Matyu 5 - Findel i DeeƁwe Ti Alis i Ron

Taɓak i Disyo'

¹ Myan ima Yeso ɗing suɓut i ɗufal, unai ɗu tasi ajin i manggash te amun. Fe i ro amesi si yes kyel ames,

² fur kofsus ti nyai,

³ “Disyo' si som jyel i rin, ɓurti kaitat i kyel fit a ames.

⁴ Disyo' si som shaat, ɓurti si wa wis ti jop ti mulut.

⁵ Disyo' si som i hai muɗyayi, ɓurti si wa cwai ti kop i naya.

⁶ Disyo' si som hwem hu myaf i mute manderei, ɓurti si wa talsus myatat.

⁷ Disyo' si som i gu'ti ashur, ɓurti si wa gu'sus ashur.

⁸ Disyo' si som mulut musapai, ɓurti si wa ɗing ti DeeƁwe.

⁹ Disyo' si som mute cala hu ɗufal, ɓurti si wa laisus ii fe i DeeƁwe.

¹⁰ Disyo' si som ima si fasus shum ɓurti mute manderei, ɓurti kaitat i kyel fit a ames.”

¹¹ “Disyo' si hun hai myan ima som si se'u, si fu shum, si lefu fyarat hai akat-akat, ɓursun.

¹² Jakak hun hu pipel na mulut fwet, ɓurti mal amu mii mbai ta fit. Angga' ima si kof som shit ima si tongu na nai.”

Amma hu Kweneng

¹³ “Hun a amma i naya. Na ammai mimya kwa, ami ma wa kinti ammai u hum mimyat ya? Wis gbya' ndai, ɗat ames ashwai ya ɗufal si tindaki.

¹⁴ “Hun a kweneng i naya. Ashwa ima si ta' si fwere hai fwat kwa.

¹⁵ Ahun ɗufal si lwa' mukof si vo ya ti mbai kwang waak? I nyai, si kyan tasi kwetleng hai, ɓa kweneng u ka' ta wuri shak hoo?

¹⁶ Angga' ima hu wa honti kweneng amu u ka' si ɗufal hai, ɓurti ɓa si ɗing roha amu maɗesi, si fa Deemu ima mata fit ngye nai.

Hya i Anggut

¹⁷ “Ka hu kin mulut nyai i yes a nggul ti Anggut ya, hu kofiti i Som Shit kwa. I yes a ngguli ya kwa, a hyai.

¹⁸ I ma laksu mwawei, kaciwa' fit hu fisha si mbit, foti worong nin na Anggut ma wa mufot kwa, shak aɗeng ima si lak a kpang hu hya.

¹⁹ Shak maɗufal ima nggyel anggut andek ya na saa ti mii, hu kofti shini ɗufali si masi andiyi, si wa laisus ii mavaati ta kaitat i kyel fit. Shak maɗufal ima masi hu kofti shini hwak, si wa laisus ii mambai ta kaitat i kyel fit.

²⁰ I ma laksu ndai, na ro manderei amu ɓin i Farisiyawa hu i som kofiti si anggut hai kwa, mwawei ndai hu wa mulang ta kaitat i kyel fit kwa fweng.

Kofiti i Yeso Hai i Futut

²¹ “Hu hali si lak ɗufal ima ai i hwer, nyai, ‘Ka ha for maɗufal kwa, shak maɗufal ima for ɗeng, ɓur ti wa cwaisus.’

²² Yin i ma laksu, shak maɗufal ima mas futut ti nusus kyek, ɓur ti wa cwaisus. Shak maɗufal ima lak nusus, ni, ‘Ha a haling!’ Si wa watus ta fo i Kaya. Shak maɗufal ima lak nusus ni, ‘Ha a maɗufal i gbya' kyek!’ Ma wa mulang ta wur i man.

²³ “Ɓurti andi, na ha fati mal ta wei i DeeƁwe, ɗak ha mbe' nyai nusa ma futut ti ha,

²⁴ hona mali ta wei i DeeƁwe tawe, ha wa hu ɗak ti ta hu nusa. Ɗak ha yes ha fa mal amai.

²⁵ “Nya mwat ha ɗak ti findel hu maɗufal ima ma kolsa ta fo ɓur ti. Mas huni hun ɗiri ta fisel ma wa' hu ru ta kyel i maɓuri. Na andi kwa, ti muru amu ma wa fati maɓuri ta ra, maɓuri u ti'a ta ra i maro, yis u hwita ta wur i shitam.

