Luka 8 - Findel i DeeƁwe Ti Alis i Ron

Kaani ti Maɗan

¹ Takfai ti aɗeng mai, Yeso nggar ta fei i ashwai muyayi, yis lak ti ɗufal muro maɗesi i kaitat i DeeƁwe. Mulang apili sin tifai asussi,

² hu shini arofi ima ngga rin mafwashi ya hu mwatanan ta lo' yusti. Arofi, a hu Uryam ta Magdala tima ngga rin mafwashi pyoron ya ta lo' yut ti,

³ hu Ujwana mbor ti Kuza mbai maro ta wur i Herod, hu Usuzana, hu shini hyang. Arof mii si bum Yeso hu fe i ro ames ti aɗeng ima siti.

Kaani sima Ak ti Musut

⁴ Myan ima ɗufal si shwai hyang sin ɓata yes ta ashwaha, Yeso lakus findel ti kaani nyai,

⁵ “Maɗan nin wa ak ti musut ames ta yang. Myan ima yis ak ti musuti, shini si ndaak ta fisel, ɗufal si tindaki ya, avyash si tang ya.

⁶ Shini si fur ta afyai wi, si ngye abet si shokus, ɓurti kyeli mii maɗyayi kwa.

⁷ Shini musuti si fur ta aren wi, si ngye akul, unai areni vwere' us ya, shaas ngye.

⁸ Shini musuti si fur ta si ta' maɗesi hai. Si ɓu si shu ma'al ndikak hure ɓin aɗeng ima ai si lai.” Takfai ti findel mai, Yeso findel ti la mbai ni, “Mamwal i hal, u hali!”

⁹ Unai fe i ro ames si lulus nyai, “Findel ima ha kaan mai, ma nyai ami ndai ya?”

¹⁰ Unai Yeso nyus, “Ɗamam munggyongani i kaitat i DeeƁwe si fa ɓi ahun hu shangi. Anggum i ɗufali i wa laksus findel ti kaani, ɓa, “ ‘sin ɗingi, si ɗingi kwa, sin hali, si hali kwa.’

Yeso Fa Kweneng Tasi Findel i Kaani

¹¹ “Aɗeng ima findel i kaani ma laki mai, musuti a findel i DeeƁwe.

¹² Musut ima si fwar ta fisel ani a som ima si hal findeli, ɗak Shatan yes har findeli ya ta mulwat ames, ɓurti kandok si fa mwawei si wis mupwet.

¹³ Musut ima si fwar ta afyai wi, a som ima si mat findel i DeeƁwe ti jakak, myan ima si hali, ɗak si yus kaciwa' mahuhur, si fa mwawei i myan ndyong je, ti wis ti amba, unai si fwarus.

¹⁴ Musut ima si fwar ta aren wii ani, a som ima si hal findeli si mat ta mulwat, ɗak si cu wei ti ngye, tirim hu ramwayat i ɗam i naya, hu hal ti ɗat si ɓwi i naya vwere' us ya, kin si nggwes i ngye.

¹⁵ Musut ima si fwar ta si ta' maɗesi ani, a som ima si mat findel i DeeƁwe ti mulut maɗesi hu mwawei, si kin tasi mulwat ames, ti ka'ti agung si fa macwa.

Kaani si Man ti Mukof

¹⁶ “Ɗeng lwa' mukof ɗak hat u vo ya ti lung, ahun u kin ya ta ɗar i kyel i marak kwa. Kyan tasi kwetleng hai, ɓurti ɓa ɗufal si ɗing kwenengi.

¹⁷ “Shak ɗamam ima si mata mufot wi si wa matkof, shak ɗamam ima si ta mavo si wa matɓwai ya tasi kweneng.

¹⁸ Tehun mweret si ngga' ima hu hali ta ɓurti maɗufal ima mati, si wa fa sus i hai hyang. Maɗufal ima mati kwa, al i maɗeng ima maɗingi mati si wa mati ya.”

