Matyu 9 - Findel i DeeƁwe Ti Alis i Ron

Yeso Fa Mashok Lo' Cala

¹ Yeso lang ta kwang i ham, pis ta fit ti yes ashwa ames.

² Unai shini ɗufali si kolus maɗufal nin ima lo' ames shokus, yis raki si lapan hai. Myan ima Yeso ɗing ngga' ima si fa mulut ta, unai lak maɗufal ima lo' ames shokusi ni, “A al amen, jakaka! Si shwa mafwashi ama ya.”

³ Unai shini som kofiti si anggut hai si lak ɗiyai ames si ni, “Maɗufal mai ma findel i ale'!”

⁴ Yeso shang ambe' ames, nyus, “A ɓurti mi hu ambe' mafwashi ta mulwat amu ya?

⁵ Anggi ɓin mbwesh ya, ima si ni, ‘Si shwa mafwashi ama ya,’ ahun si ni, ‘Luka fit, ha wa ya?’

⁶ I wa kofsu ɓa hu shangi nyai, Al i Maɗufal mati mbaitat i shwaiti mafwashi ya na naya.” Unai lak maɗufal ima lo' ames shokusi ni, “Luka fit, zana lapan ama, ha wa wur.”

⁷ Maɗufali luk fit wis wur.

⁸ Myan ima suɓut i ɗufal si ɗing aɗeng mai, si shok na fwai, si ha' asum i DeeƁwe fit, yis ima fa ɗufal musut i mbaitat mai.

Yeso Lai Matyu

⁹ Ta ta'i, myan ima Yeso cu wei ti ɗa'at, ɗing maɗufal nin ma asum Matyu, yis amun ta kyel i mati cef i wufen, nyus, “Kolafai asuni,” unai Matyu luk fit kolfai asussi.

¹⁰ Myan ima Yeso yis cwai ti cwa i mukon ta wur i Matyu, som hyang i mat ti cef i wufen hu ima si laiyus ii “som mufwashi” si yes si cu tikul hu fe i ro ames.

¹¹ Myan ima Farisiyawa si ɗing aɗeng, mai, si lak fe i ro amesi si ni, “Ami kin makofiti amu ma cwai ma woi hu som i mati cef i wufen hu som mufwashi ya?”

¹² Ti hal ti mai unai Yeso nyus, “Som ima si ti cala si wai kyel i mamanda kwa, a som mwatan.

¹³ Ɓu hu mas ambe' ami mai aɗengi ma laki ya, ‘I ɓwet ti gu'ti ashur, a tor ti kuna kwa.’ I yes ɓa i lai a som munderei kwa, a mufwashani.”

Ka'ti Fo ya tasi Cwa Hai

¹⁴ Mwen nin, fe i ro i Jwon si yes si lul ta Yeso, si ni, “Ami kin nin hu Farisiyawa ni kaa' fo ya tasi cwa hai, ɗak fe i ro ama si kaa' fo ya tasi cwa hai kwa ya?”

¹⁵ Yeso nyus, “Ma wa mas si ni, mwalmwat i zalang makunggo si kikyau ti mulwat myan ima sin tikul haa? Myan ma yes ima si wa zan ti zalangi ya ta kyel ames, ɗak si ka' fo ya tasi cwa hai.

¹⁶ “Maɗufal zan ɓalang i fagin mamwayi, u tor tasi hai i fagin mawili kwa. Ɓalang mamwayi ma wa nggi' ti fagini ya, gwyaki u ɓin ima ai rafat.

¹⁷ Maɗufal shwai ham i manggɓu' ta wii i rukul mawili kwa. Na masi andi, hami na can u taɗas rukuli ya, u wis ya, rukuli hwak u rafatus. Wayou, maɗufali ma wa shwaiti ham i manggɓu' ta rukul mamwai wi.”

Al Mumoti hu Mbor Mumwatan

¹⁸ Yis saa ti laksus findel mai, mbai nin yes shu i mafwaran ta wei yusti ni, “Al asun ti motut mumwash ati. Ya ha zanut fit, ɓa ti humkyel mushet.”

¹⁹ Yeso luk fit kolfai asussi, fe i ro ames hwak si kolfai asussi.

²⁰ Unai mbor nin tima mwatan i waya i wash, tima ti kofti asuti wilyal hure mulang apil, ti yes ta takfai ames, ti ngge' fo i fagin ames.

²¹ Ti lak ta mulut amet nyai, “Na i ngge' fo i fagin ames kyek i wa njeng.”

²² Unai Yeso hatat ɗingut fo, nyut, “A al asun, jakak shi! Fati mulut amesh fash cala.” Si myani, mbori ti wis cala.

²³ Myan ima Yeso lang ta wur i mbai nin, ɗing som i fu' ti njungkulet i shaat, hu ɗufal hyang sin bom.

²⁴ Unai ni, “Hun wa nati. Ali ti mot kwa, tima raki.” Si musasus.

²⁵ Suɓut i ɗufali si rangya ta saikyel, yis lang ta ka' ra i ali, unai ti luk fit.

²⁶ Findel mai nggu' ta'i shak.

Yeso fa Manzyau hu Mandu' Cala

²⁷ Myan ima Yeso lang ya ta kyeli, manzyau shini apilal si kolfai asussi sin lai ti njeng nyai, “Gu'a nin ashur, a Al i Devid!”

²⁸ Myani, tuu langus ta wii wur, unai manzyauwauwi si yes kyel ames. Yeso nyus, “Hu fa mulut nyai, i ndok ɓa i fu cala haa?” Sin si ni, “Hei, a Deembai.”

²⁹ Unai ngge' shishat ames nyus, “Ɓa u tehu hai ta ngga' ima hu fa mulut ta.”

³⁰ Unai shishat ames si maɓu ya. Ɗak Yeso dulus mwal fwet nyus, “Ka hu ɓwet ɗeng u hal findel mai kwa.”

³¹ Shak ta andi, si rangya si but findeli ta si ta'i hai shak.

³² Myan ima sin mulangya ndai, shini sin yes ti maɗufal nin ma rin mafwashi ta kyel i Yeso.

³³ Yeso re' rin mafwashii ya, unai maɗufali lang findel. Suɓut i ɗufal si shok na fwai si ni, “Mai aɗengi, a ɗama mamwai na Isar'ila.”

³⁴ Shak ta andi, Farisiyawa si ni, “A ti njeng i makai i rin mafwashi, re' ti rin mai ya.”

Som i Ro Si Yus Ndyong

³⁵ Yeso at ta shak ashwaha mbayai hu muyayi, yis kofiti ta mareha ames, yis lak ti Muro Maɗesi i kaitat i DeeƁwe, yis fati som cala ima si ti mwatanan akat-akat hu han i lo'.

³⁶ Myan ima ɗing suɓut i ɗufal, ɗing shum asussi, ɓurti si yus kaciwa' bum, fota tutwai kaciwa' maɗingsus.

³⁷ Unai lak fe i ro ames ni, “Karat tima hyang, ɗak som roi si yus ndyong.

³⁸ Fwal hun Deembai i karat, u tuku som ro wa ya ɓa si masus karat.”