Matyu 27 - Findel i DeeƁwe Ti Alis i Ron

Judas Zule' Haisus Ya

¹ Tamwen wititit, mbayai i kocokak hu tabwa' shak, si pun uɓet ɓa si for Yeso.

² Si no'us, si langtus ya si fa Pailet makunggul i Rom.

³ Myan ima Judas, ima cu kwinik, ɗingi si lef Yeso ɓur hai, kikyau na mulut. Humkyel ti cef i ugbwirik hure ataat ani ta kyel i mbayai i kocokak hu tabwa'.

⁴ Lak ni, “I mas mafwashi, ɓurti i cu kwinik i maɗufal ima ra ames hara.” Si ni, “Ami aminin ta ya? A kol asa ndai.”

⁵ Unai Judas hwis ti cefi ta Wur i DeeƁwe ɗak hon kyeli. Unai wis, wa zule' haisus ya.

⁶ Mbayai i kocokaki si zan cefi si ni, “A male' tasi anggut, ɓa si kin mai ta hot, ɓurti a cef i wash.”

⁷ Si ɓetti ɓa si mas ro ti cefi, si pwak ti kyel i masti lungai, ɓa si lai mwalmwat ta.

⁸ Ayis nai kin si laiyani ii Kyel i Wash yes kwai.

⁹ Unai aɗeng ima Yeremya mashit lak hya, nyai, “Si zan ugbwirik mupeli hure ataat, a cef ima som i Isar'ila

¹⁰ si ɓwet ɓa si tal tasi yis hai nai. Ɗak zan si pwak ti kyel i masti lungai, fota ngga' ima Deembai lakun ta.”

Yeso Ta Wei i Pailet

¹¹ Si yes ti Yeso ta wei i makunggul Pailet, ɗak makungguli lulus ni, “A ha a makai i som Ju haa?” Yeso matussi ni, “Hei, fota ngga' ima ha lak ta.”

¹² Myan ima mbayai i kocokaki hu tabwa'a' si sya'us, matus findel nin kwa.

¹³ Unai Pailet lulus ni, “Ha hal findelal ima si laki na hai ya ti kwani?”

¹⁴ Yeso shenusi kwa fweng, makungguli shok na fo fwet.

¹⁵ Myan i Got i Pissihai, Pailet makunggul mana wak ti maɗufal ii ra ima mata mano' wi, ima ɗufal si lul.

¹⁶ Ta myan ani, si mati mashok ti hai nin ta mano' wi, ma asum Barabas.

¹⁷ Myan ima suɓut i ɗufali si shwai, Pailet lulus ni, “Awe hu ɓweti ɓa i catu ii ra ya. A Barabas, hun a Yeso ima si lai ii Kristi ya?”

¹⁸ Yis shangi a ɓurti nadon kin si fa Yeso ta ra yusti.

¹⁹ Myan ima Pailet yis amun ta si kunggul ti ɓur asus, mbor asus ti ro muro ta kyel ames nyai, “Ka ha mas ɗama si maɗufal ima ra ames hara a mai kwa, ɓurti i kon woti shum fwet ta fiɗyat wi kwai, ɓursus.”

²⁰ Shak ta andi, mbayai i kocokaki hu tabwa' si shuk ɗufal ɓa si ni, a Barabas ni ɓweti ha wak nin ii ra, ha kin si for Yeso.

²¹ Makungguli lulus ni, “Awe hu ɓweti ɓa i wak i ra na saa ti apilal mii ya?” Si ni, “A Barabas.”

²² Unai Pailet lulus ni, “Ami hu ɓweti ɓa i masi ti Yeso ima si lai ii Kristi ya?” Si mati shak asussi si ni, “Nggwak hun yus si shanggam hai!”

²³ Pailet lulus ni, “Anggi mafwashii masi ya?” Si mat raafo shak ti ambas nyai, “Nggwak hun yus si shanggam hai!”

²⁴ Myan ima Pailet ɗingi mati ɗama i masi kwa, ɗufal hwak sin ɓweti ring ti kyeli ya, unai zan ham sa ti ra ames ya ta wei i suɓut i ɗufali, lak ni, “Ra amen hara nasi wash i maɗufal mai. Andi a ro asu ndai!”

²⁵ Unai shak ɗufali si mati nyai, “Hona wash amesi u tena hai nin ti ta fe aminini!”

²⁶ Unai Pailet wakus Barabas ii ra. Ɗak kin si ndash Yeso, wakus i ra ɓa si nggwakus.

Som i Ɓwol si Gbaf Yeso

²⁷ Unai som i ɓwol i makungguli si zan Yeso si wa ti ta ɗom mbai ames, si suɓut shak som i ɓwoli si kinus ta saa yusti.

²⁸ Si mbwetus ya ɗak si ti'us fagin mujuwi nin,

²⁹ ɗak si lat rurwan i maren, si ru'usi ta hai. Si kinus cwang ta ra i ucwa, si shu fwaran ta wei yusti ɗak si gbafus, si ni, “Lo, a makai i som Ju!”

³⁰ Sin twafansus lyau ta shishat, ɗak si mat cwangi si sere'us ti ta hai.

³¹ Takfai tima si gbafus ya, si zan fagin mujuwi ya, si ti'us arom ames. Unai si langtus ya ɓa si nggwakus si shanggam hai.

Nggwaki

³² Myan ima sin wa ndai, unai si shwai hu maɗufal nin ta Sairin, ma asum Siman, si kinus kpak ɓa u ha' shanggami.

