Luka 7 - Findel i DeeƁwe Ti Alis i RonFati Mulut i Maɓwol ( Mat 8:5-13 ) 1 Myan ima Yeso mbit laksus findelal ima lakus shak ɗufali si hali ti mwal ames, unai langus ta ashwai Kapanahum. 2 Mbai i som ɓwol i Rom nin yis ti yere ames nin ima ɓwetus fwet, mwatan ti ka'us yis yus ta foi mot. 3 Myan ima maɓwoli hali nyai Yeso lang ta ashwai, unai ro mbaiyai i Isar'ila shini ɓa si fwal Yeso ɓa u yes u fa yere amesi cala. 4 Unai si wa si fwal Yeso fwet, si kabuk nyai, “Maɗufal mai ɗat ɓa ha ɗing to ames, 5 ɓurti ɓwet ɗufal i Isar'ila fwet, ta' nin mare hwak.” 6 Unai Yeso wa tifai asussi. Myan ima si ru ta nggas ti wur i mbai i som i ɓwoli, ro myayus ɓa si ni gɓwuk si lak Yeso nyai, “A Deembai, kan ha kof haisa ya kwa, ɓurti i to ima ha lang na wur amen. 7 A to amen kin i yesa fai kwa, ɓurti andi findela kek, yere amen ma wa wis ti cala. 8 Yin i mata mabel i ɗeng, som i ɓwol si na mabel amen hwak. Na i lak mai i ni, ‘Ɓwa,’ u wa, i lak mai i ni, ‘Ya,’ u yes. Na i lak yere amen i ni, ‘Masa hat,’ u masi.” 9 Findel mai fa Yeso shok na fo, unai hat tifai ɗing som ima si koltifai asussi fo tarara ɗak nyus, “I laksu, tii wis ɗeng ima mati fati mulut na Isar'ila musuti mai kwa.” 10 Som ima si wa ti muroi si humkyel, si wissi ma yerei tuu njengus. Yeso Fa Al i Mbor tima Remet Motus Mupwet 11 Takfai ti andi, Yeso wa ta ashwa nin tima si lai i Nain. Fe ro ames hu ɗufal hyang si wa akul hu yis. 12 Myan ima ru ta nggas ti kwap i mashwai, wis ɗufal sin mulangya ti funat i maɗufal nin, al andek ɗwyat i mbor nin tima remet motus. Suɓut i ɗufal hyang sin tifai asuti. 13 Myan ima Deembai ɗingut, unai ɗing shum asuti, nyut, “Kan shi kawa kwa.” 14 Unai Yeso wa ngge' lapan hu fagiir ima si ha' funat ti ii hai, unai som ima sin tii si te mangrai jiir. Unai ni, “A zalang i nya, lukka fit!” 15 Unai zalang ima moti luk fit te amun fur findel, unai Yeso fa naa hi ali. 16 Si ɓwai fwai ya, ɗufal shak si roos jiir ɗak si ha' asum i DeeƁwe fit sin nyai, “Mbai mashit i DeeƁwe ɗor na saa kan ti! DeeƁwe yes ɓa u bum ɗufal ames!” 17 Unai ɗufal si but findel i Yeso ta ta' ti Judya wa shak ɓwayai i mashwahai. Fe i Ro i Jwon Mabatisma ( Mat 11:2-19 ) 18 Unai fe i ro i Jwon si lakus shak ɗamam ima Yeso masi. 19 Unai lai apil ta saa yusti, roos ta kyel i Deembai ti lul nyai, “A ha a ma yesi, ahun ni kin shit si ɗeng hai ya?” 20 Unai ɗufal apili si wa kyel i Yeso, si nyus, “Jwon Mabatisma ro nin na kyel ama nyai ɓa ni lula, ‘A ha a ma yesi, ahun ni kin shit si ɗeng hai ya?’ ” 21 Tasi myani, Yeso fa ɗufal hyang cala ta mwatanan, ngga rinan mufwashani ta lo'a' i ɗufal, ɓu shishat i manzyauwau ya hyang hwak. 22 Unai Yeso matussi ni, “Ɓu, hu lak Jwon aɗeng ima hu ɗingi hu hali, ngga' ima hu ɗing manzyauwau si wis ɗing ti kyel, gundungang si ɗa'at, nggeterai si wis cala, mandu'a' si hal findel, funatat si luk fit ti mupwet, ima lak ti som i jyel muro maɗesi hwak. 23 Maɗesi mata si maɗufal ima wa' fur ɓurti ɗing aɗeng ima i masi!” 24 Takfai ti fe i ro i Jwoni si wis, Yeso fur findel si suɓut i ɗufali tasi hai i Jwon nyai, “Hu wa ta ya i Judya ti kintiɓwi nyai hu wa ɗing tya amiya? A maɗufal ima mayus fota falan ima se fwa' ya u hat ti ta kyel ima ɗingi ɗatus haa? 25 Na andi kwa, hu wa ɗing tya mi ya? Ahun a maɗufal ima shu arom i cef fwet ya? Wayou, som ima si shwai arom maɗesi sin yus cwai ti kyel asus ka wyasus ta wur i kaya. 26 Unai hu rangya wa ɗing ti amiya? A mashit haa? Hei, i laksu ndai, a maɗufal ima ɓin mashit. 