Matyu 8 - Findel i DeeƁwe Ti Alis i Ron

Yeso Fa Nggeter Cala

¹ Myan ima ɗor ya ta ajin i manggash, suɓut i ɗufal hyang si kolfai asussi.

² Unai nggeter nin yes kyel ames, shu i mafwaran fwalus nyai, “A Deembai, na ha ɓwet, sapa hana ya.”

³ Unai Yeso ti' ra ames ngge'us ni, “I ɓwet, i sapa ha ya.” Nggeteri wis sapa fo abet.

⁴ Unai Yeso nyus, “Kolai loo, ka ha lak ɗeng ɗama kwa. Ɓwa kyel i makocok u ɗinga, ha fa mal ima anggut ima Mosis lak, ɓa ha kofus ha wis cala.”

Fati Mulut i Maɓwol

⁵ Myan ima Yeso lang ta Kapanahum, mbai i maɓwol nin yes kyel ames fwalus,

⁶ ni, “A Deembai, yere amen ma raki ta wur, lo' ames shokus, ma woti shum fwet.”

⁷ Yeso nyus, “I wa yes ɓi fas cala.”

⁸ Unai mbai maɓwoli ni, “A Deembai, i ndok ɓa ha wa wur amen kwa. Na ha findel kyek yere amen ma wa njeng.

⁹ Ɓurti yin i ta mabel i ɗeng, som i ɓwol si na mabel yunti hwak. Na i lak mai, ‘Ɓwa,’ u wa, i lak mandeki, ‘Yaa,’ unai u yes. I lak ma masun ro i nyus, ‘Masa hat,’ u masi.”

¹⁰ Myan ima Yeso hal findel mai, shok na fo fwet, ɗak lak som ima si koltifai asussi ni, “I laksu mwawei, tii wis ɗeng ima mati fati mwawei na Isar'ila musuti mai kwa.

¹¹ I ma laksu, hyang si wa yes ta muɗu ɓweti hu ɓwe ti ndak. Si wa wis ti kikyal i mute si cu si wo hu Ibirai hu Aizik hu Jakop ta kaitat i kyel fit.

¹² Ɗak si wa hwyaiyan ti fe i kaitat ya ta maɓing wi, kyel ima si wa kawa sin nggwaran ti ra ya ta.”

¹³ Unai Yeso lak mbai maɓwoli ni, “Ɓwa! Ɓa u te fota ngga' ima ha fa mwawei ta.” Tasi myan ani, yere ames wis njeng.

Yeso Fa Ɗufal Hyang Cala

¹⁴ Myan ima Yeso lang ta wur i Pita, ɗing kasus yit raki ti mwatan i mayel.

¹⁵ Unai ngge' ra amet, mayeli wakut i ra, ti luk fit ti ɗihus cwa.

¹⁶ Myan ima ango ti mas, si kolus som hyang ima rin mafwashi rangus hai. Yeso fa som mwatanan shak cala, ti findel kyek, rin mufwashani si rangya.

¹⁷ Mai hya laki i mashit Ishaya nyai, “Yis zan mwatan i lo' aminin ya, zan mwatanan aminin ya hwak.”

Shum i Koltifai ti Yeso

¹⁸ Myan ima Yeso ɗing ɗufal hyang si nggarus ya, unai lakus ni ɓa si pis ta ɓwai i yiir mandeki.

¹⁹ Unai makofiti si anggut hai nin yes nyus, “A makofiti, i wa koltifai asai shak kyel ima ha wa ta.”

²⁰ Yeso humus ti kyel nyus, “Kyara i fyarai si mati humam ames, avyash si mati wurai ames, Al i Maɗufal mati kyel i mukon kwa.”

²¹ Nin ta saa ti fe i ro amessi nyus, “A Deembai, hona i wa i lai deen tawe.”

²² Yeso matussi ni, “Kolafai asuni, hona funat si lai funat ames.”

Yeso Kin Upelem Ti Rak Cakat

²³ Unai lang ta kwang i hami, fe i ro amessi sin tifai asussi.

²⁴ Unai mɓiring andi kyek, upelem nin ti nyan ti luk fit ta yiiri, hami yis wangan yis murang ta wii i kwangi wi. Yeso yis yus raki.

²⁵ Som i koltifai amessi si wa si ɓushos, si ni, “A Deembai, buma kan, ka wa mufot!”

²⁶ Humus ti kyel nyus, “A ɓurti mi hu mwen a ti ya? Hu mati fati mulut matoi fwet.” Ɗak luk fit, ti' upelemi ra hu wangan i hami, unai kyel ti kat ya cakat!

²⁷ Ɗufal si shok na fwai si lul lul, “Anggi musut i maɗufali mai, ima upelem hu wangan i ham si halsus ya?”

Yeso Fa Ɗufal Apilal Cala

²⁸ Myan ima ndok ta ɓwai mandeki i ta' ti Gadara, ɗufal shini apil ima si ti rin mafwashi si wa si wisus. Kyel i mute ames i ɗufal mii a ta fiyayai wi, si mati ɓin fwet, ɗeng saa ta ngga' i kyel ima si ti mute ta kwa fweng.

²⁹ Unai si gu' raafo si ni, “Ami ama ta ti nin ya, ha Al i DeeƁwe? Ha yes nati ɓa ha fanin shum, kaciwa' myan ti si ndok haa?”

³⁰ Ta maleng yusti, si ɗing male' nggishash sin cwa.

³¹ Unai rin mufwashani si fwalus si ni, “Na ha wa re' sinin ya, kabuk tuka nin ta nggishash ani wi.”

³² Yeso nyus, “Ɓu!” Unai si rangya si rang ta nggishashi wi. Shak nggishashi si rang ti maraf muɗor ta wii i yiir wi, si ndaak ta yiiri si mwat.

³³ Som ima si ɗing ti nggishashi ta si tital, si rang ta ashwai si lak shak ɗamam ima wisus, ta aɗeng ima wis som ima si hya ti rin mafwashi.

³⁴ Unai shak ɗufal i mashwai si rangya si shwai hu Yeso. Myan ima si ɗingus, si fwalus ɓa u hon ta'i fweng.