Matyu 2 - Findel i DeeƁwe Ti Alis i Ron

Too' i Som Piris ta Ngga' Muɗu i Ɓwe

¹ Ka mana ndai, myan ima si al Yeso ta ashwa i Betelehem ta' ti Judya, Herod yis ii makai. Som shangi si mbe' ti ɓyar shini, si yes ta ngga' muɗu i ɓwe, si wa Yerushalima, si lul lul si ni,

² “Makai i som Ju ima si al, mii leya? Ni ɗing ɓyar asus ta ta' ti ngga' muɗu i ɓwe, a yis nai kin ni yes ɓa ni cuhus afut.”

³ Myan ima Makai Herod hal findel mai, unai mulut asus ti tirim fwet, andi shak som i Yerushalima hwak si tirim.

⁴ Herod suɓut shak mbayai i kocokak hu som kofiti si Anggut hai, lulus kyel ima si wa al ti Kristi ta.

⁵ Unai si nyus, “A ta ashwa i Betelehem ta' ti Judya, ɓurti angga' ima mashit worong ta nai ni,

⁶ “ ‘A shish, Betelehem ta' ti Juda, a shish shi ɓin mute ii foyi na kaitat ti wufen ti Juda, a na kyel amesh makaitat ma wa mulangya na, ima ma wa mute ii ma ɗing ti ɗufal ames Isar'ila.’ ”

⁷ Unai Herod lai som i mbe' ti ɓyari i mufot, ɓa u shangi ta fo yusti myan kiga' ima ɓyari ti matkof.

⁸ Ɗak ti'us wa Betelehem nyus, “Ɓu hu farun mangga' i al mai loo. Na hu wisus hu humkyel hu lakun, ɓurti ɓa yin hwak i wa i cuhus afut.”

⁹ Takfai tima si hal findel i makaiyi, unai si ka' fisel si wis. Ɓyar tima si ɗingut ta muɗu i ɓwe yit ati ta wei yusti, ɗak ti yes ti te mangra ta hai i kyel ima ali mata.

¹⁰ Myan ima si ɗing ɓyari, si hya ti jakak fwet.

¹¹ Ti mulang ta wuri, unai si ɗing ali hu nasus Uryam, si fwar ta wei yusti si cuhus afut. Ɗak si hwet ɗamam ames ya, si fas mal i ugbwirik mujuwi, hu yitat i ngyeshi mafyongi, hu mbar.

¹² DeeƁwe ti'us ra ta wii i fiɗyat wi nyus, kan si humkyel ta kyel i Herod kwa, unai si sas ta fisel nin si humuskyel ta ashwa ames.

Si Wa Bum ti Hai ta Masar

¹³ Takfai tima si wis, unai malu' i Deembai pwak Josep hai ta fiɗyat wi nyus, “Luka fit, ha zan ali hu nasus, hu wa hu bum hai ta Masar. Tehun ta yes myan ima i wa findel sa. Ɓurti Herod ma far ti ali, ɓa u for ya.”

¹⁴ Unai Josep luk fit zan ali hu nasus ta saa ti fo'i wi, si wis Masar.

¹⁵ Tes ta kyeli yes myan ima Herod mot. Mai fur a ɓurti ɓa si hya aɗeng ima Deembai lak ta fo i mashit nyai, “I lai al amen ɓa u lang ya ta Masar.”

¹⁶ Myan ima Herod ɗingi som i shangi si hat tus ii haling, unai mas futut ti ambas fwet. Kin ɓa si fwar fe muryai ya shak, ima si mata Betelehem hu ashwaha amet. Fe muryai ima si fwar ya, ii ma si ka'i ta wilyal apil yes fisha, ka'i ta si mukonan ima hali ta fo i som i shangi.

¹⁷ Unai aɗeng ima lang ya ta foi mashit Yeremya hya, nyai,

¹⁸ “Si hal la nin ta Rama, yit kawa, yit shaat ti ambas, Urecel ti kawa ɓurti femet, ti nggwet i mat ti pweri, ɓurti si mwatus.”

Muhumkyel ta Masar wa Nazaret

¹⁹ Takfai tima Herod mot, unai malu' i Deembai pwak Josep hai ta fiɗyat wi yis ta Masar, nyus,

²⁰ “Luka fit ha zan ali hu nasus, ha wa ti ta' ti Isar'ila, ɓurti som ima ai sin far ti mupwet i ali, si mwatus.”

²¹ Unai luk fit, zan ali hu nasus, wis ti ta' ti Isar'ila.

²² Myan ima hali nyai, Arkelayus mat kop i kaitat ti dees Herod, cu wei ti kaitati ta ta' ti Judya, mwenus i wa ta ta'i. Takfai tima DeeƁwe ti'us ra ta fiɗyat wi, unai wel wis ta' ti Galili.

²³ Unai wa te ta ashwa nin ma asum Nazaret, ɓurti ɓa si hya laki i som shit nyai, “Si wa laisus ii Manazaret.”