Matyu 22 - Findel i DeeƁwe Ti Alis i Ron

Kaani Si Got i Kunggo

¹ Yeso hum lak ti kaani nin nyai,

² “Kaitat i kyel fit ma fota makai nin, ima mati got i kunggo ii al ames.

³ Ro yarai ames wa kyel ɗufal ima laiyus wa kunggoi ɓa si yes. Ta takfai, si nggwes i yes.

⁴ “Unai hum ro ti shini yaraiyi hwak i hai ni, ‘Lak hun som ima i laiyus kunggoi nyai, cwa nung, si lyaf mbayai i randwang ima si ngye fwet. Got nung ɗamam si hya nggya-nggya mwashi. Yehun gotti kwani.’

⁵ “Si mu'usi kwa fweng, si wis ti andek-andek, shini si wis yangang ames, shini kyel woor ames.

⁶ Si ka' som i roi si ndash si fwarus ya.

⁷ “Unai makai mas futut fwet. Ro som ɓwol ames si wa si fwar ti ɗufal ani ya, si ngyesh ashwa ames ya.

⁸ “Unai lak som i ro amesi ni, ‘Gotti nung, som ima i laiyusi ɗat ɓa si yes kwa.

⁹ Lang hun ta ashwa, hu lai shak maɗufal ima hu wisus.’

¹⁰ Unai som i roi si lang ta ashwai, si suɓut ɗufal ima si wisi, muɗesani ta mufwashani, ahom i gotti hya ti mwalmwat.

¹¹ “Myan ima makai yes ɓa u ɗing mwalmwat, ɗing maɗufal nin ta, ima wa' ru' arom i gotti.

¹² Unai lulus ni, ‘A mwen, ha mas atini ha yes nati kaciwa' ru' ti arom i gotti ya?’ Maɗufali far aɗeng i sheni wet.

¹³ “Unai makaiyi lak som i ɗing ti ɗufali ni, ‘No' hu yus ra ta sisaiyi, hu hwiti ta saikyel, ta maɓing wi, ta kyel i kawa hu nggwaran ti anggurai.’

¹⁴ “Ɓurti si lai hyang, si ben ndyong.”

Tal Ti Cef i Wufen wa Kyel i Makai

¹⁵ Unai Farisiyawa si lak ngga' ima ɓa si ka' Yeso ta, ti findel ames.

¹⁶ Si ro fe i ro ames akul hu ɗufal i Herod, si ni, “A makofiti, ni shangi a ha a maɗufal ma mwawei, ha ma kofti findel i DeeƁwe saa ti mwawei. Ha mu' findelal ima shini si laki kwa, ɓurti ha a ma ɓweti hai ta kyel i ɗufal kwa.

¹⁷ Ɓurti andi, laka nin ambe' ama, a kiga' ni tal cef i wufen ta kyel i Makai a hun awet ya?”

¹⁸ Yeso shang ambe' ames a mafwashi, unai ni, “Hun sukwai, ami kin hu ma mbasun ya?

¹⁹ Kof hun na cef ima huti talan ti cef i wufeni.” Unai si kolus dinari.

²⁰ Unai lulus ni, “A mashilim i we mii hai ya? A asum i we mii hai ya?”

²¹ Si matussi si ni, “Ii Makai, unai ni, ɓu hu fa Makai aɗeng ima mii Makai, hu fa DeeƁwe aɗeng ima mii DeeƁwe.”

²² Myan ima si hal mai, si shok na fwai. Ɗak si honus ta kyeli si wis.

Lul Ta Si Muluk Fit ta Fiyai

²³ Ta si mwen mwandeki, Sadukiyawa ima si ni muluk fit ta fiyai mana kwa, si yes ti lul ta kyel i Yeso.

²⁴ Si ni, “A makofiti, Mosis lak nin ni, na maɗufal mot kaciwa' fe, a kanggang nusus u kunggo mbori ɓa si al nusus fe.

²⁵ Mwashi, shunus aminin shini pyoron si na saa nin ti. I bya'i mas kunggo ɗak motus, ɓurti mati fe kwa, hon mbori ta kyel i nusus.

²⁶ Nususi hwak motus, andi hwak mataati, wa sima pyoroni hai shak si mwatus.

²⁷ Ta dala, mbori ti motut.

²⁸ Mwen ti muluk fit, mbori ti wa mute a ti we ta saa ti ɗufal ani ya? Ɓurti si kunggot shak asussi.”

²⁹ Yeso matussi ni, “Mafwashi a yis nai, hu shang Worong, ahun a andok i DeeƁwe kwa.

³⁰ Mwen ti mulut fit, si wa masti kunggo, ahun si wa kunggoi ya kwa, si wa mute fota som lu' i DeeƁwe ta fit.

³¹ Mangga' i muluk fit ta fiyai, hu mbe' aɗeng ima DeeƁwe laku ni,

³² ‘Ayin a DeeƁwe i Ibirai, DeeƁwe i Aizik, DeeƁwe i Jakop.’ Yis a DeeƁwe i som mupweti, ii som ima si mwat kwa.”

³³ Myan ima suɓut i ɗufal si hal mai, si shok na fwai ti kofiti ames.

Anggut Mambai

³⁴ Myan ima Farisiyawa si hal Sadukiyawa si kat ti ɗama i sheni kwa, unai si suɓut ta kyel andek.

³⁵ Andek ta saa yusti ima shang anggut ndere, mbas ti lul moti ni,

³⁶ “A makofiti, anggi findeli ti mii ndi ta saa ti anggut ya?”

³⁷ Yeso matussi ni, “ ‘Ɓweta Deembai hu DeeƁwe ama ti shak mulut ama, hu shak mupwet ama, hu shak ambe' ama.’

³⁸ A mai mii bya' hu mbai i findel.

³⁹ Mapil ma fota yis, ‘Ɓweta nusa ima hu mute tikul fota hai sa.’

⁴⁰ Shak anggut hu kofiti i som i shit, sima nasi findelal apilal mii.”

Kristi a Al i We Ya

⁴¹ Myan ima Farisiyawa si suɓut ta kyel andek, Yeso lulus lul ni,

⁴² “Hu mbe'i atini ta si Kristi ya? A al i we ya?” Si matussi nyai, “A al i Devid.”

⁴³ Unai matussi ni, “Ami kin Devid findel ti andok i Rin, lai Kristi ii ‘Deembai’ ya? Ɓurti Devid ni,

⁴⁴ “ ‘Deembai lak Deembai amen ni, “Teha amun na ra i ucwa amen, na i mbit kinti som ima si zansa ti wei ta mabel ama tawe.” ’

⁴⁵ Na Devid laiyus ii ‘Deembai,’ atini u te ii al ames hwak ya?”

⁴⁶ Ɗeng hum matsus findeli kwa, tamwen andi wa wei ɗeng hum wis ti njeng i lulsus ɗama kwa.