Nasus ti Yeso hu Shunus

¹⁹ Nasus ti Yeso hu shunus si yes ɓa si ɗingus, shak ta andi ɓurti ɗufal si ɓalus hai, si wis ɗingsus kwa.

²⁰ Unai maɗufal nin wa lakus ni, “Nasa hu shuna sima mangrai na saikyel si ɓweti ɗingsa.”

²¹ Unai matussi ni, “Nasun hu shunun a som ima si hal ti findel i DeeƁwe sin ti masti ro.”

Yeso Kin Se Manjengi Kat Ya

²² Nin mweni ndai, Yeso lak fe i ro ames nyus, “Ka pis ta ɓwai i fit i ɗara.” Lang ta kwang i ham si ka' fisel.

²³ Myan ima si cu wei ti ati si ham hai, arak ha' Yeso ya. Unai se manjengi nin luk fit ti ambas, hami fos rang ta kwangi wi, tirim ka'us hyang ɓurti kwangi furus hya ti ham, fas myanat.

²⁴ Unai si wa si ɓushos si nyus, “A Dee, a Dee, kakan mbwish na ham wi!” Unai Yeso ɓusho lak sei hu gucuk i hami ɓin. Unai si katya, kyel ti te cakat.

²⁵ Unai lul ta fe i ro amessi nyus, “Fati mulut amui ma a leya?” Unai myanat ti ka'us hyang, aɗengi fas shok na fo, unai si lul ta ɗiyai nyai, “A musut i nggi maɗufali mai, ima se hu gucuk i ham si hal findel ames si te cakat ya?”

Yeso Fa Dafal Ma Rin Mafwashi Cala

²⁶ Unai si ru ta ashwa i som i Garasin ima mata ɓwai i Galili.

²⁷ Yeso te mujakyel ta kwangi abet, si shwai hu maɗufal nin ima yes ta ashwa, mati rin mafwashi. Myan hyang wo yis yus mute ambwirit, nggwes i mute ta wur, u tyayus ta kikyal i fiyai.

²⁸ Ti ɗing ti Yeso abet mat raafo, lang fur ta mabel i Yeso, ɗak lak ti ambas ni, “Ami fut kun ya, a Yeso, Al i DeeƁwe mambaitat? I ma fwal sa, kan ha kofun ya kwa!”

²⁹ Ɓurti Yeso lak rin mafwashi ɓa u lang ya ta maɗufali wi. Ngang ma ha'ansus u patikyel ta fisha, si wo no'sus ti shitam ra ta sisaiyi sin ɗingsus ta. Shak ta andi ɗwak shitami ya, rin mafwashi zanus wati kyel ima ɗeng mata kwa.

³⁰ Unai Yeso lulus ni, “Asum ama aweya?” Matussi ni, “Hyang,” ɓurti rin mafwashi si langus hai hyang.

³¹ Unai si ka' fwalsus, kan tukus ta hum manggyongi ima si lai ii Abiss kwa.

³² Ta nggas ti kyeli hwak, male' i nggish shini sin far ti cwa ta ɓwai i fwere nin. Unai rin mufwashani si fwal Yeso ɓa u honus si rang ta nggishashi wi, unai ni ɓa si rang ta.

³³ Rin mufwashi si lang ya ta maɗufali wi, si rang ta wii i nggishashi. Unai si luk fit abet, si twak kikyal muɗor, si ndaak ta yiir wi, si mwat ta.

³⁴ Myan ima som i ɗing ti nggishashi, si ɗing aɗeng ima wisus, unai si tital si wa ta ashwaha mbayai, hu muyayi sin lak ti ɗufal aɗeng ima si ɗingi.

³⁵ Ɗufal si rangya, wa ɗing ti aɗengi ti haisus. Ti muru ta kyel i Yeso, si wis maɗufal ima ai yis ti rin mafwashi ta mabel i Yeso cakat, yis ti arom ta lo', ambe' ames humkyel hwak. Unai myanat ti ka' ɗufali shak.

