Matyu 6 - Findel i DeeƁwe Ti Alis i Ron

Kofiti i Yeso Si Hai i Fai

¹ “Kam hun, kan ro ti mute manderei asu ta wei i ɗufal, tyos ima ɓa si ɗingi kyek kwa. Na te andi, Deembai amu i kyel fit ma wa fasu mal kwa.

² “Ɓurti andi, na ha wa fati mal wa kyel i som jyel, ka ha fu' ti ngyef fota ngga' ima som i gbaf si masi ta mareha hu fiselal kwa. Si masi andi ɓa si wis ngye ta kyel i ɗufal. I laksu mwawei, ti si mat mal ames shak ndai.

³ Myan ima ha wa fati mal wa kyel i som jyel, ka ha hon ra i ukutyal ama u shang aɗeng ima ra i ucwa ama ma masi kwa,

⁴ ɓa mali u te ta mufot wi. Unai Dya ima ma ɗyangan ti ɗamam ima si masi i mufot, ma wa fasa mal.

Kofiti i Yeso Si Hai i Fwal ti DeeƁwe

⁵ “Myan ima hun fwal ti DeeƁwe, ka hu te fota som i rere kwa, ɓurti si ɓwet fwal ti DeeƁwe i mamangra ta mare hu ta fiselal ɓa ɗufal si ɗingus. I laksu mwawei, ti si mat mal ames shak ndai.

⁶ Myan ima hun fwal ti DeeƁwe, lang hun ta ɗom hu vo fo i mahomi ya, hu fwal Deemu ima si ɗyangus kwa. Unai Deemu ima ɗyang aɗeng ima si masi ta mufot wi, ma wa talsu myatat.

⁷ Myan ima hun fwal ti DeeƁwe, ka hu tot dinggiling fota som ima wa' si shang DeeƁwe kwa. Si ɗingi fota si wa halsus ɓurti findelal muhyangi ames.

⁸ Ka hu te fota sin kwa, ɓurti Deemu shang aɗeng ima hu ɓweti kaciwa' ti hu fwalus.

⁹ “Ɓurti andi, ngga' ima hu wa fwal ti DeeƁwe ta mai, “ ‘Deeminin i kyel ta fit, ɓa asum asa ti te ti sapa.

¹⁰ Kaitat asa ti yes, aɗeng ima ha ɓweti ni masus na naya, fota ngga' ima si masus ta fit.

¹¹ Faha nin cwa aminin i kwai.

¹² Shu ha nin mafwashani aminin ya, fota ngga' ima ni shwayan ti som ima si mas nin mafwashani ya ta.

¹³ Ka ha kol nin ta kyel i amba kwa, buma nin ta kyel i Madang.’

¹⁴ “Ɓurti na hu shu ɗufal mafwashani ames ya, Deemu i kyel ta fit ma wa shwaisu amu ya.

¹⁵ Na hu shu ɗufal ames ya kwa, Deemu ma wa shwaisu amu mafwashani ya kwa hwak.

Kofiti Si Ka'ti Fo Ya si Cwa Hai

¹⁶ “Myan ima hun ka'ti fo ya tasi cwa, ka hu rimya' shishat ya fota ngga' ima som gbaf si masi ta kwa. Si masi ɓa si kof ɗufal nyai si ka'ti fo ya tasi cwa. I laksu mwawei, si mat mal ames shak ndai.

¹⁷ Myan ima hun ka'ti fo ya tasi cwa, sa hun shishat amu ya, hu fyal mbar ta hai,

¹⁸ ɓurti ka ɗufal si shangi hu ka' fo ya tasi cwa kwa, a Deemu je ima si ɗyangus kwa. Deemu ima ɗyang aɗeng ima si masi ta mufot wi, ma wa talsu myatat.

Suɓut ti Sufat ta Fit

¹⁹ “Ka hu suɓut haisu sufat na naya kwa, kyel ima ɗam i lok, hu yoor si wa rafati ya, kyel ima asher si wa ɓaki ya si shir ya hwak.

²⁰ Suɓut hun haisu sufat ta fit, kyel ima ɗam i lok, hu yoor si wa wis ti rafati ya kwa, kyel ima asher si wa wis ti ɓaki si shir ya kwa.

²¹ Kyel ima sufat ama mata, a kyeli mulut asa tita.

²² “Shishat a mukof i lo'. Na shishat ama sin ii muɗesi, andi shak lo' ama ma wa hya ti kweneng.

²³ Na shishat ama si yus ti mwatan, shak lo' ama ma wa hya ti maɓing. Na kweneng ima mata wii yati tyos i maɓing, maɓingi ma wa mute atini ndai ya?

²⁴ “Maɗufal ndok u fa kaya apil ngye kwa. A kpang u nggwes ti andek, u ɓwet mandeki, ahun u fa hai wa kyel i andek, u mas gbya' ti mandeki. Ha wa fati cef ngye, ha fa DeeƁwe ngye myan andek kwa.

Ka hu Tirim Kwa

²⁵ “Ɓurti andi i ma laksu, ka hu tirim si mupwet amu hai kwa, nyai, ami hu wa cwai, hu ami hu wa woi, hu mangga' i lo' amu, nyai ami hu wa ti voti lo' amu ya. Mupwet ti ɓin cwa kwa haa? Lo' ɓin arom kwa haa?

²⁶ Ɗing hun avyash. Si lai kwa, si karat karat kwa, si suɓwat cwa ta hotat kwa. Shak ta andi, Deemu i kyel fit ma fayansus cwa i cwai ames. Hun hu ɓinus mbaitat kwa haa?

²⁷ Awe na saa asu, ɓurti tirim, ndok ɓa u dya' myan ndyong si mukonan i mupwet ames hai ya?

²⁸ “Na andi, ami kin hu tirim hai i arom i ru'i ya? Ɗing hun mabuf i ya, ngga ima si ngye ta. Si mas ro hu lat ti ɗama kwa.

²⁹ Shak ta andi, i laksu, Makai Solomon ta sok ti arom i ngye amesi, ɗat kol andek na saa ti mabuf mii kwa.

³⁰ A awei, DeeƁwe sok falan arom, ima si mana kwai, wasan si hwitus ta man wi. Ma wa hon su hun kaciwa' shwaisu arom haa? Hun som fati mulut ndyong!

³¹ Ɓurti andi, ka hu tirim nyai, ‘Ami hu wa cwai? Ami hu wa woi? Ami ni wa ru'i ya?’ kwa.

³² Som ima si shang DeeƁwe kwa, a sin sima far ti musut i ɗamam mii shak. Deemu i kyel fit shangi hu ɓweti ɗamam mii.

³³ Ɓurti andi ti bya', far hun kaitat hu mute manderei ames, shak ɗamam mii si wa fasu hwak.

³⁴ Ka hu tirim ti wasan kwa, ɓurti wasan ti yes ti tirim i haisut. Mwen andek ti ti tirim i haisut.