Matyu 15 - Findel i DeeƁwe Ti Alis i Ron

Masapa Hu Sapa Wet

¹ Shini Farisiyawa hu som kofiti si anggut hai, ta Yerushalima si yes kyel i Yeso, si lul lul,

² “Ami kin fe i ro ama si nggyel ti mute i lakan i som ɓele ya ya? Si saa ra ya ɗak si cu cwa kwa!”

³ Yeso matussi ni, “Ami kin hu nggyel ti findel ima DeeƁwe tuk ya, ɓurti mute i lakan amu yaa?

⁴ Ɓurti DeeƁwe ni, ‘Faha dya hu nasa ngye,’ hu ‘Shak maɗufal ima se' dees ahun a nasus, a kpak si forus ya.’

⁵ Hun hu ni, na maɗufal ima lak dees ahun a nasus u ni, ‘Shak bum ima hu nin wa mati na kyel amen, hu wa wisi kwa, ɓurti tii fa DeeƁwe ya,’

⁶ a kpang u fa dees ngye kwa. Hu hatat ti findel i DeeƁwe ii ɗama i gbya' ɓurti lakan amu.

⁷ Hun som dang! Ishaya lak kiga' si hun hai ni,

⁸ “ ‘A ti fo ames kek si fasun ngye, ɗak mulut ames tehus ti maleng ti yin.

⁹ Si cwaisun afut a gbya', kofiti ames, a anggut i maɗufal kek.’ ”

¹⁰ Yeso lai suɓut i ɗufal wa kyel ames nyus, “Hal huni hu shangi.

¹¹ Aɗeng ima lang ta fo i maɗufal, ndok ɓa u rafatus ya kwa, a aɗeng ima lang ya ta fo i maɗufal, a yis ‘rafatus ya.’ ”

¹² Unai fe i ro ames si yes kyel ames si lulus si ni, “Ha shangi nyai, Farisiyawa si mas futut myan ima si hal mai haa?”

¹³ Yeso matussi ni, “Na a Deen i kyel ta fit sok yiti kwa, si wa mbuki ya ta sisyari.

¹⁴ Hon hu yus, a som i zul ti manzyauwau nzong. Na manzyau zul manzyau nzong, shak asussi si wa mufur ta hum wi.”

¹⁵ Pita ni, “Laka nin ti kaani mai.”

¹⁶ Yeso lulus nyus, “Hu ɗiri i halyang yes mwashi haa?

¹⁷ Hu shangi nyai, shak aɗeng ima lang na fo wa na ɗar, ma wa mulangya na lo' wi haa?

¹⁸ Aɗeng ima lang ya na fo i maɗufal, yes ii ta mulut, a yis ‘rafaatus ya.’

¹⁹ Ɓurti ii ta mulut i maɗufal ɗamam mii si yias ta, fota hu ambe' mafwashi, hu for ti maɗufal, hu arak i zuruk, hu raki hu mbor ti ɗeng, hu shir, hu fyarat, hu findel i ale'.

²⁰ A mii ɗamami si ‘rafaat’ maɗufal ya. Cwaiti cwa kaciwa' sati ra ya ‘rafaat maɗufal ya kwa.’ ”

²¹ Ti honti kyeli, Yeso wis ta ta' ti Taya hu Saidon.

²² Mbor nin tima ti ti mute ta ta' ti Kainan ti yes kyel ames, yit kawa nyai, “A Deembai, Al i Devid, gu'a yun ashur! Al asun ti woti shum ti rin mafwashi ima langut hai.”

²³ Yeso matuti kwa. Unai fe i ro ames si yes si fwalus, “Nggaha yut nanati, ɓurti ti ka'ti kawa tifai asikani.”

²⁴ Yeso matussi ni, “Deen rohun a ɓurti tutwai i Isar'ila ima si fot.”

²⁵ Mbori ti yes ti shu i mafwaran ta wei yusti ti ni, “A Deembai, buma na!”

²⁶ Yeso matuti ni, “Mas kiga' ɓa si zan cwa i fe si fa kyara ya kwa.”

²⁷ Mbori ti ni, “A awei, a Deembai. Shak ta andi, kyara si ɓyat sheterai i cwa ima ndaak ta foi ɓeleng i som wur.”

²⁸ Unai Yeso matuti ni, “A mbor, shi mati fati mulut mbai! Fwal amesh matal.” Fo abet ali ti njeng.

Yeso Cu Ti Ɗufal Nggal Ɓaras

²⁹ Yeso hon kyeli wis ta ngga Yiir i Galili. Unai ɗu ta ajin i anggash te amun ta.

³⁰ Suɓut i ɗufal si yes kyel ames, si yes ti ɗufal ima si shok na lo', hu manzyauwau, hu gundungang, hu mandu'a', hu som mwatanan aka-akat hyang. Si shus ta mabel ames, yis fas cala.

³¹ Ɗufal si shok na fwai myan ima si ɗing mandu'a' sin findel, gundungang sin ɗa'at, ima si shok na lo' sin njeng, manzyauwau sin ɗing ti kyel. Si ha' asum i DeeƁwe i Isar'ila fit.

³² Yeso lai fe i ro ames ta kyel ames nyus, “I ma ɗing ti shum i ɗufal mii, sima akul hu yin mukonan ataat moti, si wis ɗama i cwai kwa. I ɓweti si wa wurai ti hwem kwa, kan si pwan na fisel.”

³³ Fe i ro ames si matussi si ni, “Ka wa wisti folok ale hyang na ya mai, ɓa ka fa suɓut i ɗufal mii ya.”

³⁴ Yeso nyus, “A folok awen hu ti ya?” Si nyus, “A folok pyoron hu gushe muyayi shini.”

³⁵ Lak hun ɗufali si te amunan ta fisha.

³⁶ Ɗak zan folok pyoroni hu gushei, takfai tima palang DeeƁwe, nggyal fa fe i ro ames, sin hwak si fa ɗufal.

³⁷ Shak asussi, si cu si kaf. Fe i ro ames si suɓut aɗeng ima kat, kol cet pyoron.

³⁸ A arya nggal ɓaras si cu, si mbe' arof ta fei kwa.

³⁹ Takfai tima Yeso ti' ɗufal ya si wis, lang ta kwang i ham pis ta ta' ti Magadan.