Matyu 13 - Findel i DeeƁwe Ti Alis i Ron

Kaani i Maɗahan

¹ Mwen a mai, Yeso lang ya ta wur, wa te amun ta fo i yiir.

² Suɓut i ɗufal hyang fwet si suɓut ta kyel ames, yes lang ta kwang i ham te amun ta. Shak suɓut i ɗufal sin mangrai ta fo i yiiri.

³ Unai lakus ɗamam hyang ti kaani ni, “Maɗahan nin wa lai ti musut.

⁴ Myan ima yis ak ti musuti, unai shini musuti si fwar ta fisel, unai avyash si yes si tang ya.

⁵ Shini si fur ta kyel i mafyai, kyel ima mati ta' fwet kwa. Musuti ɓu kaang, ɓurti ta'i mayus tashkalak.

⁶ Myan ima ɓwe ti ka' yes sai hai, unai si shokus, ɓurti si ti sisyar fwet kwa.

⁷ Shini si fur ta aren wi hwak, unai areni luk fit zure' us ya.

⁸ Shini si fur tasi ta' maɗesi hai, si shu fe ndik andek, shini hure taan-taan, shini hure ataat-ataat.

⁹ Mamwal i hali, u hali.”

¹⁰ Unai fe i ro ames si yes kyel ames si lul lus si ni, “Ami kin ha lak ti ɗufal findel ti kaani ya?”

¹¹ Unai Yeso matussi ni, “A hun si ɓwet ɓa hu shang findel i mufot i kaitat i kyel fit, a sin kwa.

¹² Shak maɗufal ima mati, ayis si wa fasus i hai, u te ti buu. Shak maɗufal ima mati kwa, al i maɗeng ima mati, si wa mat ti ya ta kyel ames.

¹³ Aɗeng ima kin i ma laksus findel ti kaani mai, “Sin ɗingi, si ɗingi kwa, sin hali, si hali kwa.

¹⁴ Laki i Ishaya mashit hya ima ni, Hu wa hali, shak ta andi, ‘Hu wa shang ti ɗama kwa, hu wa ka'ti ɗingi shak ta andi hu wa ɗing ti ɗama kwa fweng.

¹⁵ Ɓurti ɗufal mii si no' mulwat ames ya, si hali ti mwal ames kwa, si ndu' shishat ames ya hwak. Kan si ndok si ɗingi ti shishat ames, si hali ti mwal ames, si shangi ta mulut ames, si hatat na kyel amen, ɓa i fas cala.’

¹⁶ Shak ta andi, disyo' si shishat amu ɓurti si ɗing kyel, mwal amu hwak si hal ti findel.

¹⁷ Ɓurti andi, i laksu mwawei, som i shit hu som munderei hyang, si kin shit ɓa si ɗing aɗeng ima hu ɗingi, si ɗingi kwa. Sin ɓweti hal ti aɗeng ima hu hali, si hali kwa.

¹⁸ “Hal hun aɗeng ima findel i kaani i lai ti musut ma laki mai.

¹⁹ Myan ima maɗufal hal findel i kaitati, ɗak shangi kwa, a Shatan yes vyam aɗeng ima si lai ta mulut ti ya. A musut ima ndak ta fisel ndai.

²⁰ Maɗufal ima mat musut ima ndak ta ɗafyai wi, a maɗufal ima mat findeli abet ti jakak.

²¹ Ɓurti wis kyel i shwaiti sisyar kwa, pwet ii myan ndyong je. Myan ima shum ti yes ɓurti findel i DeeƁwe, fo abet furus.

²² Musut ima fur ta aren wi, a maɗufal ima hal findel i DeeƁwe, ɗak a tirim i mupwet mai hu sanggal i sufat zure' findeli ya, ti ngguryatut.

²³ Maɗufal ima mat musut ima fur ta ta' maɗesi, a maɗufal ima hal findel i DeeƁwe, ka'i. Fa macwa, nin ndik andek, nin hure taan-taan, nin hure ataat-ataat, myan i karat.”

Kaani ti Daka

²⁴ Yeso masus kaani nin ni, “Kaitat i kyel fit ma fota maɗufal ima lai musut maɗesi ta yang ames.

²⁵ Myan ima ɗufal sin yus raki, ma ha' ti wei yes kon lai ti musut i daka ta manduma wi, ɗak wis.

²⁶ Myan ima mandumai taɗas, ngye zan harai, unai dakai nyan gile' tifai.

²⁷ “Som i ro ta yangi si wa si lak mayangi nyai, ‘A dee, i nyai ha lai a musut maɗesi ta yang ama ani hoo? Ɗak, i ta le daka lang ta yangi ya?’

²⁸ “Matussi ni, ‘A ma ha' ti wei mati ro moti.’ “Som i roi si lulus, ‘Ha ɓweti ɓa ni wa ni mbuk ya haa?’

²⁹ “Matussi ni, ‘Wayou, ɓurti myan ima hu te mbuk ti dakai ya, hu wa mbwakan ti mandumai ya hwak.

