Matyu 12 - Findel i DeeƁwe Ti Alis i Ron

Deembai i Mwen ti Lafos

¹ Ta myan ani, Yeso hu fe i ro ames sin musa ta yangang i macwa nin Mwen ti Lafos. Hwem han fe i ro amesi, unai si fur warat ti macwai sin cwai.

² Myan ima Farisiyawa si ɗingi andi, si nyus, “Ɗingai! Fe i ro ama sima nggyel ti anggut ya, ti aɗeng ima si masi Mwen ti Lafos.”

³ Unai nyus, “Awinoo, hu mbe' si Kaada hai kwa, ngga' ima ai Devid masi myan ima yis hu myayus hwem hanus haa?

⁴ Devid hu myayus si rangta Wur i DeeƁwe, si cu folok masapai ima ɗat ɓa si cu kwa. A som i kocok je si cwai.

⁵ Ahun hu mbe' si Anggut hai nyai, som i kocok ta Wur i DeeƁwe si mas gbya' ti Mwen ti Lafos, shak ta andi si yus ra hara haa?

⁶ I ma laksu mwawei, maɗufal ima ɓin Wur i DeeƁwe ma nati.

⁷ Naɗin hu shang musut i findelal mii, ‘Yin i far ti a mute i gu'ti ashur, a tor ti kuna kwa,’ naɗin hu ɗing mafwashi i som ima wa' si shang ɗama kwa.

⁸ Ɓurti Al i Maɗufal a yis a Deembai i Mwen ti Lafos.”

⁹ Takfai ti mai, Yeso hon kyeli lang ta mare ames.

¹⁰ Ta marei maɗufal nin mata ima ra ames shokus. Unai si lul lul ta kyel i Yeso nyai, “A kiga' si fa maɗufal cala Mwen ti Lafos haa?” Si lul lul mai, ɓa si wisus ti mafwashi.

¹¹ Yeso nyus, “Na ɗeng na saa yuti yis ti tutwi ɗak ti fur ta hum wi Mwen ti Lafos, ma tutwii ma wa zan sut ya mweni kwa haa?

¹² Maɗufal ɓin tutwi mbaitat fwet. Ɓurti andi anggut aminin honin ɓa ni mas maɗesi Mwen ti Lafos.”

¹³ Ɗak lak maɗufal ma ra mashokiyi ni, “Tasa ra ama.” Tas rai, unai rai hum kyel cala fota mandeki.

¹⁴ Shak ta andi, Farisiyawa si rangya, si ɓeti ngga' ima ɓa si for Yeso ya.

Yere ima DeeƁwe Ben

¹⁵ Yeso shang ambe' ames, dul ɗyus ya ta kyeli. Ɗufal hyang si kolfai asussi, yis fasus njeng ta mwatanan ames shak,

¹⁶ yis ti'sus ra nyai, ka si koftus ta kyel i ɗufal kwa.

¹⁷ Mai a ɓurti ɓa si hya findel i mashit Ishaya nyai,

¹⁸ “Ɗing hun yere amen ima i ben, ima i ɓwetsus, i pipelat na mulut ti yis fwet. I wa kinsus rin amen hai, ti la mbai ma wa lak ti Ramam ti fisel mwawei.

¹⁹ Ma wa shaal hu tutolat kwa, Ɗeng ma wa ra' ti hal ti la asus ta saa ti fisel kwa.

²⁰ Ma wa nggyel ti uduru' mu afol ya kwa, ma wa fot ti mukof tima ti kat ndyong i mot ya kwa, yes mwen ima mwawei ti wa cwai ti uges, mwen tot ti ɓur.

²¹ Shak Ramam si kintiɓwi si yis hai.”

Yeso hu Ba'alzabul

²² Unai si kolus ma rin mafwashi nin, ima a mandu' hu manzyau, Yeso fas cala, maɗufali findel, ɗing kyel hwak.

²³ Ɗufal shak si shok na fwai sin nyai, “Ahun a mai mii Al i Devid ya?”

²⁴ Farisiyawa si hali andi, unai si ni, “Mai lang ti rin mafwashi ya, a ti njeng i kaitat i Ba'alzabul, makai i rin mafwashi.”

²⁵ Yeso shang ambe' ames nyus, “Shak kaitat ima kaar ɗyus apil, sima ha' ti wei ti ɗiyai, kaitati ma wa mufur. Shak ashwa hu wur tima ti kaar ɗyut apil, ti wa mute mangra kwa.

²⁶ Na Shatan yis mulang ti Shatan ya, matkaar ti ɗyus apil ndai. Atini kaitat ames u te mangra ya?

²⁷ Na i nggati rin mafwashi ya ti Ba'alzabul, fe amu si nggai ya ti anggi rini ya? Ɓurti andi, a si mai si wa totsu ɓur.

