Matyu 21 - Findel i DeeƁwe Ti Alis i Ron

Yeso Lang ta Yerushalima

¹ Myan ima si kat ndyong ti Yerushalima, si ru ta Betafaji ta nggas ti Anggash i Yitat i Mbar, unai Yeso ro fe i ro ames apilal,

² lakus ni, “Ɓu ta ashwa tima ti ta wei yuti andi. Fo abet hu wa wis ti njaki nin mano' ta kyeli, hu ali akul hu yit. Hwet hun hu kolun.

³ Na ɗeng findelu, hu nyus, ‘A Deembai ma ɓweti.’ Ma wa fasu fo abet.”

⁴ Si mas mii ɓa si hya findel i mashit nyai,

⁵ “Lak hun mulut asun Yerushalima, ‘Ɗing shii, makai amesh mai yes kyel amesh, ma hai muɗyayi si njaki hai, al i njaki.’ ”

⁶ Fe i ro ames si wa si masi ta ngga' ima Yeso lakus ta.

⁷ Si yes ti njakii hu ali, si wash faginan tasi njaki hai, ɗak Yeso te amun i hai.

⁸ Ɗak male' suɓut i ɗufal si wash faginan ames ta fiseli, yis ati i hai, anggum i ɗufali si tyal ra i yitat si wash ta fisel.

⁹ Ɗufal ima si ta wei hu i takfai sin taanja, sin nyai, “Mbaitat wa kyel i Al i Devid!” “Disyo' tasi ima ma yes ti asum i Deembai!” “Mbaitat mbai ta fit!”

¹⁰ Myan ima Yeso lang ta Yerushalima, shak ashwai hya ti mukmwal, sin lulal nyai, “Awe mai ya?”

¹¹ Unai suɓut i ɗufal si mati si ni, “A Yeso, Mashit ta Nazaret i Galili.”

Yeso Lang ta Wur i DeeƁwe

¹² Yeso lang ta Wur i DeeƁwe fur nggati som i juwili ta juwiliyai ta kyeli. Ɓaas ti teburai i som shen ti cef ya, hu kikyal i mute i som juwil ti hu gurguta ya.

¹³ “Si worong nyai, si wa lai ti wur amen ii wur i fwal ti DeeƁwe ‘Hun hu hat ti ii ton i asher.’ ”

¹⁴ Unai manzyauwau hu gundungang si yes kyel ames ta Wur i DeeƁwe, ɗak fas cala.

¹⁵ Unai mbayai i kocokak hu som kofiti si anggut hai si mas futut, myan ima si ɗing mbayai i ɗamam ima ma masi, fe hwak sin cwai i fo ta puk nyai, “Mbaitat wa kyel i al i Devid.”

¹⁶ Si lulus, “Ha hal aɗeng ima fe mii si laki haa?” Yeso matussi ni, “Hu mbe' kwani, ‘Ha hya fwai i fe hu kalajuwau, ti nakwai.’ ”

¹⁷ Unai honus ta, lang wa ta ashwa ti Betani, kon ta kyeli.

Yit ti Makambong ti Shok

¹⁸ Mwen ti ɓu, Yeso ɗik honti ashwai wa Yerushalima, hwem yis hansus.

¹⁹ Ɗing yit ti makambong ta fo i fisel, unai wel ɓa u cu, wisut ti fe kwa a mwal je. Unai nyut, “Shi wa muhum al ti fe kwa fweng!” Fo abet yiti ti shokut.

²⁰ Myan ima fe i ro ames si ɗingi andi, si shok na fwai. Si lul ta Yeso si ni, “Ami kin yit ti makambongi ti shokut fo abet ya?”

²¹ Yeso matussi ni, “I laksu mwawei, na hu fa mulut, kaciwa' mulut apil, hu wa masti a aɗeng ima i mas yit ti makambong motii je kwa. Hu wa lak ti anggash mai hwak, hu ni, ‘Luka fit ta kyel ama, ha fur ta yiir wi,’ ma wa mute andi.

²² Na hu fa mwawei, hu wa mat ti shak aɗeng ima hu fwal.”

Lul Si Mbaitat i Yeso Hai

²³ Yeso lang ta taya i Wur i DeeƁwe. Myan ima yis kofiti, mbayai i kocokak hu tabwa' si yes kyel ames. Si lulus, “Ati nggi mbaitati ha masti ɗamam mi ya? Awe fa mbaitat mai ya?”

²⁴ Yeso matussi ni, “I yu wa lul andek hwak. Na hu matuni, i wa laksu ti kyel ima i mat mbaitat mai ta.