³⁰ Hon hu yus si ngye tikul yes myan i karat. A myan ani i wa lak ti som karati, si tong har ti dakai si nwa' ya ɓu ti lu'i ya, ɗak si suɓut mandumai si wa si shu ta hot amen.’ ”

Kaani Ti Ma'al i Gadina hu Hong

³¹ Yeso hum laksus kaani nin ni, “Kaitat i kyel fit ma fota musut i gadina, ima maɗufal zan lai ta yang ames.

³² Ta saa ti musut i musyaha shak, ii moti mii mayayi. Shak ta andi, musya ti ngya ti te i ndyi ta saa ti musyaha, avyash hwak si yias si lat wur ta rai musyai.”

³³ Yeso hum laksus kaani nin hwak ni, “Kaitat i fit ma fota hong, ima mbor ti zan ti yir ti han hyang, ɗak mariɓis ta hani wi shak.”

³⁴ Yeso lak ɗufal shak ɗamam mii ta fisel ti kaani. Lakus ɗama nin kaciwa' kaani kwa.

³⁵ Mai hya laki i Ishaya mashit nyai, “I wa findel ta fisel ti kaani, I wa lak ti ɗamam ima si ta mufot, tasi myan ima si mas naya.”

Yeso Ɓerenggyes Kaani i Daka

³⁶ Unai Yeso hon suɓut i ɗufali lang ta wii wuri. Fe i ro ames si yes kyel ames si ni, “Ɓerenggyes a nin findel i kaani i daka ta yang mai.”

³⁷ Yeso humus ti kyel ni, “Maɗufal ima lai musut maɗesi, a Al i Maɗufal.

³⁸ Yangi, a naya. Musut maɗesi, a fe i kaitat. Dakai, a fe i Shatan,

³⁹ ma zan ti wei ima lai dakai, a Shatan. Karati, a dala i naya, som i karati, a som lu' i DeeƁwe.

⁴⁰ “Fota ngga' ima si suɓwatan ti daka si ngyesh ya, angga' ima ma wa mute ta nai, mwen ti dala i naya.”

⁴¹ Al i Maɗufal ma wa roti som lu' ames, si mbwak shak ɗama ima ma kinti ɗufal masti mafwashi, hu shak ɗufal ima si masti ro mufwashi ya, ta kaitat ames wi.

⁴² Ma wa muhwitus ta wi man manggoroshi, a ta kyeli si wa kawa sin nggwaran ti anggurai ames.

⁴³ Som munderei si wa cinjangat ya fota ɓwe ta kaitat i Dees. Mamwal i hali, u hali.

Sufat ima Mata Mufot Wi

⁴⁴ “Kaitat i kyel fit ma fota sufat ima mata mufot wi ta yang. Myan ima maɗufal wisi, wa hum laiyi ya. Jakak fwet, wa juwil shak aɗeng ima mati ya, wa pwak ti andi yangi.

⁴⁵ “Unai hwak, kaitat i kyel fit ma fota ma woor, ma far ti afyai ima si ti cef.

⁴⁶ Myan ima wis andek mu cef fwet nin, wa juwil shak aɗeng ima mati ya, pwak ti.

Kaani i Takal i Gong ti Gushe

⁴⁷ “Unai hwak kaitat i kyel fit, ma fota takal i gong ti gushe, ima si hwiti ta polok, unai kok gushe akat-akat.

⁴⁸ Myan ima takali hya, som gong ti gushei si dul ya ta fo i ham. Ɗak si te amun si tang gushe muɗesii si shu ta cet, si wak mufwashani ya.

⁴⁹ Angga' ima ma wa mute ta nai, ta dala i naya nai. Som lu' i DeeƁwe si wa yes si kaar ti ɗufal mufwashi ta saa ti munderei.

⁵⁰ Si wa muhwi ti ɗufal mufwashi ya ta man manggoroshi, a ta kyeli si wa kawa sin nggwaran ti anggurai ames.

⁵¹ “Yeso lulus ni, ‘Hu ka' ɗamam mii shak haa?’ “Si humus ti kyel nyai, ‘Hei.’

⁵² “Yeso lakus nyus, ‘Ɓurti andi, shak makofiti si anggut ima si lakus findel si mangga' i kaitat i kyel fit, ma fota mawur, rang ti ɗamam mumwayani hu muwilani ya ta ɗom i shwaiti ɗam.’ ”

Mashit Kaciwa' Ngye

⁵³ Myan ima Yeso mbit findel i kaani mai, unai hon kyeli.

⁵⁴ Yeso ru ta ashwa ames, fur kofti ɗufal ti ta mare, si shok na fwai. Si lul si ni, “Maɗufal mai wis piris hu andok i masti ɗamam i shok na fo mai ii leya?

⁵⁵ Mai a al i manggwak ti ɗamam ani kwaa? Ka ni a hun nasus a Uryam hoo? Ka ni a hun shunus a Jemis hu Josep hu Siman hu Jud hoo?

⁵⁶ Ka ni a hun shunus a murwafi mii kama tikul nati hoo? Ɗak yis wis shak ɗamam mii ii leya?”

⁵⁷ Unai si mas futut ti yis. Shak ta andi, Yeso lakus ni, “Si fai mashit ngye ta ashwa hu wur ames kwa.”

⁵⁸ Mas ɗamam i shok na fo ta kyeli hyang kwa, ɓurti si nggwes i fati mulwat.