³⁶ Som ima si ɗing aɗengi ti bya' si ka' lak ti ɗufal ngga' ima Yeso fa ma rin mafwashi cala ta.

³⁷ Unai shak ɗufal i ashwaha i Garasin si kabuk Yeso ɓa u hon ashwai, ɓurti myanat ti ka'us ti ambas. Unai lang ta kwang i ham, wis.

³⁸ Maɗufal ima rin mufwashii si rangya ta lo' amesi, fwal Yeso ɓa u honus u kolfai asussi. Unai Yeso nggwes, lakus ni,

³⁹ “Humakyel ta wur, ha lak shak aɗeng ima DeeƁwe masai.” Unai maɗufali wis, sa ta wii i ashwai, yis lak ti aɗeng ima Yeso masusi.

Al ti Jairus hu Mbor Tima ti Shwaiti Wash Ya

⁴⁰ Ti muhumkyel i Yeso, ɗufal hyang si shwaiyus ti jakak ɓurti si shwaiti yes amesi hwak.

⁴¹ Unai maɗufal nin ma asum Jairus, ima mii mbai ta marei, yes shu i mafwaran ta mabel i Yeso, yis fwalsus ɓa u wa wur ames,

⁴² ɓurti foti al asus mumbori andek ɗwyat, mu wilyal hure mulang apil, ti yut ta fo i mot. Myan ima Yeso te wa ndai, suɓut i ɗufal si nggarus ya sin mbwa'an ɗiyai.

⁴³ Mbor nin yit ta saa ti ɗufali, tima ti kol wilyal hure mulang apil, yit shwaiti wash ya kaciwa' katya, ti mbit sufat amet ya shak (yit far ti ma manda) shak ta andi, ti njeng kwa.

⁴⁴ Unai ti yes ta takfai ames, ti ngge' fo i fagin i Yeso, fo abet muɗor i washi katya.

⁴⁵ Unai Yeso lul ni, “Awe ngge' un ya?” Ɗufal shak si ni, a sin kwa, unai Pita ni, “A Dee, ɗufal si nggara ya ta ɓwayaiyi shak, sin twakan sa.”

⁴⁶ Shak ta andi, Yeso lak ni, “Ɗeng ngge' un, ɓurti i hal andok lang ya na lo' amen.”

⁴⁷ Unai mbori ti ɗingi, ti wa mufoti kwa, ti lang ya lo' amet yis yus ɗaro, ti shu i mafwaran ta mabel i Yeso. Ti lakus ta wei i ɗufal shak aɗeng ima kin ti ngge'us, hu ngga' ima ti wis cala ta fo abet.

⁴⁸ Yeso lakut ni, “A al asun, fati mulut amesh kin shi wis cala. Shi ndok cala.”

⁴⁹ Yeso yis ɗiri findel ndai, unai mamuro ta wur i Jairus ima mii mbai ta marei yes, lak Jairus ni, “Al asai ti motut, kan ha fa makofiti mai shum kwa.”

⁵⁰ Ti hali andi, Yeso lak Jairus ni “Ka ha mwen kwa! Faha mulut kyek, ti wa muhum mupwet.”

⁵¹ Myan ima si ru ta wur i Jairusi, sha ɗufal shak mulang ta akul hu yis, unai hon a si Pita, hu Jwon, hu Jemis, hu dee ta naa ti ali je.

⁵² Ɗufal shak ima si mata wuri, sin kawa ta raafoi ɓurti ali. Unai Yeso nyus, “Ka hu kawa kwa, ali ti mot kwa, tima raki kyek.”

⁵³ Unai si musasus, ɓurti si shangi nyai ti motut.

⁵⁴ Unai Yeso ka'ut ta ra, laiyut ti ambas ni, “A yamwan, luk shi fit!”

⁵⁵ Unai rin amet humkyel, ti luk fit fo abet. Yeso ni ɓa si fat cwa ti cu.

⁵⁶ Deet hu nasut si shok na fwai, unai Yeso zulus mwal nyai kan si lak ɗeng ti aɗeng ima fur kwa.