Matyu 19 - Findel i DeeƁwe Ti Alis i Ron

For ti Kunggo

¹ Myan ima Yeso pun lak ti ɗamam mii, unai hon Galili wa ta ta' ti Judya ta fit i Ɗara i Jodan.

² Suɓut i ɗufal si kolfai asussi, unai fas cala ta kyeli.

³ Shini Farisiyawa si yes ɓa si mbas. Si lulus nyai, “A kiga' ɓa maɗufal u ngga mbor asus ya, ɓurti shak musut i aɗeng ima ti masi haa?”

⁴ Matussi ni, “Hu mbe' kwani, tasi bya' DeeƁwe a Malan, ai ‘lanus a marei hu mumbori,’

⁵ ni, ‘ɓurti andi, marei ma wa honti dees hu nasus, u te akul hu mborsus, apilali si te ii lo' andek.’

⁶ Yes wei, si wa mute a ɗufal apil kwa, a andek. Ɓurti andi, aɗeng ima DeeƁwe no', ka ɗeng kaarti kwa.”

⁷ Si lul nyai, “Ami kin Mosis lak ni, ɓa maɗufal u fa mborsus kaada i for ti kunggo ɗak wakut i ra ya?”

⁸ Yeso matussi ni, “Mosis honu ɓa hu wak arof amu ii ra, a ɓurti shok na hai amu. Ai, tasi bya' yis andi kwa.

⁹ I ma laksu, shak maɗufal ima wak mborsus ii ra, na wa' a ɓurti si ka'ut ti mafwashi i arak i zuruk kwa, ɗak mas kunggo nin, a mute i zuruk mii hai.”

¹⁰ Unai fe i ro ames si nyus, “Na angga' ima aɗengi mata saa ti mute i marei hu mbor nai, mbwesh mute kaciwa' kunggo.”

¹¹ Yeso matussi ni, “A shak si wa mat ti findel mai kwa, a som ima DeeƁwe masus bum je.

¹² Shini a ngguryai ɓurti si alus andi, shini a ɗufal si hatus andi, shini a sin si nggwes i masti kunggo ɓurti kaitat i kyel fit. Maɗufal ima ma wa mat ti findel mai u mat.”

¹³ Unai si kolus fe muyayi ɓa u kinus maɗesi, u fwal ɓursus. Fe i ro ames si mbyar som ima si yes ti fei.

¹⁴ Yeso nyus, “Hon hun fe muyayi si yes kyel amen, ka hu shas kwa, ɓurti kaitat i kyel fit ii musuti mii.”

¹⁵ Myan ima kinus ra maɗesi hai, ɗak wis ta kyeli.

Zalang Maramwayat

¹⁶ Ka mana ndai, nin mweni maɗufal nin, yes kyel i Yeso lulus ni, “A makofiti, anggi aɗeng maɗesii i wa masi ɓa i wis mupwet i myan hu myan ya?”

¹⁷ Yeso matussi ni, “Ami kin ha lulun aɗeng ima mii maɗesi ya? Ma maɗesi ma andek je. Na ha ɓweti ha lang ta mupwet i myan hu myan, unai ha hya anggutati.”

¹⁸ Maɗufali ni, “Anggi ya?” Yeso matussi ni, “ ‘Ka ha for maɗufal kwa, ka ha mas arak i zuruk kwa, ka ha shir shir kwa, kan ha vo fai i fyarat kwa,

¹⁹ Faha dya hu nasa ngye. Ɓweta maɗufal ima hu mute tikul fota haisa.’ ”

²⁰ Zalangi ni, “Shak ɗamam mii i masus. Ami kat ya?”

²¹ Yeso matussi ni, “Na ha ɓweti ha te nggya-nggya, ɓwa ha pwak sufat ama ya, ha fa som i jyel, ha wa wis ti mal ta fit. Ɗak ayis nai ha yes, ha kolfai asuni.”

²² Myan ima zalangi hal mai, wis ti futut. Ɓurti mati sufat fwet.

²³ Yeso lak fe i ro ames ni, “I ma laksu mwawei, mati shum masufat u lang ta kaitat i kyel fit.

²⁴ I muhum laksu i hai nyai, mati mbwesh ɓa rukumi ti lang ta swai i twen wi, hu ima maramwayat u lang ta kaitat i DeeƁwe.”

²⁵ Myan ima fe i ro ames si hal mai, si shok na fwai fwet, si lulus si ni, “Na andi, awe ma wa mupwet ya?”

²⁶ Yeso ɗingus fo ni, “Ta kyel i maɗufal ma wa mas kwa, ta kyel i DeeƁwe shak ɗamam si wa mas.”

²⁷ Pita matussi ni, “Unai ni hon shak ɗamam ni kolfai asai! Ami ni wa wisi ya?”

²⁸ Yeso lakus ni, “I ma laksu mwawei, myan i mushen i ɗamam mamwai yes, Al i Maɗufal ma wa mute si kunggul i kaitat ames hai. Hun ima hu kolfai asuni, hu wa mute si kunggwal i kaitat hure mulang apil, hun totti ɓur si gung hure mulang apil i Isar'ila.

²⁹ Shak maɗufal ima hon wur, hon nusus, hon tusus, hon dees, hon nasus, hon fe ames, hon yangang ames ɓursun, ma wa mati aɗeng ima ɓin andi mute hyang, ma wa cwai ti kop i mupwet i myan hu myan.

³⁰ Shak ta andi, hyang ima si mii bya' si wa mute ii dala, hyang ima si mii dala si wa mute ii bya'.