Matyu 23 - Findel i DeeƁwe Ti Alis i Ron

Mwe sa Pyoron

¹ Unai Yeso lak suɓuti hu fe i ro ames ni,

² “Som i kofiti si anggut hai hu Farisiyawa si te amun si kunggul ti Mosis hai.

³ Ɓurti andi, a kpang hu mas shak aɗeng ima si ni ɓa hu masi. Ka hu mas aɗeng ima si masi kwa, ɓurti si hya aɗeng ima si laki kwa.

⁴ Si no' ɗam manggahi si kin ɗufali ta la, sin ti haisus si fwangussi ta ti foti ra kwa.

⁵ “Shak aɗeng ima si masi, si masi ɓa ɗufal si ɗingus. Si no' mbayai i ɗamam ta ɓosas si shu mbayai faginan ta jikoti yis kwetleng.

⁶ Si ɓwet kikyal i ngye ta kyel i got hu kikyal mbayai ta mareha.

⁷ Si ɓweti ɓa si to'us ta matof hu ɓa ɗufal si laiyus ii ‘som kofiti.’

⁸ “Ɗat ɓa si laiyu ii ‘som kofiti’ kwa, ɓurti hu mati Deembai andek hun shak a shunus i ɗiyai.

⁹ Ka hu lai ɗeng na naya ii ‘dee’ kwa, ɓurti hu mati dee andek je, mat ta fit.

¹⁰ Kan si laiyu ii ‘som kofiti’ kwa, ɓurti hu mati makofiti andek, a Kristi.

¹¹ Ma mbai ta saa yuti ma wa mute ii yere.

¹² Ɓurti shak maɗufal ima fa haisus ngye si wa komsus ya, maɗufal ima kom haisus ya, si wa fasus ngye.

¹³ “Mwe asui, som kofiti si anggut hai hu Farisiyawa, hun som i rere! Hu vo fo i mahom i kaitat i kyel fit ya ta wei i ɗufal. Hun ti haisu hu lang ta kwa, hu hon som i ɓweti mulang ta, ɓa si lang ta kwa.

¹⁵ “Mwe asui, som kofiti si anggut hai hu Farisiyawa, hun som i rere! Hu ati ti ta'a'i hu yiir ɓa hu wis som ima si wa mute fota hun, myan ima hu wis andek, hu hatus sa apil, ii al i man fota hun.

¹⁶ “Mwe asui, som i zul ti manzyauwau nzong, ima hun a manzyauwau hwak! Hu nyai, ‘Na ɗeng shiɗat ti Wur i DeeƁwe, a ɗama kwa, ɗak na ɗeng shiɗat ti ugbwirik mujuwi ti Wur i DeeƁwe, ma wa masti aɗeng ima shiɗat ni ma wa masi.’

¹⁷ “Hun halyang i manzyauwau! Anggi mii mbai ya, a ugbwirik mujuwi, ahun a Wur i DeeƁwe ima kin ugbwirik mujuwi si te ti sapa ya?

¹⁸ Hu hum laki hwak nyai, ‘Na ɗeng shiɗat ti mbong, a ɗama kwa, ɗak na ɗeng shiɗat ti mal amet, ma wa masti aɗeng ima shiɗat ni ma wa masi.’

¹⁹ Hun manzyauwau! Anggi mii mbai ya, a mal ahun a mbong ima kin mali te ti sapa ya?

²⁰ Ɓurti andi, yis ima shiɗat ti mbong, shiɗat ti shak aɗeng ima mii hai.

²¹ Hu yis ima shiɗat ti Wur i DeeƁwe, shiɗat si yis ima mii hai,

²² hu yis ima shiɗat ti fit, shiɗat ti kunggul i mute i DeeƁwe, hu yis ima ma amun i hai.

²³ “Mwe asui, som kofiti si anggut hai hu Farisiyawa, hun som i rere! Hu fai andek ta saa ti hure i ɗamam muyayi, ima si shwayani ta cwa wi. Shak ta andi, hu nggyu i masti ɗamam ima si ɓin ɗat i anggut, fota mwawei, gu'ti ashur, hu hya ti findel. Ɗat ames a hya ti mbayaiyi, kaciwa' honti ɓwayi nin.

²⁴ Hun som i zul ti nzong, manzyauwau shini! Hu ngga kunggwyash ya, ɗak hu ɗul rukumi.

²⁵ “Mwe asui, som kofiti si anggut hai hu Farisiyawa, hun som i rere! Hu sahan ti fai i cunjo hu ɓeleng ya, ɗak wiiyi hyas ti yok hu ɓweti hai.

²⁶ A Farisiyawa manzyauwau! Na hu sa wi i cunjo hu ɓeleng ya tawe, ɗak takfaiyi cinjangya.

²⁷ “Mwe asui, som kofiti si anggut hai hu Farisiyawa, hun som i rere! Hu ma fota fiyayai ima si fyalus ya ti haf, te ii maɗesi na saikyel ɗak wiiyi hyas ti kyasas i funatat, hu shak ɗamam i zuruk.

²⁸ Andi hwak, na saikyel hu te fota ɗufal ima si ti mwawei, ɗak ta wi hyas ti rere hu ambe mafwashi.

²⁹ “Mwe asui, som kofiti si anggut hai, hun Farisiyawa, hun som i rere! Hu ɗakan ti fiyai ta ndere ɓurti som i shit, hu shu ɗam i malem ta si fiyai i som i mwawei.

³⁰ Hu nyaiyan, ‘Na ai nin na myan i hu deemukan i ɓele, na ai ni wisus ti, ni fwar som i shit ya kwa.’

³¹ Mwashi hu lak ti fo amu nyai, hun a fe i som ima si fwar som i shit ya.

³² Cuhun wei ti masti aɗeng ima kaya amu i ɓele si masi!

³³ “Hun ɗamafwashi! Hun suɓut i sukwai i ɗamafwashi! Hu wa masi atini hu pwet ta wur i man ya?

³⁴ Ɓurti andi, i wa ro ti som i shit na kyel amu, hu som i shingat, hu som kofiti. Hu wa for ti shini, hu nggwak shini ta si shanggam hai, hu ndash shini ta mare amu, hu ngga shini ta ashwa wa ashwa.

³⁵ Ɓurti andi, shak wash i ɗufal munderei ima si shuya na naya, tasi wash Ebel maɗufal manderei yes wash i Zakarya al i Berikya, ima hu fwar ta saa ti Wur i DeeƁwe hu kyel tor ti kuna.

³⁶ “I ma laksu mwawei, shak mai ma wa mufur na myan mai.

³⁷ “Woro a Yerushalima, Yerushalima! Shish tima shi for som i shit hu hwyai som ima si ros na kyel amu ti afyai! A sa awen yin ɓweti ɓa i suɓutu na fiɗya' amen fota ngga' ima shukor ti suɓwat fe amet ta kurya amet wi ya? Shak ta andi hu nggyu.

³⁸ Ɗing huni, wurai amu katus kyot kaciwa' ɗeng.

³⁹ Ɓurti andi i ma laksu, hu wa muhum ɗingsun kwa, na huni, ‘Disyo' si maɗufal ima yes ti asum i Deembai tawe.’”