27 Findel mai si worong si a Jwon hai nyai, “ ‘I wa ro ti mamuro amen ɓa u tong ta wei ama, ima ma wa ɗaksa ti fisel tima ɓa ha sa ta.’ 28 “I laksu na saa ti shak ɗufal ima arof si al na naya, ɗeng kol Jwon Mabatisma ngye kwa, shak ta andi maɗufal ima ɓin to ta saa ti som ima DeeƁwe mii makaitat ames ɓin Jwon.” 29 Shak ɗufal ima si hal findel i Yeso hu som i mati cef i wufen sin hwak, ti halsus si kof palang nyai, fisel ti DeeƁwe tima kiga' ɓurti si mas batisma ta rai Jwon. 30 Na a hu Farisiyawa hu som ima si shangi nderet fwet si nggwes ti aɗeng ima DeeƁwe ma ɓwetsus ti, fut hwak si nggwes ti findel i DeeƁwe, ɓurti Jwon masus batisma kwa. 31 Unai Yeso lak ni, “I wa kaan ti ɗufal i waya ti mwashi moti hu amiya? Sima fota amiya? 32 Si yus fota fe muyayi ima si suɓut amun ta saa ti kyel i woor sin jolok ti ɗiyai hai nyai, “ ‘Ni fu' njungkulet, hu lang adori kwa, ni tong ador i shaat hu nggyu i kawa.’ 33 “I lak mai aɗengi ɓurti Jwon Mabatisma cwai cwa hu woti ham i manggɓu' kwa, fota ngga' ima ɗufali si mana ti, unai hu ni ‘A mawangan ima mati rin mafwashi.’ 34 Al i Maɗufal yes yis cwai ta woiyi hu ni, ‘Ɗing hun ma lok ti cwa ta woi mai, mwes i som i mati cef i wufen hu “som masti mafwashi.” ’ 35 Shak ta andi, piris ti kof mute kiga' si musut i ro amet hai.” Mbor mu Mafwashi ti Shu Yeso Mbar Mafyongi Hai 36 Mafarisi nin lak Yeso ɓa si wa si cu cwa ta wur ames, unai Yeso wa te amun ɓa u cu cwai. 37 Mbor mu mafwashi nin ta ashwai, ti hali nyai Yeso ma cwai ti cwa ta wur i Mafarisi nin. Unai ti yes ti mbar mafyongi ta cunjo kyalak. 38 Ti lang ta ɗom ima matai, ti shu i mafwaran ta takfai yusti ta foi sisai ames yit kawa, ti jop sisai ames ya ti filya amet. Ɗak ti fyalya ti sya i hai amet, yit twaran ti fo amet ii hai, ɗak ti shui mbar mafyongi. 39 Myan ima Mafarisi ima lai Yeso ta ɓwai mesi ɗing mai, lak ɗyus ta mulut nyai, “Naɗin maɗufal mai a mashit ti mwaweiyi, naɗin u shangi nyai musut ti mbor tima ti ngge'us moti, a mu masti mafwashi.” 40 Yeso nyus, “Siman, i ɓweti laksa ɗama.” “Lakana, a Deembai.” 41 Yeso lakus ni, “Ai maɗufal nin fa ɗufal apil wufyar. Andek mat dinari nggal hara cef i ro i mufi andek, mapili mat hure hara. 42 Shak asussi si wis cef i tali kwa, unai shusiya ti mulut andek. Ha ɗingi, anggi ma wa ɓin ti ɓwet sus ta saa ya?” 43 Unai Siman ni, “I ma wufer ames ɓin taii, ma wa ɓin ti ɓwet sus.” Yeso nyus, “Ha lak a kiga'.” 44 Unai Yeso hatat ta kyel i mbori, ɗak lak Siman ni, “Ha ɗing mbor moti haa? I yes na wur ama, ha fan ham ɓa i kalang ti sisai ya kwa, yit ti jop sisai amen ti filya amet ti fyaluni ya ti sya i hai amet. 45 Ha nggwya i ngge' sun ti fo ama, shak ta andi, tasi myan ima i lang na wur ama, mbor moti ti ka' huhop sun ti fo amet na sisai amen kaciwa' katya. 46 Ha nggwya i shwai sun mbar na hai ngga' ima ka shwai mwalmwati ta, mbor moti ti shun mbar mafyongi na sisai. 47 I ma laksu, si shut mafwashi ma hyangi amet ya shak, ɓurti ti kof matɓwet ma hyangi. Maɗufal ima si shus mafwashi ndyong ya, kof matɓwet ndyong.” 48 Unai Yeso nyut, “I shush mafwashi amesh ya.” 49 Mwalmwat ima si cwai ti cwa akuli, si lul ta ɗiyai ames nyai, “Anggi maɗufali mai ima ma shwaiti ɗufal mafwashi ya ya?” 50 Unai Yeso lak mbori nyut, “A fati mulut amesh bumush, ɓwishush cala.” |
© Wycliffe Bible Translators, Inc. and © The Nigeria Bible Translation Trust 2018
Nigeria Bible Translation Trust