti kunggo ɗeng, ti mas arak i zuruk.”

Fe Muyayi hu Yeso

¹³ Mwenin ndai, ɗufal sin kolti Yeso fe muyayi ɓa u kinus maɗesi, unai som koltifai amesi sin yus shai.

¹⁴ Myan ima Yeso ɗing mai, mas futut. Lakus ni, “Hon hun fe muyayi si yes na kyel amen, ka hu shahus kwa, a ɗufal fota fe mii si wa mulang ta kaitat i DeeƁwe.

¹⁵ I ma laksu mwawei, maɗufal ima mat kaitat i DeeƁwe fota fe muyayi mii kwa, ma wa mulang ta kwa.”

¹⁶ Unai zan fe muyayi shini ta fajin ames, kinus ra hai yis kinsus maɗesi.

Zalang Masufat

¹⁷ Yeso hatus wa ndai, maɗufal nin yes kyel ames ti tital, fur si fwaran ames hai nyus, “A makofiti maɗesi, ami te a kpak ɓa i masi i wis mupwet i myan hu myan ya?”

¹⁸ Yeso matussi ni, “Ami kin ha laiyun ii mamaɗesi ya? A DeeƁwe je a mamaɗesi.

¹⁹ Ha shang anggut, ‘Ka ha for ɗeng kwa, ka ha mas arak i zuruk kwa, ka ha shir kwa, ka ha lak fyarat si ɗeng hai kwa, ka ha dang ɗeng ha matus ɗama ya kwa, Faha dya hu nasa ngye.’ ”

²⁰ Zalangi matussi ni, “A makofiti, ɗamam mii shak, i masan sus yin ɗiri ii wosong.”

²¹ Yeso ɗingus fo, ɓwetus, ɗak nyus, “A ɗama andek kat. Ɓwa ha juwil ɗamam ama ya shak, ha fa som jyel, ɓa ha wis sufat ma hyangi ta fit. Takfai ti mai, ɗak ha yes ha kolfai asuni.”

²² Myan ima zalangi hal findel mai, lo' ames wis ya, lang ya ta kyeli ti rafat i mulut, ɓurti mati sufat fwet.

²³ Yeso ɗing kyel tarara, unai lak som koltifai amesi ni, “Mati shum fwet ɓa masufat u lang ta kaitat i DeeƁwe!”

²⁴ Som koltifai amesi si shok na fwai si hai findel ima lak mai. Unai Yeso hum laksus nyai, “A fe, mati shum fwet ɓa si lang ta kaitat i DeeƁwe!

²⁵ Ɓin mbwesh ɓa rukumi u lang ta swai i twen, hu ima masufat u lang ta kaitat i DeeƁwe.”

²⁶ Findeli hum kinti som koltifai amesi si hum shok na fwai fwet, sin lak ti ɗiyai ames nyai, “Awe ma wa mupwet ndai ya?”

²⁷ Yeso ɗingus fo ɗak ni, “Ta kyel i maɗufal ma wa mas kwa, ma wa mas ta kyel i DeeƁwe. Shak ɗamam a ma mas ta kyel i DeeƁwe.”

²⁸ Pita nyus, “Ni hon ɗamam shak ɓa ni kolfai asai!”

²⁹ Yeso matussi ni, “I ma laksu mwawei, shak maɗufal ima ma wa honti wur ames, hu shunus muryai ta murwafi, hu nasus, hu dees, hu fe, hu yangang ɓur sun, hu muro maɗesi amen,

³⁰ aɗeng ima ma wa wisi nasi myan mai, ɓin sa ndik andek, hu wurai, hu shunus muryai hu murwafi, hu nasus, hu fe, hu yangang, hu shum hwak. Ta dala, si wa wis ti mupwet i myan hu myan ta naya tima ti yes.

³¹ Hyang ima si mii bya' si wa mute i dala, i dala si wa mute i bya'.”

