Matyu 26 - Findel i DeeƁwe Ti Alis i Ron

Gbaf si Yeso hai

¹ Myan ima Yeso mbit lak ti ɗamam mii shak, lak fe i ro ames ni,

² “Fota ngga' ima hu shangi ta, Got i Pissihai kat mukon apil ta wei, si wa fati Al i Maɗufal ɓa si nggwakus.”

³ Unai mbayai i kocokak hu tabwa'a' si mas mute ta wur i Kayafas makocok mbai,

⁴ sin ɓeti ɓa si ka' Yeso i mufot ɓa si forus ya.

⁵ Si ni, “A mwen ti Got i Pissihai kwa, ɓurti kan ɓin ti luk fit ta saa ti ɗufal.”

Si Shu Yeso Mbar ta Betani

⁶ Myan ima Yeso yis ta Betani ta wur i maɗufal nin ma asum Siman Nggeter.

⁷ Mbor nin ti yes kyel ames ti mbar macef fwet ta shigira, ima ti shussi ta hai myan ima yis cwai ti cwa.

⁸ Myan ima fe i ro ames si ɗing mai, si mas futut, si lak ɗiyai ames nyai, “Ami kinti rafat mbar mai ya ya?

⁹ Mbar mai naɗin si ɗif ya ti cef hyang, na si fa som i jyel cefi.”

¹⁰ Ɓurti Yeso shang ambe' ames, lakus ni, “Ami kin hu buruk ti mbor moti ya? Ti mas ɗama maɗesi si yin hai.

¹¹ Ngang hu wa mute akul hu som jyel na saa yuti, ka wa mute akul hu yin ngang kwa.

¹² Myan ima ti shu mbar mai si yin hai, ti masi ɓa ti ɗak tun yes myan ima si wa laisun.

¹³ I ma laksu mwawei, shak kyel ima si wa buti findel mai ta na naya, si wa lak ti aɗeng ima ti masi mai hwak, ɓurti mbe'i ti yit.”

Judas Ɓwet ɓa u Cu Kwinik i Yeso

¹⁴ Unai andek ta saa ti hure mulang apil, ima si lai ii Judas Iskaryot, wa kyel i mbai i makocok

¹⁵ lulus ni, “Ami ha wa fasun ti ɓweti i mulut ama, na i fu Yeso ta ra amu ya?” Ɗak si mbe'us cef i ugbwirik hure ataat.

¹⁶ Ta myan ani Judas fur far ti ngga' ima ɓa u ka' Yeso ta u fas ta ra.

Yeso Cu Cwa i Pissihai

¹⁷ Mwen ti bya' ti Got i Folok ima Ma kaciwa' Hong, fe i ro ames si yes kyel i Yeso si lulus lul nyai, “Ha ɓweti ka ɗaka ti kyel i cwai ti Got i Pissihaiyi a leya?”

¹⁸ Lak fe i ro ames ni, “Lang hun ta wi ashwa ta kyel i maɗufal nin hu lakus nyai, ‘Makofiti ni, myan ima si kinuni kat vaat. I ɓweti ɓa i cu cwa i Got i Pissihai hu fe i ro amen ta wur ama.’ ”

¹⁹ Unai fe i ro ames si masi ta ngga' ima Yeso lakus ɓa si ɗak ti Got i Pissihaiyi ta.

²⁰ Myan ima ango ti mas, Yeso yis cwai ti cwa akul hu sin hure mulang apili.

²¹ Si te cwai lakus ni, “I laksu mwawei, andek na saa yuti, ma wa cwai ti kwinik amen.”

²² Si mas futut fwet, si cu wei ti laksus ti andek-andek nyai, “Ayin haa, a Deembai?”

²³ Yeso matussi ni, “Ima ti' ra na kwang akul hu yin matun wa munggwya.

²⁴ Al i Maɗufal ma wa wa fota ngga' ima si worong ta hai ames. Mwe si maɗufal ima fa Al i Maɗufal! Ma wa ɓin sus ɗat naɗin kan si alus kwa.”

²⁵ Unai Judas ima ma wa cwai ti kwinik i Yesoi ni, “A hun ayin waak, a makofiti?” Yeso ni, “Hei, a ha.”

²⁶ Sin ɗiri cwai ti cwa ndai, Yeso zan folok, palang ɗak nggyal fa fe i ro ames, ni, “Mat hun hu cu, mai a lo' amen.”

