Muro Maɗesi tasi Yeso ima Mak Worong 1 - Findel i DeeƁwe Ti Alis i Ron

Jwon Mabatisma Ɗak ti Fisel ta

¹ Ngga' ima muro maɗesi i Yeso Kristi, Al i DeeƁwe fur ta mai.

² Si worong ta kaada i Ishaya mashit nyai, “I wa ro ti mamuro amen u tong ta wei ti ha, ɓa u ɗaka ti fisel ta,”

³ “La ti ɗeng ti lai lai ta ya, ‘Ɗak hun ti Deembai fisel ta, Tas hun fiselal si wa mangra ɓur sus.’ ”

⁴ Jwon Mabatisma mata ya, yis mba ti findel i hatat, ɓa si mas ɗufal batisma i shwaiti mafwashani ames ya.

⁵ Ɗufal ta ta' ti Judya, hu ashwa ti Yerushalima shak, si rangya si wa kyel i Jwon. Sin lak ti mafwashani ames ya, yis masus batisma ta Ɗara i Jodan.

⁶ Jwon sok arom ima si masi ti fukut i rukumi, hu fata' ima no' ti ɗar ya, cwa ames a langgash hu ham i wan i kyel ta ya.

⁷ Muro ames mai, “Ɗeng ma yes na takfai yunti ima ɓinun mbaitat, i ndok ɓa i cinggir i hwet mwinggi' i kpakasak ames ya kwa.

⁸ Yin i masu batisma ti ham, yis ma wa masu batisma ti Rin Masapai.”

Batisma hu Amba i Yeso

⁹ Myan ani Yeso yes ta Nazaret ta' ti Galili, ɗak Jwon masus batisma ta Ɗara i Jodan.

¹⁰ Myan ima Yeso yis mulangya ta ham wi, ɗing fit maɓu ya, Rin Masapai ɗorus hai fota gurguta.

¹¹ Unai la nin ta fit ti ni, “Mai a Al amen, ima i ɓwetsus fwet, ima ti pipelat na mulut ɓursus.”

¹² Fo abet Rin Masapai tukus ta ya,

¹³ te ta i mufi hure ɓaras, Shatan yis mbasus. Te ta yai hu loha i ya, som lu' i DeeƁwe sin ɗing sus.

Yeso Lai Som i Koltifai i Bya'

¹⁴ Kamana ndai, si kin Jwon ta wur i shitam. Unai Yeso wa ta Galili, yis mba ti muro maɗesi i DeeƁwe.

¹⁵ Ni, “Myan si ndok kong, kaitat i DeeƁwe her anggasi. Hatat hun hu fa mwawei nasi muro maɗesi i DeeƁwe!”

¹⁶ Nin mweni ndai, Yeso yis ati ta fo i Yiir i Galili, ɗing hu Siman hu nusus Andru, sin shwaiti takal i gong ti gushe ta yiiri, ɓurti sin a som gong ti gushe.

¹⁷ Yeso ni, “Yehun, kol hun fai asuni, hu mana ti gong ti gushe, yin i wa kofsu fisel i dul ti ɗufal yes kyel amen.”

¹⁸ Fo abet si hon takalal ames ta, si kolfai asussi.

¹⁹ Myan ima Yeso her ta wei vaat, unai ɗing Jemis al i Zebedi hu nusus Jwon ta wii kwang i ham, sin ɗak ti takalal ames ta.

²⁰ Fo abet laiyus sin hwak, si hon dees Zebedi hu som i roi ta kwang i hami wi, si kolfai asussi.

Yeso Re' Rin Mafwashi Ya

²¹ Unai si wa Kapanahum, Mwen ti Lafos ti ru ndai, Yeso lang ta mare fur kofiti.

²² Ɗufali si shok na fwai ti kofiti ima masi, ɓurti kofusti ti andok, te akat hu i som kofiti si anggut hai.

²³ Fo abet maɗufal nin ima mata marei, ima mati rin mafwashi yis gwa'an ti rafo nyai,

²⁴ “Ami ha ɓweti ti nin ya, a Yeso i Nazaret? Ha yes ɓa ha fwar nin ya haa? I shanga, ha a Masapai i DeeƁwe!”

²⁵ Unai Yeso ti' rini ra, ni, “Tya cakat! Langa ya na maɗufal mai wi!”

²⁶ Unai rin mafwashii mavwirik ya ta maɗufali wi mat shaat lang ya.

²⁷ Ɗufal si shok na fwai sin lul ti ɗiyai nyai, “Ami mai ya? Kwai ka hal kofiti mamwai ti mbaitat! Lak rin mafwashani ɓa si rangya, angga'i nai si halus si rangya.”

²⁸ Fo abet findel mai nggu' ya ti kikyali ta ta' ti Galili.

Yeso Fa Ɗufal Hyang Cala

²⁹ Ti mulangya a ames ta marei, si wa wur i hu Siman hu Andru, akul hu Jemis hu Jwon.

³⁰ Kasus ti Siman yit raki ti mwatan i mayel, unai si lak Yeso mangga' i mwatan ameti.

³¹ Unai wa kyel amet, ka' ra amet fwangut ti luk fit. Mayeli catut ti ra, ti fas ɗama i cwai.

³² Ti ango i mweni, ɗufal si kol Yeso shak som i mwatanan, hu som i rin mafwashi.

³³ Ɗufal ta ashwai shak si suɓut ta fo i kwap i wuri,

³⁴ unai Yeso fas cala, som ima si ti mwatanan akat-akat. Ngga rin mafwashi ya hyang, sha rin mafwashani findel, ɓurti si shangus.

Yeso Kang Ɗyus ya Fwal DeeƁwe

³⁵ Tamwen wititit, kaciwa' kyel ti ti kanang ya, Yeso luk fit, hon wuri, unai wis ta ya, fwal DeeƁwe ta kyel.

³⁶ Siman hu myayus si wa ɓa si farus,

³⁷ myan ima si wisus, si nyus, “Ɗufal shak si farsa!”

³⁸ Yeso matussi ni, “Ndakan ka wa ta shini kikyali hwak, ashwaha muyaiyi ima si mana anggasi, ɓurti ɓa i mba findel i DeeƁwe ta hwak. Aɗeng ima kolun na nai.”

³⁹ Unai at si ta' ti Galili shak, yis mba ti findel ta mareha ames, yis nggati rin mafwashani ya.

Yeso Fa Nggeter Cala

⁴⁰ Nin mweni ndai maɗufal nin yes kyel i Yeso. Maɗufal mai a nggeter, shu fwaran ta fisha fwalus, ni, “Na ha ɓwet, ha ndok ha sapa hun ya.”

⁴¹ Yeso ɗing shum amesi, unai ti' ra ngge' ti nggeteri, nyus, “I ɓwet, i sapa ha ya.”

⁴² Fo abet nggeterati honus, lo' ames wis cala.

⁴³ Yeso lak nggeteri ɓa u wis, dulus mwal nyai,

⁴⁴ “Halai, kan ha wa ha lak ɗeng mai aɗengi kwa. Ɓwa ha kof haisa ta kyel i makocok, ha tor kuna ima anggut i Mosis lak, ɓurti sapa ama, ɓa u kofus nyai ha wis sapai.”

⁴⁵ Nggwes i hali, ti mulangya ames, cu wei ti but ti aɗeng ima Yeso masusi. Ɓurti andi, Yeso wis mulang ta ashwai ta shishat i ɗufal kwa, tak mute ta saikyel tawe. Shak ta andi, ɗufal si cu wei ti yes kyel ames ta kikyal.