Yeso Hum Findel si Mangga' i Mot ames

³² Sin hat muɗuya wa Yerushalima, Yeso yis ta wei ames, som koltifai amesi si shok na fwai, som ima si tifai si mwen. Unai hum ha' ti mulang apili ɓwai andek, ɗak lakus aɗeng ima ma wa wis sus.

³³ Ni, “Ka ma muɗuya wa Yerushalima, si wa cwai ti han i yin, Al i Maɗufal, ta ra i mbayai i kocokak hu som kofiti si anggut hai. Si wa lef sun ɓur i mot, si faiya ta ra i som ima a Ju kwa.

³⁴ Si musas sun si tufus lyau hai, si ndashun si forun. Takfai i mukon ataat i wa muhumkyel ti mupwet.”

Fwal i Yakubu hu Jwon

³⁵ Unai Jemis hu Jwon, fe i Zebedi si yes kyel ames si nyus, “A makofiti, ni ɓweti ha mas nin shak aɗeng ima ni lul.”

³⁶ Unai lulus ni, “Ami hu ɓweti ɓa i masui ya?”

³⁷ Si matussi si ni, “Mwen ti kaitat ama, hona ni wis ngye i mute ta kyel ama, andek ta ra i ucwa, andek ta ra i ukutyal ama.”

³⁸ Yeso ni, “Hu shang aɗeng ima hu luli kwa. Hu wa woti cunjo ti shum tima i wa woi ahun si masu batisma ti batisma ima si wa masun batisma ti haa?”

³⁹ Si matussi si ni, “Hei, ni wa masi.” Unai Yeso nyus, “Hu wa woi ta cunjo ti shum si masu batisma ti musut i batisma ima si masuni ti haa?

⁴⁰ Shak ta andi, yin i ndok i fu kyel mute amun ta ra i ucwa hu ra i ukutyal kwa. DeeƁwe tuu ɗak ti kyel ta ɓurti sin ima ben.”

⁴¹ Myan ima som koltifai amesi si hal findel mai, si mas futut ti Jemis hu Jwon.

⁴² Yeso laiyus shak ta kyel andek lakus ni, “Hu shangi nyai som ima ka ɗingsus fota a kaya i ramam Deembai ɓinus. Si ɓyat ɓa si kof haisus a som i mbaitat tasi ɗufal hai.

⁴³ Hun hu wa mute andi kwa. Maɗufal ima ma ɓweti mute i mbai na saa asu u te i ma wa muro amu.

⁴⁴ Maɗufal ima ma ɓweti mute i bya', a kpak u te i yere i shak.

⁴⁵ Ɓurti Al i Maɗufal yes na naya ɓa si wis a mbaitat kwa, ɓa u te ii yere, u fa mupwet ames, ɓa u dum ɗufal hyang.”

Manzyau wis Ɗing ti Kyel

⁴⁶ Yeso hu som koltifai amesi si yes Yeriko. Myan ima sin honti ashwai, male' i ɗufal sin tifai. Unai manzyau nin ma asum Batimayus (al i Timayus ndai), yis mute ta fo i fisel yis fwal.

⁴⁷ Myan ima hali a Yeso i Nazaret yis musa ta, unai cu i fo, “Yeso, Al i Devid ɗinga shum asuni!”

⁴⁸ Ɗufal hyang si lakus ɓin, ɓa u te mbaa, hum cwai i fo ti ambas nyai, “A Al i Devid, ɗinga shum asun ni!”

⁴⁹ Yeso kat mangra ɗak ni, “Lai hun yus,” Unai si lai manzyauwi, “Jakaka! Luka fit, malai sa.”

⁵⁰ Unai hwiti mogo ames ya ta ɓwai, ni jaɓwak pis ta fit ɗak wa kyel i Yeso.

⁵¹ Yeso lulus ni, “Ami ha ɓweti i masai ya?” Manzyauwi nyus, “A makofiti, i ɓweti ɗing ti kyel.”

⁵² Unai Yeso nyus, “Ha ya wa, fati mulut asa ti fa cala.” Fo abet ɗing kyel, kolfai ti Yeso ta fisel.