²⁷ Ɗak zan cunjoi palang, fas ni, “Wo hun ta cunjoi wi, shak asui.

²⁸ A wash amen i dakwa, ima si shuya ɓurti ɗufal shak, ɓa si shus mafwashi ya.

²⁹ I laksu, i wa muhum woti ham i manggɓu' kwa, nasi mwashi, na myan ima kaitat i Deen yes tawe, ɗak i wo akul hu hun.”

³⁰ Takfai tima si lak ador, si lang ya wa ta Anggash ti Yitat i Mbar.

Yeso Lak Ɓwinggil ima Pita ma wa Masi

³¹ Yeso lakus ni, “Shak asui hu wa fwaran ti fo' moti, ɓurti si worong nyai, “ ‘I wa pati maɗing ti tutwai, tutwayi si wa matɓasan.’

³² “Myan ima i luk fit ta fiyai, i yu wa mutong ta Galili.”

³³ Pita matussi ni, “Na si fur shak ɓursa, yin i wa mufur kwa.”

³⁴ Yeso ni, “I laksa mwawei, ti fo' amoti, ha wa ɓwinggil i shangsun sa ataat, ɗak korong tutol.”

³⁵ Pita matussi ni, “Na yin wa mot akul hu ha, i mot kek, i wa ɓwinggil i shangsa kwa.” Anggum i fe i roi shak si lak ɗama andek.

Fwal i Yeso ta Gatsemani

³⁶ Unai Yeso wa akul hu fe i ro ames ta kyel ima si lai ii Gatsemani, ɗak lakus ni, “Tehun nanati, yin i ɗuya tasi haiyi te', ɓa i fwal DeeƁwe.”

³⁷ Zan Pita hu fe i Zebedi apilal, Jemis hu Jwon akul hu yis, ɗak hya ti mbai tirim hu kikyauwat na ɗar.

³⁸ Ɗak nyus, “I hal ti tirim fwet na mulut amen fota ɓa i motun, tehun akul hu yin nati, hu te ti shingat.”

³⁹ Her ta wei vaat, shu i mafwaran ta fisha cu wei ti fwal ti DeeƁwe ni, “A Dee, naɗin ɓweti a wisi, naɗin ha zanun cunjo ti shum moti ya, a ɓweti amen kwa, a ama.”

⁴⁰ Ɗak hum kyel ta kyel i fe i ro ames wisus sin yus raki. Lul ta Pita ni, “Hu ndok hu ɗing kyel akul hu yin kwa haa?

⁴¹ Tehun ti shingat hu fwal DeeƁwe, ka hu fur ta amba wi. Rin ma ɓweti, lo' nggwes.”

⁴² Humkyel hum fwal mapil ni, “A Dee, na ma wa mas ɓa cunjo moti ti langun hai kwa, na a kpak ɓa i wo, ɓa aɗeng ima ha ɓweti u te andi.”

⁴³ Myan ima humkyel, wisus sin ɗarak, ɓurti arak ka'us fwet.

⁴⁴ Hum honsus takyeli wa fwal mataat hwak, yis lak ti ɗama mandeki.

⁴⁵ Unai humkyel ta kyel i fe i roi lakus ni, “Huma hai raki ta lafosi haa? Ɗing huni, myan si ru na nggas, si wa fati Al i Maɗufal ta ra i som i masti mafwashi.

⁴⁶ Luk hun fit kawa! Ma cwai ti kwiniki ma yes!”

Si Ka' Yeso

⁴⁷ Myani yis ɗiri findel, Judas andek ta saa ti hure mulang apili, pwakus hai. Male' suɓut i ɗufal ima si ti ɗam i ɓwol, hu awal, hu yalal. A mbayai i kocokak hu som kofiti si anggut hai, hu mbayai i ashwa si rohus.

⁴⁸ Mwashi, ma cwai ti kwiniki si ɗak ti ngga' ima si wa masi si ka'us ta. “Ima i wa a to'us too' i myatat, a yis hu wa ka'i.”

⁴⁹ Fo abet ti wa ames ta kyel i Yeso, Judas ni, “I to'a a makofiti!” Ɗak furus hai.

⁵⁰ Yeso matussi ni, “A mwen, masa aɗeng ima ha yes masi.” Unai ɗufali si her ta wei, si ka' Yeso, si kpukpongus.