²⁸ Shak ta andi, na i nggati rin mafwashii ya ti a Rin i DeeƁwe, kof ndai kaitat i DeeƁwe ru na saa yuti.

²⁹ “Awe ma wa mulang ta wur i maɗufal manjeng u harus ɗamam ya ya? A maɗufal ima ɓin njeng ma wa no'sus ya tawe, ɗak har ɗam i wuri ya.

³⁰ “Shak maɗufal ima ma akul hu yin kwa, ma nadon ti yin ndai. Shak maɗufal ima wa' wisun ti suɓuti ma ɓaasan ti ya ndai.

³¹ Ɓurti andi i laksu, shak maɗufal ima mas mafwashi hu findel i ale', si wa shwaisus si ya. Shak maɗufal ima lak findel i ale' tasi Rin i DeeƁwe, si wa shwaisus si ya kwa.

³² Shak maɗufal ima lak findel mafwashi tasi Al i Maɗufal hai, si wa shwaisus si ya. Shak maɗufal ima lak mafwashi si Rin Masapai hai, si wa shwaisus si ya kwa, nasi mwashi, yes myan hu myan.

³³ “Na yit a muɗesi, fei si wa mute ii muɗesani. Na yiti a mufwashi, fei si wa mute ii mufwashani hwak. Ɓurti si shang ɗat i yit ii ta si fe amet hai.

³⁴ Hun gikak i ɗamafwashi! Atini hu wa shang ti lak ti muro maɗesi, hun ima hu mii ɗufal mufwashani ya? Ɓurti aɗeng ima hya ta mulut, ayis fo ma wa laki.

³⁵ Maɗufal maɗesi, ii ta gwishil i mulut ames ma wa mulangya ti maɗesi, maɗufal mafwashi, ii ta gwishil i mulut ames ma wa mulangya ti mafwashi hwak.

³⁶ I ma laksu, maɗufal ma wa mbe' ti shak findel i gbya' ima ai lak, mwen ti tot ti puɓwar i DeeƁwe.

³⁷ A findel ama ma wa bumsa, ayis ma wa gansa hwak.”

Far ti Ɗama i Shok na Fo

³⁸ Unai som kofiti si anggut hu Farisiyawa si nyus, “A makofiti, ni ɓweti ni ɗing ɗama i shok na fo nin na kyel ama.”

³⁹ Unai matussi ni, “Waya mufwashi hu mu zuruk hu far ti ɗing ti ɗama i shok na fo! Si wa ra' ti kofsu ti ɗama nin kwa, ii mashit Jona je, si wa kofsu.

⁴⁰ Jona mas mukon ataat fo' ta reni ta ɗar i mbai gushe, angga'i nai Al i Maɗufal ma wa masti mukon ataat, fo' ta reni ta ta'wi hwak.

⁴¹ Mwen ti tot ti puɓwar ti DeeƁwe, som i Nineva si wa muluk fit akul hu ɗufal i myan moti ɗak si ganus, ɓurti si kabuk myan ima Jona lakus findel i DeeƁwe. Mwashi, ɗeng ima ɓin Jona mana nati.

⁴² Mwen ti tot ti puɓwar ti DeeƁwe, Mukai ti Ɓwai i Muɗor, ti wa muluk fit akul hu ɗufal i myan moti ɗak ti ganus, ɓurti ti yes ii ta nggwe' i naya ɓa ti hal piris i Solomon. Mwashi, ɗeng ima ɓin Solomon mana nati.

⁴³ “Na rin mafwashi lang ya ta maɗufal wi, u sa ta kyel ima ma kaciwa' ham ɓa u lafos ta, na wisi kwa.

⁴⁴ Unai ma wa nyai, ‘Ɓa i hum kyel ta wur amen ima ai i lang ya ta.’ Na humta ɗak wis ɗeng ta kwa, ma si fyal kyeli ya, si ɗak ti ta ndere,

⁴⁵ ma wa muhumkyel u har shini pyoron ima si ɓinus mafwashi. Ɗak si lang ta, si te amun ta. Mai i maɗufali mute ames i dala, ma wa ɓin ti i bya' rafat. Angga' ima ma wa mute ti myan mafwashi mai ta nai hwak.”

Nati Yeso hu Shunus

⁴⁶ Myan ima yis hai findel, unai nasus hu shunus sin mangrai ta saikyel, sin ɓweti findelsus.

⁴⁷ Unai ɗeng nyus, “Ɗingai, nasa ndai hu shuna ta saikyel si ɓweti findel sa.”

⁴⁸ Unai Yeso humus ti kyel ni, “A uwe ti mii nasun ya? A hu we si mii shunun ya?”

⁴⁹ Unai ti' ra ames wa kyel i fe i ro ames ni, “Ɗing hun hu nasun hu shunun mii!

⁵⁰ Shak maɗufal ima mas aɗeng ima Deen i kyel fit ma ɓweti, a yis mii nusun hu tusun hu nasun.”