Matyu 24 - Findel i DeeƁwe Ti Alis i Ron

Ɗamam ima Si Wa Matkof Myan i Dala

¹ Yeso hon Wur i DeeƁwe yis yus wa, myan ima fe i ro ames si ɗuya si wisus ɓa si kofus ti ta'a' i Wur i DeeƁwe.

² Lulus ni, “Hu ɗing shak ɗamam mii haa? I ma laksu mwawei, si wa honti afung nin si tusut hai kwa, si wa ɓaasan ti ya shak.”

³ Yeso wa te amun ta Anggash i Mbar, fe i roi si wisus i mufot, si ni, “Laka nin, a tami mii ɗamami si wa mufur ya? Ami ma wa kofi nyai, a myan i dala mai ya?”

⁴ Yeso matussi ni, “Tehun ti shingat, ka ɗeng dangu kwa.

⁵ Ɗufal hyang si wa yes ti asum amen sin nyai, ‘Ayin a Kristi,’ si wa dang ti ɗufal hyang.

⁶ Hu wa hal ti mangga' i ɓin hu ndurum i ɓin, shak ta andi, ka hu mwen kwa. Ɗamam mii a kanggang si fur, shak ta andi, dalai ti ti yes kwa tawe.

⁷ Ɓin ma wa mulang si ta' hu ta' hai, kaitat hu kaitat. Si wa masti hwem hu aro i ta' ti kikyali hyang.

⁸ Shak mii a mahalal i shum.

⁹ “Si wa kinsu ta ra i som ima si tu wa munggwya, si foru ya hwak, hu shak ɗufal si wa ɗingsu shit ɓursun.

¹⁰ Ta myan ani, hyang si wa hatat ta si kinti mulut wi, si te i som cwai ti han si nggwes ti ɗiyai,

¹¹ som i shit i fyarat hyang si wa mupwak ya, si dang ɗufal hyang.

¹² Ɓurti ngye i mafwashi, matɓwet i ɗufal hyang ma wa tiɗya,

¹³ maɗufal ima te mangra gbwenjeng wa dala ma wa mupwet.

¹⁴ Muro Maɗesi i kaitat mai, si wa mbai ta Ramam i naya shak, ɓa u te ii shit wa kyel shak ɗufal, ɗak dala yes.

¹⁵ “Myan ima hu ɗingi ‘Sin masti ɗama i zuruk ima kwal rafati ya’ ta kyel masapai, ima Dangyel mashit lak, (ɓa ma ambe'i u shangi),

¹⁶ ɗufal ima si mata Judya si pak wa ɗanggash.

¹⁷ Maɗufal ima mata si hai i wur ames hai ka ɗorkyel ɓa u zan ɗama ta wii wuri kwa.

¹⁸ Ka ɗeng ima mata ya ni ɓa u zan mogo ames kwa.

¹⁹ Myan mii shum ma wa ɗat ɗingi si arof ima si ti harai hu ima si fati fe fof kwa!

²⁰ Fwal hun kan tital amu fur ta si myan i humbil kwa, na andi kwa myan i lafos i Judas kwa.

²¹ Myan ani, shum mavweleleli ima si wa kaani hu nin kwa, ta si tongi i naya yes mwashi, si wa muhum kaani ti nin kwa hwak.

²² Naɗin lef myani ya kat ndyong kwa, naɗin ɗeng u pwet kwa, ɓurti som ima si ben ayis nai kin myani te ndyong.

²³ “Tasi myan ani na ɗeng nyu, ‘Ɗing huni, Kristi mai!’ Ahun si ni, ‘Unai ta te'!’ Ka hu fa mwawei kwa.

²⁴ Kristi i fyarat hu som i shit i fyarat hyang, si wa mupwak ya, si wa masti mbayai i ɗamam i lum ti fo ya hu ɗamam i shok na fo, ɓa si dang ɗufal ima DeeƁwe ben, na yis wa mas.

²⁵ Ɗing huni, i laku a ci tuu fur.

²⁶ “Ɓurti andi na ɗeng nyu, ‘Unai ta ya,’ ka hu wa kwa, ahun na si ni, ‘Ɗing huni u mai na ɗom,’ ka hu fa mwawei kwa.