⁵¹ Ti andi, andek ta saa ti ima sima akul hu Yeso, ka' kwai asus, re' ya tel ti maro i makunggul i makocoki, fetus mwal ya.

⁵² Yeso lakus ni, “Humuskyel ti awal ta fatal wi, ɓurti shak maɗufal ima re' awal ya, a awal ma wa forsus.

⁵³ Hu ɗingi na i lai Deen, ma wa ro ti som lu' ima si ɓin hure mulang apil na kyel amen kwani?

⁵⁴ Ɓurti andi, Worong ti wa hya atini, ima ni a kanggang ɗamam mii si fur na fisel mai ya?”

⁵⁵ Myan ani Yeso lak suɓut i ɗufali ni, “Yin a kpok i masher ani? A kpak hu yes ti awal ta yalali ɓa hu ka'un haa? Ngang i ma amun na Wur i DeeƁwe yin kofiti, hu ka'un kwa.

⁵⁶ Shak mai fur a ɓurti ɓa worong i mashit u hya.” Unai shak fe i ro ames si honus si titalus.

Yeso ta Wei i Tabwa'

⁵⁷ Som ima si ka' Yeso si watus ta wur i Kayafas, mbai i makocok, ta kyel ima som kofiti si anggut hai hu tabwa' si suɓut ta.

⁵⁸ Pita yis koltifai asussi ta maleng, wa ta taya i mbai i makocok. Te amun ta kyel i maɗing ti kyel ɓa u ɗing aɗeng ima ma wa.

⁵⁹ Mbai i kocokaki hu som Sanhedirin shak si far ti fyarat ta si Yeso hai, ɓurti ɓa si forus,

⁶⁰ si wisi kwa. Shini som i fyarati hyang si yes. Ta dala som apil si yes.

⁶¹ Si ni, “Mai ni, ‘I ndok i nggul Wur i DeeƁwe mai ya, i ta' ta saati mukon ataat.’ ”

⁶² Unai makunggul i makocok luk fit lak Yeso ni, “Ha wa mati kwa? Anggi findeli mai ɗufal mii si laki na hai ya ti ya?”

⁶³ Yeso tes cakat. Unai makunggul i makocoki lakus ni, “I ma laksa, saati asum i DeeƁwe mapweti, laka nin nyai ha a Kristi, Al i DeeƁwe.”

⁶⁴ Yeso matussi ni, “Hei, fota ngga' ima ha lak ta. I ma laksu shak, myan ma yes hu wa ɗing ti Al i Maɗufal yis amun ta ra i ucwa i Mambaitat, yis yes ta ri' i fit.”

⁶⁵ Unai makunggul i kocoki gwyak arom ames ya ɗak ni, “Lak findel ale'! Ami kin ka far ti shini ɓa si findel hwak ya? Ɗing huni, mwashi hu hal findel i ale' ima lak,

⁶⁶ hu ɗingi atini ya?” Si mati si ni, “A kiga' ɓa u mot.”

⁶⁷ Unai si tufus lyau hai ta shishat, si saramus ti cwereng. Shini si pas ta kapak,

⁶⁸ ɗak si ni, “Laka nin findel i som i shit, ha Kristi, awe pa ya?”

Pita Ɓwinggil Yeso

⁶⁹ Pita yis amun ta taya, unai yamwan muro ta wuri ti yes ta kyel ames, ti nyus, “Ha ma akul hu Yeso i Galili.”

⁷⁰ Ɓwinggil ta wei ames shak, lak ni, “I shang aɗeng ima hu laki kwa.”

⁷¹ Unai wa ta fo i kwap, yamwan nin ti hum ɗingsus, ti lak som ima sita kyeli tini, “Maɗufal mai ma akul hu Yeso i Nazaret.”

⁷² Hum ɓwinggil, ta shiɗati ni, “I shang maɗufal mai kwa!”

⁷³ Takfai ti myan ndyong, sin ima sima mangrai ta kyeli si yes kyel i Pita si ni, “A awei, ha andek ta saa yusti, ɓurti findel ama kof andi.”

⁷⁴ Unai Pita lang shiɗat yis nyai, “I shang maɗufal mai kwa fweng!” Fo abet korong tutol.

⁷⁵ Unai Pita mbe' findel ima Yeso lak nyai, “Ha wa ɓwinggil si yin hai sa ataat ɗak korong tutol.” Unai lang ya ta saikyel kawa sisya'.