³³ Si wa ti Yeso ta kyel nin ima si lai i Golgota, (nyai a Kyel i Kyas i hai).

³⁴ Ta kyeli si fa Yeso ham i manggɓu', ima si futi ɗama ma ɓoli, takfai tima hali, nggwes i woi.

³⁵ Myan ima si nggwakus, si kaar arom ames ta fisel ti hwiti aben.

³⁶ Takfai ti andi si te amun, sin ɗingsus ta kyeli.

³⁷ Ta hai yusti si worong ta nyai, YESO MAI, A MAKAI I JU.

³⁸ Si nggwakus hu asher apilal, andek ta ra i ucwa, andek ta ra i ukutyal.

³⁹ Som ima si musata sin laksus findel i gbya' hai, sin kinggit ti hihai ames nyai,

⁴⁰ sin nyai, “Gbaak! Ha ima ha ni ha wa nggul ti Wur i DeeƁwe ya, ha ta' ta takfai ti mukon ataat, ɗorakyel tasi shanggami hai, na ha a Al i DeeƁwe!”

⁴¹ Andi hwak mbayai i kocokak, hu som kofiti si anggut hai, hu tabwa' si gbafus ya.

⁴² Si ni, “Bum shini, ɗak ndok ɓa u bum haisus kwa! Yis makai i Isar'ila! Ɓa u ɗorkyel ta si shanggami hai, ɗak ka fa mwawei si yis hai.

⁴³ Fa mwawei si DeeƁwe hai, ɓa DeeƁwe bumus mwashi na yis ɓwetsus, ɓurti ni, ‘Yin a Al i DeeƁwe.’ ”

⁴⁴ Andi hwak asher ima si nggwakus tikul si sya'us fwet.

Mot i Yeso

⁴⁵ Sai i ren, maɓing vo wufen ya shak, wa shitam ataat ti ango.

⁴⁶ Ta shitam ataati, Yeso kawa ti la munjengi ni, “Eloi, Eloi lama sabaktani?” Ma nyai, “A DeeƁwe amen, a DeeƁwe amen, ami kin ha mas gbya' ti yin ya?”

⁴⁷ Myan ima som ima si mangrai ta kyeli si hal mai, si ni, “Ma lai ti Iliya.”

⁴⁸ Fo abet andek ames tital wa jop dafok ta ham macani wi, ti' tasi yit ti nzong hai, ti' Yesoi ɓa u wo.

⁴⁹ Anggumi si ni, “Mwashi hon hun yus ahwes ɓa ka ɗingi ahun Iliya nan u yes u bumus.”

⁵⁰ Unai Yeso hum kawa ti la mbai, unai muluti ti ɗuk.

⁵¹ Ta myan ani fagir i Wur i DeeƁwe matkaar apil ta fit wa fisha. Fisha rwa, afyai si ɓaak.

⁵² Fiyai si matɓu, ɗufal musapai hyang ima si mwat si luk fit ti mupwet.

⁵³ Takfai tima Yeso luk fit ta mot, si lang ya ta fiyai, si wa ta ashwa masapai, ɗak si pwak ya ta kyel i som hyang.

⁵⁴ Mbai i som ɓwoli hu ima sima akul, sin ɗing ti Yeso ta. Myan ima si ɗing aro i ta' hu shak ɗamam ima fur ta kyeli, myanat ka'us, si cu wei ti nyai, “Mwawei, mai a Al i DeeƁwe!”

⁵⁵ Arof hyang sin ta kyeli, sin ɗingi ta maleng. Ai, si kolfai ti Yeso ta Galili ɓa si talus myatat.

⁵⁶ Ta saa yusti a Uryam ta Magdala, hu Uryam nati Jemis hu Josep, hu nati fe i Zebedi.

Lai i Yeso

⁵⁷ Myan ima ango ti mas, maɗufal masufat nin ta Arimatya, ma asum Josep, ima ti haisus te ii makoltifai ti Yeso.

⁵⁸ Wa kyel i Pailet, lul funat i Yeso, unai Pailet kin ɓa si fas.

⁵⁹ Josep zan funati nggi' ta lukul i lai mapeli wi,

⁶⁰ ɗak kin ta fiyai ames ima yong ta afung wi. Tuk mbai i mafung ta fo i fiyaiyi ɗak wis.

⁶¹ Uryam ta Magdala hu Uryam mwandeki sin amun ta nggas ti fiyaiyi.

Maɗing Ti Kyel Ya Ta Fiyai

⁶² Wasan, Mwen ti Lafos, mbayai i kocokak hu Farisiyawa si wa kyel i Pailet.

⁶³ Si ni, “A dee, ni mbe' myan ima yis ɗiri mushet mafyarat ani ni, ‘Takfai ti mukon ataat i wa muhum muluk fit.’

⁶⁴ Kina ɓa si ɗing fiyaiyi ta yes mwen mutaat. Na andi kwa, ka fe i ro ames si yes si shir funati ya, ɗak si lak ɗufal nyai, luk fit ta mot. Dang i dala mai ma wa ɓin ti i bya' rafat.”

⁶⁵ Pailet matussi ni, “Zan hun maɗing ti kyel ya hu wa, ɗing hun fiyaiyi ndere ngga' ima hu shangi ta.”

⁶⁶ Unai si wa si lis fo i fiyaiyi ya, si kin maɗing ti kyel ta.