Matyu 4 - Findel i DeeƁwe Ti Alis i Ron

Shatan Mba Yeso

¹ Unai Rin kol Yeso ta saa ti ya ɓa madangi u mbahus.

² Yeso ka' fo ya tasi cwa i mukonan hure ɓaras fo' ta reni, ta takfai hwem ti hanus.

³ Unai ma ambai yes nyus, “Na ha a Al i DeeƁwe, kina afyai mii si te ii folok.”

⁴ Unai Yeso matussi ni, “Si worong nyai, ‘A ti folok je maɗufal ma wa mupwet kwa, a ti shak findel ima lang ya ta fo i DeeƁwe.’ ”

⁵ Unai ta te'i, madangi watus ta ashwa masapai, kinus te mangra ta mbet i Wur i DeeƁwe.

⁶ Ɗak nyus, “Na ha a Al i DeeƁwe jika ya na fisha,” ɓurti si worong nyai, “ ‘Ma wa ro ti som lu' ames ɓursa, si wa fwangsa ti ra ames, ka ha bukat si afung hai.’ ”

⁷ Unai Yeso humustikyel nyus, “Mata worong wi hwak, nyai, ‘Ka ha mba Deembai DeeƁwe ama kwa.’ ”

⁸ Madangi hum kolsus ta hai i rem masyai nin, ɗak kofus ti shak kaitat i naya hu ngye ames.

⁹ Unai hum nyai sus, “Shak mii i wa fasa, na ha shu i mafwaran ha cuhun afut.”

¹⁰ Unai Yeso nyus, “Herana ya nati, ha Shatan! Si worong nyai, ‘A Deembai DeeƁwe ha wa cwaisus afut, a yis je ha wa massus ro.’ ”

¹¹ Ta te'i, madangi honus, som lu' i DeeƁwe si yes si mbo'us mulut.

Yeso Ɓo Mba ti Findel i DeeƁwe

¹² Myan ima Yeso hali si ka' Jwon, si kolus ta wur i shitam, unai humkyel ta ta' ti Galili.

¹³ Ti bya' tong wa Nazaret, ɗak wa Kapanahum ti mute, ashwai mata fo i yiir ta ngga' ta' ti Zabulun hu Naftali.

¹⁴ Mai hya laki i mashit Ishaya nyai,

¹⁵ “Shish, ta' ti Zabulun ta ta' ti Naftali, fisel i wa yiir, ta ngga' i Ɗara i Jodan, Galili ti Ramam,

¹⁶ Som ima si ti mute ta maɓing wi si ɗing mbai kweneng, tasi som ima si mute ta ya i manjiling i mot, kweneng pwak ya.”

¹⁷ Tasi myani, Yeso ɓo mba ti findel i DeeƁwe, yis nyai “Hatat hun, ɓurti kaitat i kyel fit kat anggasi.”

Fe Ro i Bya' ima Yeso Laiyus

¹⁸ Yeso yis ati ta fo i Yiir i Galili ndai, ɗing som apilal, shunus i ɗiyai, Siman ima si laiyus ii Pita hu nusus Andru. Sin muhwiti takal i gong ti gushe ta yiir wi, sin a som i gong ti gushe.

¹⁹ Yeso nyus, “Kol hun fai asuni, i wa hatat tu ii som hatat ti ɗufal yes kyel amen.”

²⁰ Fo abet si wak takal i gong ti gushei ii ra, si kolfai asussi.

²¹ Cu wei vaat, unai ɗing ɗufal apilal shini, sin hwak a shunus i ɗiyai, Jemis al i Zebedi hu nusus Jwon. Sin ta wii i kwang i ham hu dees Zebedi, sin ɗak ti takalal ames ta. Yeso laiyus,

²² fo abet si hon kwang i hami ta hu dees, si kolfai ti Yeso.

Yeso Bum Ɗufal Hyang

²³ Yeso at ta ta' ti Galili shak, yis kofiti ta mareha ames, yis mba ti Muro Maɗesi i kaitat i DeeƁwe, yis fati som cala ta shak mwatanan akat-akat.

²⁴ Findel si Yeso hai, nggar ta' ti Sirya ya, ɗufal si kolus shak som ima si ti cala kwa. Yeso fa cala wa kyel i som ima si ti mwatanan akat-akat, hu ima si kolfai asussi, hu ima rin mafwashi no'us ya, hu ima si masti maɓyar, hu ima si yus ii gundung. Shak asussi fas njeng.

²⁵ Suɓut i ɗufal ta ta' ti Galili, hu Dekapolis, hu Yerushalima, hu Judya hu ta fit Ɗara i Jodan si kolfai asussi.