Matyu 14 - Findel i DeeƁwe Ti Alis i Ron

Mot ti Jwon Mabatisma

¹ Ta myan ani, Makai Herod Antipas hal jam si mangga' i Yeso,

² lak som i ro ames ni, “Mai a Jwon Mabatisma, luk fit ta fiyai. Ayis nai kin mati mbaitat i masti ɗamam i shok na fo mii.”

³ Ai, Herod tuu ka' Jwon no'us, kinus ta wur i shitam, ɓurti Uhirodya mbor ti nusus Filip.

⁴ Ai, Jwon lak Herod nyai, “A kiga' ha kol Uhirodya ii mbor kwa.”

⁵ Herod yis ɓweti for ti Jwon ya, shak ta andi mwen ɗufal fo, ɓurti si zan Jwon a mashit.

⁶ Myan ima Herod yis ti got i mbe'i ti mwen tima si alus, al ti Uhirodya ti lang ador ima ɗat Makai Herod ta si ɓwi fwet.

⁷ Kol ima fat kintiɓwi ta shiɗati nyai, ma wa fasut shak aɗeng ima ti lul.

⁸ Nasut ti tufut lyau ta fo si mangga' i aɗeng ima ti lak, unai ti ni, “Faha na hai ti Jwon Mabatisma na wii ɓeleng.”

⁹ Makai Herod tirim ti ambas, shak ta andi, ɓurti shiɗat ima masi hu mwalmwat ames, unai ni ɓa si fat aɗeng ima ti ɓweti.

¹⁰ Tuk muro si wa wur i shitam, si tel hai ti Jwon ya.

¹¹ Si yes ti haiyi ta ɓeleng si kol yamwani, ɗak yit ti kol nasut.

¹² Fe i ro i Jwon si yes si zan funat ti si lai. Ɗak si wa si lak Yeso.

Yeso Cu Ti Nggal Hara

¹³ Myan ima Yeso hal aɗeng ima fur, lang ta kwang i ham wis kyel nin ima ɗeng mata kwa. Ti hal ti mai, suɓut i ɗufal si kolfai asussi i sisai ta ashwaha.

¹⁴ Myan ima ɗor ya ta kwang i hami, ɗing suɓut i ɗufal i hyang, ɗing shum asussi, fa som mwatan cala.

¹⁵ Ango ti mas, fe i ro ames si yes kyel ames si nyus, “Kyel mai a ya, myan ti si langus ta. Cat ta ɗufal ii ra si wis, ɓa si wa fe ashwaha si far cwa si pwak.”

¹⁶ Yeso matussi ni, “Ɗat si wa kyel nin kwa, hun fa hu yus ɗama si cu.”

¹⁷ Si matussi si ni, “Ni mati a folok hara hu gushe apilal je.”

¹⁸ Unai nyus, “Kol huna nati.”

¹⁹ Lak ɗufali ni ɓa si te amun ta si shala' hai. Mat foloki ta gushei, ɗak ɗing kyel ta fit, palang DeeƁwe, nggyal foloki, fa fe i ro ames, si cu wei ti kaar ti ɗufali.

²⁰ Shak asussi si cu si kaf, fe i ro ames si suɓut ngguturai yi, kol cet hure mulang apilal.

²¹ A arya nggal hara si cu, si mbe' arof ta fei kwa.

Yeso At si Ham Hai

²² Fo abet Yeso lak fe i ro ames ɓa si rang ta kwang i ham, si cu wei ti wa ɓa si pis si fiti hai, yis kat ti' ti ɗufal ya.

²³ Takfai tima ti' suɓut i ɗufali ya, unai ɗu ta ɗanggash yis ahwes ɓa u fwal DeeƁwe. Myan ima ango ti mas, yis ta kyeli ahwes,

²⁴ kwangi rus ta saa ta yiiri, se manjengi lang gucuk ti hami ɓin ti njeng ames.

²⁵ Myan ima shitam ataat ti foi mwen ti mas, Yeso yis ati tasi ham hai wa kyel i fe i ro ames.

²⁶ Unai fe i ro ames si ɗingus yis ati tasi ham hai, myanat ka'us, si gwa' rafo, si ni, “A malu'!”

²⁷ Fo abet, Yeso findelus ni “Ka hu tirim kwa! Ayin. Ka hu mwen kwa.”

²⁸ Pita ni, “A Deembai, na a ha, kina ɓa i yes kyel ama nasi ham hai.”

²⁹ Yeso nyus, “Yaa.” Unai Pita jik ya ta kwangi, at si ham hai yis yes kyel i Yeso.

³⁰ Myan ima ɗing se yis hwirish ti ambas, myanat ka'us, unai langus mbwish ta ham wi, ɗak mat shaat ni, “A Deembai, buma na!”

³¹ Fo abet Yeso ti' ra ka'us. Nyus, “Ha ma fati mulut ndyong, ami kin ha ma mulut apil-apil ya?”

³² Myan ima si rang ta wii kwang i hami wi, sei kat ya.

³³ Unai ima si ta wii kwang i hami si cus afut, si ni, “A awei, ha a Al i DeeƁwe.”

³⁴ Myan ima si pis si fiti hai, si ɗor ya ta ta' ti Jenesaret.

³⁵ Myan ima ɗufal i ashwai si shangi a Yeso, unai si lai ɗufal ta kikyal shak. Ɗufal si yes ti shak som mwatanan ta kyel ames,

³⁶ sin fwalsus ɓa u hon som i mwatanani si ngge' fagin ames kyek. Shak som ima si ngge'us si wis cala.