Matyu 28 - Findel i DeeƁwe Ti Alis i Ron

Muluk Fit ta Mot

¹ Takfai ti Mwen ti Lafos, tasi mwen ti bya' ti mukonan, Uryam ta Magdala hu Uryam mwandeki si wa ɓa si ɗing kyel ta fiyai.

² Kaciwa' shangi si mas a ro i ta' manjengi, ɓurti malu' i Deembai ɗor ta fit, wa ta fiyaiyi, tuk afungi ya ɗak te amun i hai.

³ Mute ames ma fota nzilwit, ɗak arom ames pipel ya fota fyu.

⁴ Som i ɗing ti kyel ya si mwenus fo fwet, si ro jiir, si tes fota funatat.

⁵ Malu'i lak arofi ni, “Ka hu mwen kwa! I shangi hu far ti a Yeso, ima si nggwak tasi shanggam hai.

⁶ Mana kwa, tuu lukus fit, fota ngga' ima lak ta. Yehun hu ɗing kyel ima ai si kinus ta.

⁷ Ɗak hu wa kaang hu lak fe i ro ames, ‘Tuu luk fit ta mot, mata wei yuti wa Galili. A ta kyeli hu wa ɗingsus.’ I laku mwashi.”

⁸ Unai si hon fiyaiyi, ti myanat, shak ta andi si hya ti jakak, si tital wa lak ti fe i ro ames.

⁹ Kaciwa' shangi si shwai hu Yeso. Lak ni, “Ti ɓu kongoo!” Unai si yes kyel ames, si ka' sisai ames, ɗak si cus afut.

¹⁰ Unai Yeso nyus, “Ka hu mwen kwa. Ɓu hu lak shunun si wa Galili, a ta kyeli si wa ɗingsun.”

Laki i Som Ɗing ti Kyel ya

¹¹ Arofi si tes wa, shini som i ɗing ti kyel yai si wa ta ashwai, si lak mbai i kocoki shak aɗeng ima fur.

¹² Myan ima mbai makocoki si shwai hu kaya, si shima ti aɗeng i masi, si fa som i ɓwol male' cef hyang.

¹³ Si laksus si ni, “Hu wa nyai, ‘Fe i ro ames si yes tafo' si shirus ya hun yu ɗarak.’

¹⁴ Na findel mai ru ta mwal i makunggul, ni wa laksus, ɓa ni zanu ya ta puɓwar wi.”

¹⁵ Unai som i ɓwoli si mat cefi ɗak si masi ta ngga' ima si lakus ta. Ɗak jam mai nggar ta saa ti som Ju yes mwen moti.

Mbai Ro i Masi

¹⁶ Unai fe i ro hure mulang andeki si wa Galili, ta anggash kyel ima Yeso lakus ɓa si wa ta.

¹⁷ Myan ima si ɗingus, si cus afut, shak ta andi shini sin yus mulut apil.

¹⁸ Unai Yeso yes kyel ames ni, “DeeƁwe fan shak mbaitat i fit hu i naya.

¹⁹ Ɓurti andi, ɓu hu kin ɗufal si te ii fe i ro amen ta shak ramam i naya wi, hun masus batisma saa ti asum i Dee, hu i Al, hu i Rin Masapai.

²⁰ Hun kofusti ɓa si mas shak ɗamam ima i laku. I ma akul hu hun ngang wa dala i myan.”