²⁶ I ma laksu mwawei, hu wa mulangya nanati kaciwa' hu tal shak cef ima si lefui kwa.

Kofiti i Yeso Si Hai i Kolti Mbor ti Ɗeng

²⁷ “Hu hali si lak nyai, ‘Ka ha mas arak i zuruk hu mbor ti ɗeng kwa.’

²⁸ Yin i ma laksu, shak maɗufal ima ɗing mbor ɗingi i gwel kyek, tuu mas arak i zuruk hu mbori ta mulut ndai.

²⁹ Na shit ti ucwa asa ti wa kinsa masti mafwashi, re'a ya ha hwiti ya. Ma wa ɓinsa ɗat ha far andek ta saa ti ɓwai i lo' ama wet, hu ima si hwiti lo' ama shak ta wur i man.

³⁰ Na ra i ucwa ama yis wa kinsa masti mafwashi, lefa ya ha hwiti ya. Ma wa ɓinsa ɗat ha far andek ta saa ti ɓwai i lo' ama wet, hu ima si hwiti lo' ama shak ta wur i man.

Kofiti si Matkar i Kunggo

³¹ “Si hum nyai, ‘Shak maɗufal ima wak mbor asus ii ra, u fat kaada i for ti kunggo ya.’

³² Yin i ma laksu nyai, shak maɗufal ima for kunggo, ma wa' a ɓurti arak i zuruk kwa, kinut ta fisel ti arak i zuruk ndai. Shak maɗufal ima kunggo mbori, mati mafwashi i arak i zuruk hu yit ndai.

Kofiti si Shiɗat Hai

³³ “Hu hali si lak ɗufal ima ai i hwer, si ni, ‘Ka ha mas shiɗat i fyarat kwa, hyaha shiɗat ima ha mas Deembai yi.’

³⁴ Yin i ma laksu, ka hu ra'u shiɗat ti fit kwa fweng, ɓurti a kyel i kunggul ti mute ti DeeƁwe.

³⁵ Ka hu shiɗat ti fisha kwa, ɓurti a kyel i shwaiti sisai ames. Ka hu shiɗat ti Yerushalima kwa, ɓurti ayit a ndyi ti ashwa ti Makai Mbai.

³⁶ Ka ha shiɗat ti hai asa kwa, ɓurti ha shang ngga' ima ha hatat ti sya andek ti hai i anggar ti te i mukyawi kwa.

³⁷ Aɗeng ima hu wa laki, u te ‘Hei’ a ‘Hei,’ hu ‘Wayou’ a ‘Wayou.’ Ma lang mai ii hai, yes ii ta kyel i ma Mafwashi.

Kofiti i Yeso Si Weri Hai

³⁸ “Hu hali, si ni, ‘Shit fo i shit, anggur fo i anggur.’

³⁹ Yin i ma laksu, ka hu nggyu ti maɗufal ima mas mafwashi kwa. Na ɗeng paha na kapak i ucwa, hatata yus ti mapili hwak.

⁴⁰ Na ɗeng yis ɓweti kolsa ta wur i ɓur ɓa u mata fagin asa ya, hona yus mogo ama hwak.

⁴¹ Na ɗeng kina a at i mel andek kanggang, ata tus i mel apilal.

⁴² Maɗufal ima fwala, Faha yus. Ma far ti ahof ta kyel ama, ka ha shahus kwa.

Ɓweta Ma Zan ti Wei ti Ha

⁴³ “Hu hali, ai si ni, ‘Ɓweta nusa, ha nggwya ti ima nggweta.’

⁴⁴ Yin i ma laksu, ɓwet hun som ima si nggwetu, hu fwal DeeƁwe ɓurti som ima si fasu shum.

⁴⁵ Ta fisel ti masi andi, hu wa mute ii fe i Deemu i kyel fit. Ayis kyan ɓwe asus ti ka' si som i mafwashi hai, hu som i maɗesi hwak. U shu foon si ɗufal munderei hu ima si ndere kwa.

⁴⁶ Na hu ɓwet som ima si ɓwet su kyek, a mal i mi hu wa wisi ya? I nyai, angga' ima som i mati cef i wufen si massi nai hoo?

⁴⁷ Na hu to' a shunu kyek, ami hu masi ima ɓin i shini ya? I nyai, angga' ima som ima si shang DeeƁwe kwa si masi ta nai hoo?

⁴⁸ A kpak hu hya nggya-nggya, fota ngga' ima Deemu i kyel fit hya ta nggya-nggya.