Matyu 16 - Findel i DeeƁwe Ti Alis i Ron

Far Ti Ɗama i Shok na Fo

¹ Myan shini ndai, Farisiyawa hu Sadukiyawa si yes kyel i Yeso, ɓa si mbas ti lul nyai, u kofus ɗama i shok na fo nin ta fit.

² Yeso matussi ni, “Na ango ti mas, hu nyai, ‘Kyel ti wa rinya ii muɗesi, ɓurti ri' cujwu ya,’

³ na a tamwen hu ni, ‘Kwai si wa shwaiti foon i uvuta, ɓurti ri' cujwu ɗak kikyau hwak.’ Hu shang ngga' i lak ti mute i ri' kiga', ɗak hu pwan mba ti ɗamam i shok na fo i myan i waya moti.

⁴ Unai matussi ni, waya mufwashi hu mu zuruk! Hu far ti ɗing ti ɗama i shok na fo. Si wa kofsu ti ɗama nin kwa, si wa kofsu ii mashit Jona je.” Unai Yeso honus ta kyeli wis.

Hong i Farisiyawa hu i Sadukiyawa

⁵ Myan ima si pis ta ɓwai mandek i yiiri, fe i ro ames si nitima ti folok.

⁶ Yeso nyus, “Shingat hun ta si hong i Farisiyawa hu Sadukiyawa.”

⁷ Si at si mai hai shak asussi, si ni, “Lak mai a ɓurti ka nitima ti foloki.”

⁸ Yeso shang aɗeng ima si laki, lulus ni, “Hun som fati mulut ndyong! Ami kin hu findel si ɗiyai amu nyai, hu yes ti folok kwa ya?

⁹ Hu ma ɗiri ta maɓing wi yes mwashi haa? Hu mbe' folok hara ɓurti ɗufal nggal hara haa? A cet awen hu suɓut ya?

¹⁰ Ahun myan ima i cu ti ɗufal nggal ɓaras ti folok pyoron, a cet awen hu suɓut ya?

¹¹ Ami kin tyo hai ti maɓing i shangi nyai, i ma findel si folok hai kwa ya? Shingat hun ta si musut i hong i Farisiyawa hu Sadukiyawa.”

¹² Ɗak si ka'i nyai, ma findel a si hong ima si shwai ta folok wi kwa, a si kofiti i Farisiyawa hu Sadukiyawa.

Pita Lak ni Yeso a Kristi

¹³ Myan ima Yeso wa ta ta' ti Kaisarya Filipi, Yeso lul fe i ro ames ni, “Ɗufal si lai ti Al i Maɗufal ii we ya?”

¹⁴ Si matussi si ni, “Shini si ni a Jwon Mabatisma, shini si ni a Iliya, shini si ni a Yeremya, shini si ni a andek ta saa ti som i shit.”

¹⁵ Lulus ni, “Hun hu ni yin aweya?”

¹⁶ Siman Pita matussi ni, “A ha a Kristi, Al i DeeƁwe mapweti.”

¹⁷ Yeso matussi ni, “Disyo' si ha hai, Siman al i Jona, a maɗufal kofa aɗeng mai kwa, a Dee i kyel fit.

¹⁸ I ma laksa, a ha a Pita, afung ima i wa ta' ti cot amen i hai. Andok i mot, ndok u rafat ya kwa.

¹⁹ I wa fasa mabuɗi i kaitat i fit. Shak aɗeng ima ha no' na naya si wa no'i ta fit, aɗeng ima ha hwet ya na naya, si wa hweti ya ta fit.”

²⁰ Unai ti' fe i ro ames ra, kan si lak ɗeng nyai yis a Kristi kwa.

Yeso Lak Mot Ames

²¹ Tasi myan ani, Yeso fur lak ti fe i ro ames nyai, a kanggang u wa Yerushalima u wo shum hyang ta ra i tabwa', hu mbai i kocokak, hu som kofiti si anggut hai. A kpang si forus, mwen mataat u luk fit ti mupwet.

²² Pita dulus tasi ɓwai, fur mbyar sussi nyai, “DeeƁwe u ngga ya, a Deembai! Mai aɗengi ma wa wisa kwa fweng.”

²³ Yeso hatat lak Pita ni, “Herana ya nati ha Shatan! Ha, a afung ti bukat na kyel amen. Ha ha mbe' ti a ɗamam i DeeƁwe kwa, a ɗamam i ɗufal kek.”

²⁴ Unai Yeso lak fe i ro ames ni, “Na ɗeng yis ɓweti yes kyel amen, a kpang u ɓwinggil haisus, u zan shanggam ames u koltifai asuni.

²⁵ Ɓurti shak maɗufal ima wis mupwet ames, ma wa duni. Maɗufal ima dun mupwet ames ɓursun ma wa wisi.

²⁶ Ahun ami mii ɗat i maɗufal na wis shak naya, ɗak dun mupwet ames ya? Ahun ami maɗufal ma wa fai ii foi mupwet ames ya?

²⁷ Al i Maɗufal ma wa yes tasi cinjangat i Dees hu som lu' ames, ma wa tal ti ɗufal ro ima masi shak.

²⁸ I ma laksu mwawei, shini ima si mangrai nanati mwashi, si wa ɗing ti Al i Maɗufal yis yes ta kaitat ames tawe, ɗak si mot.”