²⁷ Na kyel ti nzilwit na ɓwai yai si wa ɗingi ta ɓwai wur, andi yes i Al i Maɗufal ma wa mute ta.

²⁸ Kyel ima funat mata a kyeli vokshik wai ta.

²⁹ “Fo abet takfai ti shum makwiyi i myan mai, “ ‘Ɓwe ti wa fati maɓing, ture ma wa fati kweneng kwa, ɓyar si wa ndakan ta fit, ɗamam ima si ta fit si wa muro.’

³⁰ “Tasi myan ani, si wa ɗing ti ɗama ima ma kofti yes i Al i Maɗufal ta ri' wi, shak Ramam i naya si wa kawa ɓurti myanat. Si wa ɗing ti Al i Maɗufal yis yes ta ri' wii ta fit, ti andok mbai, hu cinjangat.

³¹ Ma wa ro ti som lu' ames si fu' ngyef ti la mbai, si suɓut ɗufal ima si ben ta nggwaha i naya shak.

³² “Mwashi, wis hun shangi mai tasi yit ti makambong. Na ti ɓak ra, ti sa mwal mumwai, hu shangi fu ti kat ndyong ndai.

³³ Andi hwak, na hu ɗing shak ɗamam mii, hu shangi mana nggas ti fo i mahom.

³⁴ I ma laksu mwawei, myan mai ma wa mulang ta kwa, na ɗamam mii si fur tawe.

³⁵ Fit hu fisha si wa mumbit, findelal amen si wa mumbit kwa fweng.

Ɗeng Shang Mweni hu Myani Kwa

³⁶ “Ɗeng shang mweni hu myani kwa. Som lu' i kyel ta fit hu Al i DeeƁwe shak si shang myani kwa. A Deehi je shangi.

³⁷ Fota ngga' ima ai yis ta, tasi myan i Nowa, angga'i nai ma wa mufur ta si myan i yes i Al i Maɗufal.

³⁸ Ɓurti ta myan ima ham ti fyal naya ya, ɗufal sin cwai sin woi, sin kunggo sin kunggoi ya, wa mwen tima Nowa lang ta kwang i ham wi.

³⁹ Si shang aɗeng ima ma mufur kwa, ham yes lang fyalsus ya shak tawe. Angga' ima ma wa mufur ta nai myan ima Al i Maɗufal ma wa mupwak ya.

⁴⁰ Ɗufal apil si wa mute ro ta yang, si wa zan ti andek ya si hon andek ta.

⁴¹ Arof apil si wa mute nuk, si wa zan ti andek ya si hon andek ta.

⁴² “Ɓurti andi, tehun ti shingat, ɓurti hu shang mwen tima Deembai amu ma wa yes kwa.

⁴³ Shang hun mai, naɗin mawur shang myan ima asher ma wa yes saa ti fo', nan u te ti shingat u hon si yes si mbukus fo i kwap ya kwa.

⁴⁴ Hu te mweret, ɓurti Al i maɗufal ma wa yes ta si myan ima wa' hu kinɓwi ma wa yes.

⁴⁵ “Ma hya ti findel, a yis mii yere mashingat ima mawur ames ma wa honsus wur ames ta ra, u fwang shak ta yarai i wuri ɓa u fas cwa tasi myan hai.

⁴⁶ Maɗesi mata si yere ima mawur ames ma wa yes u wisus yis masti ro ames.

⁴⁷ I ma laksu mwawei, ma wa kinsus u te ii mbai maɗingsus ɗam i kyel ta wuri shak.

⁴⁸ Na maroi a mafwashi i maɗufal, ma wa lak ti haisus u ni, ‘Maɓwai amen wis ɗa'at ti maleng ma wa muhumkyel kaang kwa,’

⁴⁹ ɗak cu wei ti ndash ti shunus som i roi, u cu wei ti cwai ta woiyi hu som i woti likit.

⁵⁰ Mawur i maro ani ma wa muhumkyel tasi mwen ima wa' kinɓwi ma wa muhumkyel hu myan tima wa' shangi.

⁵¹ Mawuri ma wa masus andash mafwashi, u kinus ta kyel ima sukwai si ta, ta kyel ima si wa kawa sin nggwaran ti anggurai.