²⁵ Batisma ti Jwon ti yes ii ta leya? Ti yes ii ta fit, ahun ti yes ii ta kyel i ɗufal ya?” Unai si mas uɓet i hai, “Na ka ni, ‘ii ta fit,’ ma wa luli, ‘Ɗak u ni, ami kin hu fa mwawei si yis hai kwa ya?’

²⁶ Na ka ni, ‘ii ta kyel i ɗufal’ ka ma myanat ti ɗufal fo, ɓurti shak ɗufal si zan Jwon Mabatisma a mashit.”

²⁷ Unai si matussi nyai, “Ni shangi kwa.” Unai yis ni, “Yin hwak i wa laksu ti mbaitat ima i ti masti ɗamam mii kwa.”

Kaani Si Fe Muryai Apil

²⁸ “Hu ɗingi atini ya? Maɗufal nin mati fe ames apilal. Wa ti kyel i mandeki nyus, ‘A al amen, kwai ha wa ro ta yang i manggɓu'.’

²⁹ “Matussi ni, ‘I wa wa kwa,’ ɗak ta takfai shen ambe' ta mulut wa yangi.

³⁰ “Unai deehi wa ta kyel i mandeki lakus ɗama andek, matussi ni, ‘A dee, I wa wa,’ shak ta andi wa kwa.

³¹ “Ta saa ti apili, anggi mas aɗeng ima dees lakus ya?” Si mati si ni, “A mambaiyi.” Yeso lakus ni, “I ma laksu mwawei, som i mati cef i wufen hu arof fe i se, si yu wa mutong murang ta kaitat i DeeƁwe.

³² Ɓurti Jwon yes ɓa u kofu ti fisel munderei, shak ta andi hu nggyu i fati mwawei si yis hai. Som i mati cef i wufen hu arof fe i se, si fa mwawei. Shak ta ngga' ima hu ɗingi ta andi, hu nggyu i hatat tasi mafwashi amu hu fa mwawei si yis hai kwa.

Kaani Si Ɗufal i Makok

³³ “Hal hun kaani nin hwak. Maɗufal nin ima han yang i manggɓu'. Ta' bang nggar ti yangi ya, yong polok i tis ti manggɓu'i ta wii, ɗak ta' manjiling i ɗing ti kyel ya. Unai fa som shini yangi ta ra wis ɗa'at.

³⁴ Myan i karat ru, ro yarai ames wa kyel i som ima honus yangi ta ra ɓa si fas macwai.

³⁵ “Som ima fas yangi si kaa' yarai amesi, si ndash andek, si for mapili, si hwyai mataati.

³⁶ Unai ro shini yaraiyi ta hwak, ima si ɓin i bya' ani, somi si masus aɗeng ima si mas anii.

³⁷ Ta dala shak, ro al ames ta kyel i mii ɗufali. Lak ni, ‘Si wa fati al amen ngye.’

³⁸ “Myan ima somi si ɗing ali, si lak ɗiyai si ni, ‘Ma cwai ti kopi mai. Yehun ka for ya, ka cu kop amesi.’

³⁹ Unai si zanus, si hwiti ya ta saikyel, si for ya.

⁴⁰ “ ‘Ta dala, myan ima mayangi yes, ma wa masti som mii amiya?’

⁴¹ “Si matussi si ni, ‘Ma wa kofsus ti sukwai mii ya gbum, ɗak fwarus ya, u fa shini yangi ta ra, ima si wa fasus macwai myan i karat.’ ”

⁴² Yeso lakus ni, “Hu mbe' ta worong wi kwani? “ ‘Afung tima som i ta' si nggwesti, a yis te ii nggwa i mahuhur. Mai a ro i Deembai, a ɗama i shok na fo na kyel amukan.’

⁴³ “Ɓurti andi, i ma laksu, si wa zan ti kaitat i kyel fit ya na kyel amu, si fa som ima si wa masti aɗeng ima DeeƁwe ma ɓweti.

⁴⁴ Maɗufal ima fur si afungi hai, ma wa dyashan, maɗufal ima afungi furus hai, ti wa ɓissus ya.”

⁴⁵ Myan ima mbayai i kocokak hu Farisiyawa si hal Yeso yis lak ti kaani mai, si shangi ma findel si a sin hai.

⁴⁶ Si far fisel tima ɓa si ka'us, shak ta andi, sima myanat ti suɓut i ɗufal fo, ɓurti ɗufal si zan yis a mashit.