Matyu 1 - Findel i DeeƁwe Ti Alis i Ron

Manzor i Gung i Yeso

¹ Manzor i gung i Yeso Kristi al i Devid mai, ima yis hwak a gung i Ibirai.

² Ibirai al Aizik, Aizik al Jakop, Jakop al Juda hu shunus.

³ Unai Juda al Feres hu Zera, ima nasus a Utamar, Feres al Hezron, Hezron al Aram,

⁴ Aram al Aminadab, Aminadab al Nashon, Nashon al Salmon,

⁵ Salmon al Bowaz, ima nasus a Urahab. Bowaz al Obed, ima nasus a Urut, Obed al Yese,

⁶ Yese al Makai Devid. Devid al Solomon, ima nasus a mbor tima ai ti Yurya,

⁷ Solomon al Rehobowam, Rehobowam al Abija, Abija al Asaf,

⁸ Asaf al Yehoshafat, Yehoshafat al Joram, Joram al Ozya,

⁹ Ozya al Yotam, Yotam al Ahaz, Ahaz al Hezekya,

¹⁰ Hezekya al Manasi, Manasi al Amon, Amon al Josya,

¹¹ Josya al Yekonya hu shunus, myan ima si harus wa Babila.

¹² Takfai tima si harus wa Babila, unai Yekonya al Shaltyel, Shaltyel al Zarubabel,

¹³ Zarubabel al Abihud, Abihud al Elyakim, Elyakim al Azor,

¹⁴ Azor al Zadok, Zadok al Akim, Akim al Alyud.

¹⁵ Alyud al Elyazar, Elyazar al Matan, Matan al Jemis,

¹⁶ Jemis al Josep re i Uryam tima ti al Yeso ima si lai ii Kristi.

¹⁷ Shak waya ta Ibirai yes hai i Devid, a waya hure mulang ɓaras. Tasi hai i Devid yes myan ima si harsus watus Babila hwak, a waya hure mulang ɓaras. Ta harsus watus Babila yes hai i Kristi, a waya hure mulang ɓaras.

Myan ima si al Yeso Kristi

¹⁸ Angga' ima si al Yeso Kristi ta mai. Josep yis fwa ti Uryam nati Yeso, kaciwa' ti si mas kunggo, unai si wisut ti haar ta kyel i Rin Masapai.

¹⁹ Ɓurti Josep zalang amet a maɗufal ma mwawei, yis ɓweti ɓa u fat shusho ta wei i ɗufal kwa, unai far ngga' ima ɓa u honut cakat i mufot.

²⁰ Myan ima yis ɗiri hai ambe' mai, malu' i Deembai pwakus hai ta fiɗyat wi nyus, “A Josep al i Devid, ka ha mwen i kunggo ti Uryam yamwan asa kwa, ɓurti haar ima ti ti mai, ii ta kyel i Rin Masapai.

²¹ Ti wa al ti al, ha wa kinsus asum ii Yeso, ɓurti a yis ma wa bum ti som ames ta mafwashani ames wi.”

²² Shak ɗamam mii si masus, ɓurti ɓa si hya findel ima Deembai lak ta fo i mashit nyai,

²³ “U mai yamwan ti wa kaf ti haar, ti al al, si wa laisus ii Imanuwel.” Aɗeng ima si nitus Imanuwel, a yis mii, “DeeƁwe ma akul hu kan.”

²⁴ Myan ima Josep ɓusho ta arak wi, mas ɗamam ima malu' i Deembai lakus ɓa u masi, Josep wa zan Uryam ii mbor ti kunggo.

²⁵ Shak ta andi, kon tut ii mbor kwa, honut cakat yes myan ima ti al ali. Unai kinus asum ii Yeso.