Matyu 3 - Findel i DeeƁwe Ti Alis i Ron

Jwon Mabatisma Ɗak ti Fisel ta

¹ Tasi myan mii, Jwon Mabatisma yes yis mba ti findel ta ya i Judya,

² yis nyai, “Hatat hun, ɓurti kaitat i kyel fit kat anggasi.”

³ Mai a maɗufal ima mashit Ishaya lak findel ames, ni, “La nin ti lai ti lai ta ya, ‘Ɗak hun ti Deembai fisel ta, tas hun fiselal ta ɓursus.’ ”

⁴ Arom i Jwon si massi ti sya i rukumi, mas ro ti fata' no' ti ɗar ya, cwa ames a langgash hu ham i wan.

⁵ Unai ɗufal ta Yerushalima hu i shak Judya, hu i shak ashwaha ima si ta fo i Ɗara i Jodan sin yes kyel ames.

⁶ Sin lak ti mafwashani ames ya, yis masus batisma ta Ɗara i Jodan.

⁷ Myan ima Jwon ɗing Farisiyawa hu Sadukiyawa hyang si yes kyel ima ma masti batisma ta, unai nyus, “Hun suɓut i uɗuko shini! Awe dulu mwal ɓa hu tital futut i DeeƁwe ima ma yes fo ya?

⁸ Mas hun roha ima wa kiga' hu hatat amu.

⁹ Hon hun nggwak ti ajin nyai, ‘Ibirai a deeminin.’ Ɓurti andi, i ma laksu, DeeƁwe mati mbaitat u lu' ɗufal nasi afyai mii wi, si te ii fe i Ibirai.

¹⁰ Mwashi ati, ti si kin fo i gaya' ta gung i yit. Shak yit tima wa' ti al fe muɗesi, si wa telsut ya si hwiti ta man wi.

¹¹ Yin ima massu batisma ti ham, ima ma kofti hatat amu. Yis ima ma yes na takfai amen, ɓinun mbaitat. Kpakasak ames kyek i ndok ɓa i har kwa. Ayis ma wa massu batisma ti Rin Masapai hu man.

¹² Kaɓor ames mata ra yusti, ma wa vitti mwii ya ta macwa wi, u suɓut macwai u shuya ta hot, ɗak lu' mwii yi ya ti man i myan hu myan.”

Batisma I Yeso

¹³ Nasi myan mai, Yeso ru ta Galili, wa Ɗara i Jodan ɓa Jwon u massus batisma.

¹⁴ Jwon yis ɓweti ɓa u nggwes, ni, “Yin i ɓweti ɓa a ha ha massun batisma, ha yashta kwa ha yes kyel amen haa?”

¹⁵ Yeso humus ti kyel ni, “Hona u te andi mwashi, mati ɗat ku massi ati, ku hya mute manderei shak.” Ɗak Jwon ɓwet ɓa u massusi.

¹⁶ Ti masti Yeso batismai, lang ya ta ham wi, fit maɓu ya, ɗing Rin i DeeƁwe yis muɗor fota gurguta, furus hai.

¹⁷ Unai si hal la nin ta fit ti ni, “Mai a Al amen, ima i ɓwetsus, ima ti pipelat na mulut ɓursus fwet.”